RELATIONSHIPS NEI KHINSA NUMEI 50 PERCENT IN CIHMAWH DONGHUKNA DING PASAL KHAWI SIM KHINKHIAN IN NEI DEN
Oct. 22, Pithai: Daily Mail in study a bawlna sung panin numei a kimkhat phial bangin a relationships (love or marriage relationships) a neihpih khitsa uh pasalte tawh a kikhen khak zenzen uh cihna tawh cihmawh ciangin lungakna ding leh donghukna a taina dingin palsal dang ding (back-up partner) koihkhol khinkhian khin uh hi ci-in a reports ah gen hi.
Hih bangin numei ten cihmawh donghukna dingin a koih sim khinkhian leh a koihkholhna hang uh pen a lawmngaihpa ahih kei leh a ten'pih a pasal tawh kikhen vat kha le-uh cih geelkholhna tawh geelna nihna Plan B nei uh cih Daily Mail in study a bawlna panin mukhia hi. Hih bangin teel ding nam nihna (second option) neite pen a tak takin lawmngaih nei lai numeite sangin pasal nei khinsa nupi in Plan B lim neih zaw lai uh hi ci zen hi (a pasal in sihna man'na khat tuak kha vat leh a handal ma-in pasal neih ngap pah pawl cihna hi).
Ahih hangin cihmawh ciangin a taina ding uh (fall-back partner be) kua hi hiam? Daily Mail in study a bawlna panin a muhkhiatna ah numei ten cihmawh donghukna leh taina dingin geelkholhna a neih uh pen a lawm luite (old friend) hi a, numeite tuate phawkna ahih leh lunggulhna (feeling) a neih giugiau khinsa (a duh sim khinkhian uh hi napi a va gengen ngam khol loh) mite hi ci hi. Tua ahih kei leh mawng bangin a kawi khitsa uh a zawllui pasalte uh ahih kei leh a pasal luite; masate (ex-boyfriend or ex-husband) hi. Gym a paina mun-ah a lawm ahih kei leh a nasepkhawmpihte pen a lawmngaih thak ding uh ahih kei leh a pasal thak dingun candidate hoih pen hi cih mukhia hi.
Daily Mail pen UK gam-a Conservative Party tawh political a kizopna nei ahih manin amau study bawlna ei Zo society tawh a kituak khit khol lian loh hangin ei Zomite society sungah bel nungakte leh nupi ten high school ah a guk ngaihte uh, lapawl a sinkhawmpihte uh, nasem in lo a kuankhawmpihte khawng uh ahih kei leh biakinn a kai sim un a hem et giugiau piante uh khawng na hi kha dingin uphuai hi.
Daily Mail in numei 1,000 kiim survey a bawlna ah dawn'na pia ten a beisa kum sagih in a theihte uh Plan B dingin ka en uh hi ci-in dawnna pia pawl khat om uh hi. Tua bang kawmkal ah dawn'na pia sawm lak panin 1 (10/1) ten cihmawh ciangin taina dingin Plan B dingin a khoi sim khinkhiante uh tungah ka "feeling" uh ka gen khinzo uh hi ci uh hi.
Pasal dang ahih kei leh Plan B a mat gawp dinga en numei sawm lak panin li in relationship ka neihpih lai ka neihkawmpipi mah tawh cihmawh donghukna ding pasal ka koih khinkhian zo uh hi ci-in dawn'na pia uh hi. Dawn'na pia numei percentage tawm lote in back-up plan dingin ka koih khinkhiante pen ka lawmngaihpa ahih kei leh ka pasal ka itna zah leh a tungah feeling ka neih zah ka nei hi ci uh hi. Tua ahih manin statement kik ah bang om hiam cih en lai ni.
Daily Mail in numei 1,000 kiim survey a bawlna ah dawn'na piate a suahkhiatsakna ah za lak panin 12 (12 percent) ten tu lianin ka kikholhpih ka lawmngaihpa ahih kei leh ka pasal (current partner) sangin Plan B in ka neih pasal tungah ka feeling neih thahat zaw in khauhpai zaw hi ci uh hi. Lawmngaih nei khin ing ahih kei leh zi nei khin ka hih manin sanmun muang kisa in, "Ngaih lungmuang sa hi'ng" cici vial pawl ading pathauhuai tham hilo maw???
Na lawmngaihna ahih kei leh na zite tungah na itna Meitei Gun tui bangin a kiam lam na kilahkhiatsak ni ni pen a cihmawh ciangun cimawh donghukna dingin a koih khitsa pa kiangah na sim zuatzuat khin kha thei ding ahih manin nisim in na itna meisel a mit lohna dingin namgimtui a dim in na thunkholh den kei leh "Ngaih lungmuangsa hi'ng" ci-in muktum na mutmut hangin a lawmngaihnu ahih kei leh na zi na kiangah a om pong hangin a lungsim nang kiangah om vet loin vakvak ding hi cih phawk in la, guahzu nuai-ah kidalna dingin lukhu na khukkhuk pong hangin na lukhu a keh na hi den hi.
Na kilungmuang sak luat pah pheuphau pong hangin mitkhua mu mitkeuh itna nei, a kho po kal bek ngakin hong len'san nuam tawh relationship nei na hi den hi.
Kidawm... ciamteh!!!
References: The Daily Mail & India Today
No comments:
Post a Comment