POLITICAL SOCIETY AH DICTATORSHIP TAWH KIMAKAIHNA AH MIPITE THUNEIHNA OM LO HI

POLITICAL SOCIETY AH DICTATORSHIP TAWH KIMAKAIHNA AH MIPITE THUNEIHNA OM LO HI

Ei pawl in criticism [to evaluate (something), and judge its merits and faults or to find fault] kammal pen gensia (gossip or backbite) kici suk pong pah in, makaite langpang leh Pasian' sathau nilhte gensia ci suk pah ngeingai, tua tawh hun sa loin minam langpang ci suk thuah in ngawh zaw lai hi zen hang. Tua zah liang na pah loin na khatpeub lim takin bangci ciang hiam cih theihnadinga sittelna; a hoihna leh a siatna khensatna tawh i tehna panin i gen thu ahih manin gensiatna hilo hi. Gensia i cih ciangin ahih lohna teng phuahtawh tawh behlap in, mindaisakna ding ngimna tawh i gente gensiatna kici bek hi.

Makai kicite genbaang vet lo ding sa-in huih mut ding nangawn phal loin i pumphat ngaungau nuam man leh i pumgup manin makaite kicite in nasep ding leh khialh khak ding thudon lo uh a, pumgup leh pumphatna bek mah ngah ding na lamen den uh hi. Hih thu hangin political movement pen zawngkhal den in, khelbai den a, makai kicite in power bek deih in mawhpuakna (responsibility & accountability) la nuam lo uh ahih manin minam dangte khantohna eng mahmah napi hangin a gal etet minamte kisuak hi.

Gentehna dingin lampi thak bawl le-uh zan khat thu in tui in a taihsiat kei leh ak in thai sia a (uang gen deuh leng), tua ahih kei leh kum khat nangawn kikhom zo lo hi. Sanginn leh lei bawl uh a, a kizat ma-in sia man hi cih bang tam mahmah hi.

"Great power comes with great responsibility," kici napi power deih kitam napi responsibility deih lo makai kihau lua lai ahih manin namdangte sangin i khantohna tuantual zaw hi. I kilaih kei leh a tualtual a tualniam den ding minamte ihi hi. Political society leh democracy ah criticism, critical ideas leh opinion leh oofiocial policy hoih lo i sakte langpanna aw (dissident voice) a om theih mateng makai kicite ganhing bangin phengtat ngam den uh a, power bek len in responsibly leh accountability panin pengkhia in suakta den uh hi.

Criticism, critical ideas leh dissident voice pen democracy adingin "safety valve" hi a, a om lohna mun ah safety valve kithuah lo cooker bangin a sat luat ciangin political society puakkham baih mahmah hi. Critical idea or voice leh dissenting voice om lohna political society ah a nuai-a naucing nupi in a mobile bek buaipih in a tate a thudon loh mah bangin makai kicite in power bek buaipih in mawhpuakna thudon vet loin responsibility leh accountability thudon vet lo uh ahih manin a nasepna un muibun thei ngei lo a, tukpeng (football) match referee om lo banga kimawlna politics suak hi.

Tua bang political society ah a to (master) mipite in thuneihna nei lo (a vote nangawn uh-ah thuneihna nei lo) uh a, mipite nasem ahih kei silate leh palai nasem dingte (public servants and representatives) tengin political society sung kumpi gilo bangin amau deihna bang bekin uk in paipih uh a, khantohna tawh gam leh minam kigamla semsem sak uh a, a haute bek hau semsem in, a zawngte neihsun leh political rights nangawn aana tawh kisuhsak lai hi.

Critical idea neih manin makaite thah sawm, zumkong mangkong ah thusia bawl in va lehhek gawp pah ihih mateng makaite langpang kici thei lo hi. Democracy leh political society cidamna ding leh a man leh man lo, a hoih leh hoih lo kankuat theihna ding leh telkak theihna dingin critical idea leh critical voice a om kisam hi. Dictatorship banga gam uk nuamte bek in ngaihsutna tuam neite mudah in zadah uh hi.

A hoih ding leh ngimna khatpeuh i neih ciangin a langpang ding a om kei leh i geelna leh ngimna dal tak lo, langpang tham lo hi cihna hi. Hong langpangte gal bawl leh muhdah pah ding hi loin i ngimna hoih hi ci-in hong langpanna khial hi cih a lak theite muibun leh lawhcing uh a, pawl ding hau in a support base uh kip den zo bek hi.

A nuai-a nupi in a ta kep dan pen ama adingin vai veng mahmah kha ding hi. Ahih hangin naungek kep zia dinga kilawm hilo ahih manin a kilawm lohna gen (criticised) loh phamawh hi. Tua loin ama'n tua banga nau kep pen zongsang ding hi. Criticism om loin kibawlphatna leh kipuahphatna piang thei lo hi. Political thinkers tampite political thories tuamtuamte ngaihsutna tuamtuam nei ten criticism a bawlsak ciangin hiam semsem in, muibun semsem a, hong hoih semsem zo pan hi bek hi.

@ Thang Khan Lian #ZUNs