EI LEH EI KIKHEMNA LEH A MAWKNAPI NUNTAKNA

EI LEH EI KIKHEMNA LEH A MAWKNAPI NUNTAKNA

Pasian thu leh biakna thu lamsang a hahkat diak kisa-in pulpit tung panin i kiko lualua in, Pasian ka it hi ci-in i kambeem tawh gawlgui dawk lela liangin awng lala in, gammial adingin neih leh lamh, sawm-ah-khat, sum leh paai piakkhiatna hahkat mahmah in, missionary a tul a then i sawlkhiat ziahziah zawh hangin....

I muh theih loh Pasian it i kicih pong hangin i muh theih ama bawlsa mihingte itna nei loin, minam dangte muhdahna, deidantuamna i neih a, minam dangte kibawlsiatna, kinuainehna, hon buanna (gang rape), minam khat kisiansuahna (ethnic cleansing), minam khat lom thahna (genocide) cihte i gup ngam lai teng i Pasian itna leh i Khristian thu upna a mawknapi taktak hi a, Pasian' bawlsa minam dangte human rights kipalsatsakna neumuhsakin i a rights uh suksak lai teng thu-um i kicih ngam pong hangin ei leh ei a kikhemkhem tawm i hi hi.

Pilna siamna degree thuap tampi ngah liapluap in, i pilna ngahte midangte phattuampih theih dingin i zatkhiat kei a, i pau leh lai nangawn a man in pau thei loin, a man in gawm thei lo leh gelh thei loin i om lai teng pen pil kisa-in ciim kisa-in tangthu, khangthu, tadensa (news) leh thupaih (articles) om khempeuh bal sial nuai bangin mal ziahziah in i pum theih leh lotngah pong hangin i mi, i sate leh i nam itna i neih kei leh a mawknapi i hi a, lo lai-a kimanna ding nei lo a om khukkhiat zawh loh khaici teng a deepsak lel suangtumpi tawh i kilamdang lua kei hi.

Pilna thuap tampi ngah man leh khut siam leh khuak zat siam manin sepna bawlna kician ngah in, khasum zatkhiat khit zawh loh ding sum, neih leh lamh a dim a ha in nei liapluap in, nei kisa lam kisa-in taih innpi dawl sangpipi leh matawpi tawh i kitun luapluap hangin i mihpihte itna i neih kei leh a mawknapi i hi hi.

Khawhsa an kham zo lo-a gilkial dangtak mite, pilna siamna sin nuam mahmah napi sinna ding nei zo lote, liam leh bai, nat leh sat tuah ciangin kikep kikhoina ding nei zo lote, mizawng daipamte, meigong tagah lubawkte, khutdawh, mittawte leh khel baite huh loin i neihsa tawh gilmul vang liangin taih inn dawl sangpipi ah tengin i kiphaak vak a, huhnopna lungsim nei loin hehpih beek i neih kei leh sawnsawn lai leh i Khristian hihna leh i thu-upna a mawknapi taktak ahi hi.

Gam leh minam it pen kineih in, midangte' gam leh minam itna neumuhsakin, simmawh bawl leh langbawl thuah zaw lai-in, ngaihsutna tuamtuam neite kipumkhat theihna ding, tokhom (platform) khat ah a din' khawm theihna ding ngaihsun loin muh theih leh phattuampih ding sepkhiatna kician bangmah lah lopi-in i mipihte phil tang bangin i thehzak lai teng i minam itna pen a mawkna ahi hi.

Biakna leh gam leh minam makai khat hi buang napi pawlpi sung leh gam leh minam sunga a nei leh a zawngte khentuambawl in, lamkhial lamsam, bah leh nguite lam man lak loin, tha piak sawm loin, a puk mite i phot sawm kei a, lamkhial mite galbawl in, vuak leh thah beh zaw lai-in, a puk mite i tuatcil beh lai teng leh khamangthang mat beh loin minam leh gam adingin kilaihna bangmah i piansak tuan kei leh a mawknapi i hi hi.

Muh theih ding leh phattuampih theih ding vision lah hi bek loin vision hoih nono bek mah otpih thapai in "long-term policy" cih bek tawh i otot lai teng pen i tot ngil khitsa lampi mah ah i pawlpi mite leh i minam a paihpih ngaungau den hi lel ahih manin huihpi nung delh tawh kilamdanna om lo a, sunmang vive hi lel ahih manin a mawknapi ahi hi. Sazuk in kimanna ding nei lo a ki a puak ngaungau tawh i makai za kimanna ding nei loin a pua ngaungau i hi bek hi.

Mi khempeuh a si ding vive leh sih ding ngak vive kihi napi-in, a nungta lai mihingte lakah a nungta taktak mi kitam het lo hi. Sepkhiatna tawh kithuah lo vision hoih nonote leh sep ding bawl dinga kamciamna khat khit khat ciam napi tangtunsak lohna pen ei leh ei kikhemna leh a mawknapi taktak ahi hi.

🖋️Thang Khan Lian