TRUMP IN THUKHENNA INN "KITAMKHAM IN THUMAN LO HI" CI
Jan. 11, 2018: President Donald Trump in Obama administration hun-a kum cing lo naupang gambeelte lak lutna dingin Deferred Action for Childhood Arrival program (DREAM Act ahih kei leh Dream Programme) kici tawh US lut tul tampite a gam uh-ah puakkik ding ci-in DACA a phiat American court system in zanhal in dalsak ahih manin zan in American court system phin kik a, "Court (thukhenna inn) kitamkham a, thuman lo hi," (broken and unfair) hi ci hi.
"9th Circuit ah ka policy langpangte tai uh a, (DACA kihelin) court sangzaw in 9th Circuit thukhenna a lehhei (reversed) ma gualzo den hi. Hih thu hangin i Court System uh-a sem khempeuh 'kitamkham in thuman lo' uh hi cih kilang hi," ci-in a tweeted ah Trump in khahkhia hi. Trump in a tweeted na-ah American Court min a gen loh hangin zanhal in 9th Circuit Court of Appeals in a statement ah Trump in Deferred Action for Childhood Arrivals program a phiat a dalna thu a pulakkhiat manin American Court System tona a bawl kik ahi hi. San Francisco a US District Judge William Alsup in thukhenna inn ah DACA phiat ding leh phiat loh ding kinialna; kihekna thubuai (lawsuit) a ven' mateng DACA kiphiat loin kizang lai ding hi ci-in pulak hi.
Trump in Obama-era program DACA September in kiphiat hi ci-in a pulak hangin a kiphiatna dingin thukham (legislation) suah theihna dingin congressional in action a lakna ding kha guk sung kidiah hi. US gam-a DACA tawh phalna lai nei lo-a gambeeel (undocumented migrants) lut mi 800,000 a gam uh-ah puak kik ding leh puak kik loh ding vai March 5 ciangin Congress in thukhensatna la ding a, puak kik loh dingin thukhensatna a bawl leh Trump in gambeelte a puak kikna dingin a policy lawhsapna suak kik ding hi. Trump in DACA a phiatna hangin a thukhensatna US states tuamtuam, mimal leh kipawlna (groups) tuamtuam ten thukhenna inn ah hek uh hi.
US Court in Trump' thukhensatna a dal pen Trump leh Congress makai ten gambeelte puak kik ding maw puak kik loh ding cih leh border security khauhsakna ding leh kulh cian'na dingin funds zat ding zah geelna leh kulh cian' ding leh cian' loh ding vai kikangtuahna nasia takin a neih laitak uh-a thupiang ahi hi. Congress makaite tawh Trump in kimuhkhawmna a neih khit un White House in, "Trump leh Congress makai ten puahphatna (reforms) poimawhna mun li-ah: border security, chain migration, visa lottery leh Deferred Action for Childhood Arrivals policy ah thukimna nei uh hi," ci-in gen hi.
Zan zinsang in in White House press secretary Sarah Huckabee Sanders in, "Court' thukhenna pen Trump leh Congress makai ten thukimna a neih khit un DACA phiat ding Court in dal ahih manin 'thangpaihhuai'' hi," gen hi. Trump in 2016 US presidential election pen gambeel leh peemtate US ah a peemna (immigration) dal dingin kamciamna a bawlna hangin White House ah tutna a ngahna khat suaksak hi. DACA phiat ding vai tu kal sung teng US Court in a dal manin Trump in a thukhenna dokkik a, El Savador panin gambeel 200,000 lutsak ding phalna pia kik themthum hi.
Tua loin Trump' ciamna khat US conservatives-te gupna a ngahna pen US gam-a neih kibang kiteenna leh naungek suksiatna phalna (gay marriage and abortion) phiat ding cih leh US gam ah Christian biakna hatsak kik ding cih hi napi a kamciamna US Constitution First Amendment palsat ahih manin neih kibang kiteen theihna ding, naungek sukkiat theihna ding, biakna ut bangbang suakta tak-a zuih theihna ding leh Christian la leh thungetna sanginn, university, assembly leh institution tuamtuam a ngen leh sa nuam lote nawh teiteite thukhenna zum ah khiat theihna dingin a kipsakna dingin May 4, 2017 in a President let khit kha li zong cing nai loin a kamciamna peelna dingin executive order suaikai hi.
Feb. 11, 2017 in Trump in Muslim gambeelte galtaite dalna dingin "Travel Ban" policy executive order suaikaih 9th Circuit Court in a dal manin Court "kitamkham" hi na ci ngei a, hih bang kammal a zatna a nih veina hita hi. US Constitution First Amendment a "press freedom" palsat in mediate tungah gal na pulak a, CNN boycott ding, NBC leh Comcast a executives-te tawpsak ding ci-in na vau a, mediate Fake news hi ci hi.
#My take: Trump zat kammal "Fake news" cih Trump mitdel sialkhau let a US Constitution zahtak lo conservatives-te bek hilo in Zomi sunga Trump pumgup tengin um mahmah in tua kammal nak zat mahmah uh hi. US kiteelna ah Russia tawh kigullukna thukanna nei US intelligence agencies teng zong US gam langpangin a ngawh banah a muanlahna thu gen a, hih ngawhna pen tangthu phuahtawm leh fake news ci hi. US Court, intelligence agencies leh media teng a gal lianpi suaksak ahih manin nuclear bomb a khiatkhum bak ding baih kha ding hi. 
Source: Reuters; CNBC; Politico; Boston Globe; AOL; NDTV; The Daily Mail; The Hindu; NBC News; AXIOS
@Thang Khan Lian #ZUNs
No comments:
Post a Comment