ZOMI LEH GAMVAI NGAIHSUTNA KUPNA TAWMNO KHAT

ZOMI LEH GAMVAI NGAIHSUTNA KUPNA TAWMNO KHAT

I Zomi makai ten gam leh minam vai leh maban ding political talks kici kumpi tawh kihona neinei napi uh a kihona ua agenda bang teng hiam, a kihona uh-ah agenda bang teng thukimna piang cih lah uke ake cih ding mahmah nei ngei lo uh hi. Ahih kei leh agenda nei lopi a kimuhkhawmna va nei kik pah uh a, zu leh sa, niangtui dawnkhawmna leh party bawlna hun ahih kei leh zan khat zan nih sung Five Star hotel ah baibek thauna hun dinga va zang pak uh hiam cih theih nuam huai mahmah ta hi. Tua ahih kei le lah i Zomi movement leh kipawlna pen aituam leh bawng khat sung bek kipawlna leh meetna ding ahih man bek-a mipi zak ding thu kigenkhia ngei lo ai tam cih zong ngaihsut thamhuai pian ta hi.

Koi tan kitung ta a, koi tan kalsuan ding kisam lai cih khawng social media zang lo ki-om lo ahih manin khahkhia zel leng tha ngah huai mahmah ding hi. Tua dan lah om lo a pan leh a kam keek zek om leh makai leh gam langpang ci suk pah pong. Tua bang i maban ding ahih leh zong limci kei tak.

Mipite tawh thu kikumkhawm dialdial (engagement) cih lah om lo, mipite gupna lah deih. Propaganda beek tawh hong lungkimsakna ding beek hong gen zel le uh a lawp heha pong leh thangah dep kitam mahmah ding hi ven maw? Na sum omna ah na lungsim zong om ding hi kici ahih manin i gamvai koi ci kalsuan koi tan tung koi tan sep ding om lai cih theih leh zak ding om thei zel leh public funds pia mipite adingin lungnuamtuam mahmah ding hi. Tua bang om lo bel ek siakna dinga sum piapia mipite bang den ding hi.

Tua ahih kei leh movement khat om buang sam a spokesman khat beek tunna ciang, sep ding om laite gen zel ding a neih lo uh hiam cih zong ngaihsut tham veve hi. Makai ten a kampi uh gam itna leh minam itna a gengen bangun gam leh minam adingin a sepkhiatsate leh sep lai dingte hong gen zel le uh lunggulhhuai mahmah hi. Movement khatin amau website ding bawl uh hen la, tua panin thu khahkhia zel le uh public opinion leh public support nasia sem leh hoih sem piang ding a, movement kalsuanna zong muibun zaw ding hi. Transparency om lo a nasep pen public support sawt ngah zo lo hi.

Ciamnuih banga napi a man mahmah thu: Politician i cihte gupna a ngah ma uh leh kiteel ma-in na khut hong lente hi a, gupna a ngah khit uh leh a kiteelcing khit ciangin a khut tawh na muanngamna dingin hong sawi/pei gawpte hi.

Gelh khialh gen val om leh kimaisak ni. Awlmawhna leh veina lianpi tawh.

-Thang Khan Lian