BREXIT NEW DEAL: JOHNSON IN EU TAWH BREXIT DEAL THUKIMNA A NEIH MPs KIANGAH ZUAK DING HAHKAT MAHMAH LAI

JOHNSON IN EU TAWH BREXIT DEAL THUKIMNA A NEIH MPs KIANGAH ZUAK DING HAHKAT MAHMAH LAI

Oct. 19, 2019 Nino: British Prime Minister Boris Johnson in Nilaini in EU tawh kikhenna dingin Brussels khuapi-a EU summit ah a proposed divorce Brexit deal thukimna kici a Thursday in a neih uh British MP-te kiangah a hoihna phatin zuak bawl a, ahih hangin Parliament vote ah tem hiam tawh a kisatsak ding baihlam mahmah lai hi. Conservative leader Johnson in EU tawh kikhenna dingin thukimna thak a neih tawh a kamciamna bangin October 31 in Britain gam EU tawh kikhen in kimak dingin kamciamna bawl a, a hun ding zekaisak sawm loin a di'na mah ah ding kip hi (A beisa hun in Oct. 31 in Brexit deal ka pian'sak zawh kei leh hawkguam ah si sa-in ka lum ding hi ci hi).

Ahih hangin Johnson in a Brexit deal thak EU tawh thukimna a neih British Parliament dawl nuainung House of Commons in a thukimpih kisam a, tua dingin 1939 khit nung Parliament ah Kiginni in session a nga veina ding leh kum 37 khit nungin parliament ah hih vai kinialna (debate) om lai ding hi. PM Johnson parliament ah MPs 286 bek nei a, a Brexit deal thak a kithukimpih theihna dingin MPs vote 320 a ngah loh phamawh hi. Tua banah Johnson' government ah coalition government in a kihel Northern Ireland' Democratic Unionist Party (DUP) in a Brexit deal thak gum lo hi.

European Commission President Jean-Claude Juncker in MP-te lungsim mitsuan in nei a, Brussels in haksatna lianpi tawh kum thum sung kidiah Brexit process London in zekaisak behna ding hong nget hangin EU makai ten kisang zo nawn lo ding hi ci hi. Johnson' ma-a Prime Minister Theresa May in nung kum in Brussels tawh thukimna a neih British MPs ten thum vei parliament ah a nolhsak khit nungun July kha in Prime Minister len Johnson in a hun zekaisak nawn lohna dingin kamciamna nei a, Thursday in Brussels ah British Northern Ireland leh EU member Ireland tawh Irish backstop buaina vai gamgi a deih loh hangin hon' dingin "open border" kici thukimna va neihpih thei hi.

Brexit Timeline

• June 23, 2016 in British mi ten referendum vote khiatna nei uh a, gam 28 kipawlna EU nusiatsanna dingin vote 52% - 48% in thukimna nei uh hi.
• June 24: Referendum ah upmawh loh thupiang hangin Conservative Prime Minister David Cameron kitawp hi.
• July 13: EU ah om lai ding deih Conservative leader leh Interior Minister len Theresa May in Prime Minister hong len hi.
• March 29, 2019 ciangin Britain in EU a nusiatna dingin hunciam (deadline) kipia hi.
• June 8, 2017 in Northern Ireland' hardline DUP tawh Conservative Party in thukimna nei thei lo ahih manin British mite in snap parliament elections vote khiatna nei uh a, Conservative Party in Parliament ah a majority khahsuah hi.

Draft Deal

• Nov. 13, 2018: British leh EU negotiators ten draft divorce deal kici kikhenna ding thukimna draft thukimna bawl hi.
• Jan. 15, 2019: Hih draft deal a masa penna dingin Parliament ah vote khiatna ah MPs 432 in gum lo uh a, 202 in gum uh hi.
• March 12: House of Commons in draft deal vote nih vei khiatna ah MPs 391 in gum lo uh a, MPs 242 in gum uh hi.
• March 29: A thum veina ding Parliament votes ah MPs 344 in gum lo uh a, 286 in gum uh hi.
• EU in kikhenna dingin Brexit hun ding May 22 hunciam a piak hangin thukimna piang thei lo ahih manin Oct. 31, 2019 dong hunciam pia kik hi.

PM Johnson

• May 24, 2019: Theresa May in June 7 ciangin Conservative Party leader ka hihna panin ka kitawp ding hi ci-in pulak hi.
• June 23: Brexit deihte lak-a Conservative makai Boris Johnson party makai thak dingin kiteelcing a, June 24 in Prime Minister hong len hi.
• Oct. 17: UK leh EU makai ten Brexit deal thak thukimna nei thei uh hi.

Johnson' Brexit Deal thak bang:

• UK in 2020 bei dong EU rules a zahtak a, a zuih ding.
• EU tawh kikhenna dingin "divorce Bill" kici UK in EU tungah 39 billion pounds kiim a piak ding.
• UK gam-a EU citizens tengte leh EU gamte ah UK citizens tengte rights zahtaksak in, a kepbitsak ding.
• Norther Ireland gam-a van (goods) tawh EU single market in kizopna nei-in kipawl (align) ding. Tua bang kawmkal ah thukham lamsang (legally) ah EU hi ding.
• Great Britain leh Irish tuikulh (island) kikal-a gamgi ah custom borders a om ding hi.

MABAN HUN AH BANG PIANG DING

MPs ten Brexit deal thak a gup leh:

• Oct. 31 in Brexit legislation (thukham) a bawl ding uh kisam teitei hi. Oct. 31 in Brexit legislation MPs ten a bawl man kei uh leh UK in EU kiangah a hun a zakaisakna (delay) dingin a nget kisam ding hi. Brexit legislation a kibawl theih leh Oct. 31 ciangin Brexit piang thei bek ding hi. MPs ten Brexit legislation a nial uh leh thukimna om lo "No Brexit deal" piang ding cihna hi.

MPs ten Brexit deal a nial uh leh:

• Johnson' government in EU kiangah Brexit hun zekaisakna dingin January 31, 2020 dong a nget loh kiphamawh ding hi. EU in January 31, 2020 dong Brexit process zekaisakna ding Johnson' government ngetna a nialsak leh "No Brexit deal" piang ding hi. EU in a hun zekaisakna dingin ngetna thukimpih UK in EU tawh thukimna dang a neih theihna dingin kihona pan kik ding uh a, thukimna a neih theih kei uh leh thukimna om lo "No Brexit deal" mah piang kik veve ding cihna suak hi.

Kua ten bang gen:

Opposition Labour Party makai Jeremy Corbyn in, "Brexit deal thak ah kilungkim lo ahih manin tua bangin a kipaihpih leh Brexit deal latest kician takin ka et lai ding uh a kisap hangin deih loin vote kikhia ding hi," ci hi. Johnson' government gum DUP in a statement bawlna ah, "Hih geelna ahih kei leh sawmna (Johnson' new Brexit deal) pen ko ngaihsutna hilo a, Northern Ireland economic hamphatna leh phattuamna ding a om loh banah ka gam uh a kipumkhatna neusak hi," ci hi.

Source: Agence France-Presse

@ Thang Khan Lian #ZUNs