ISREAL PM NATANYAHU' TAPA IN SOCIAL MEDIA A ZATNA HANGIN MINSIATNA LEH ELNA THUAK

ISREAL PM NATANYAHU' TAPA IN SOCIAL MEDIA A ZATNA HANGIN MINSIATNA LEH ELNA THUAK

Aug. 4, 2017: Bulletproof Israel Prime Minister a kici liang Benjamin Netanyahu in golhgukna (bribery), zuau leh thuman loin sumngahna (fraud) leh a kimuanna palsatna (breaches of trust) ngawhna tampi a tuak manin a gamtatna thukanna tampi kinei a, hih thu hangin Prime Minister kitawp dingin nawhna tuak mun pian ta a, a sepna a taanlawh ding dengdelsak tuam mahmah hi. Netanyahu' tapa Yair in social media zangin a gamtatna hangin a pa panmun dengdelsak tuam mahmah hi.

July 30 in Israeli democracy think tank Molad a kahiang Sixty One Project ah laipaih "5 Facts About Our National Son" kici ah Netanyahu' tapa kum 26 mi Yair in Israel siah piate sum zangin nuntakna nuam takin phengzat in, gamdang ah khualzin (vacations) in zinkhia mun mahmah a, a pa a ut bangin thuzawh ding hanciam in, Arab mite business-te khak (boycott) dingin a pa hanthawn hi cih tuang hi. Tua banah Yair in a pa media lam tawh kisai ah thuzawh zo mahmah a, 2016 in Palestine mi thau tawi lo kap liam in, lei ah a tuk khit nungin thau tawh a kap gawp manin ngawhna tuak Israel Defence Force (IDF) galkap Elor Azaria tungah na dinna khauhsak kei in ci-in a pa thukhensat ding thuzawh hi cih zong tuang hi.

Sixty One Project in Yair' social media ah a post pawl khat tungsak a, a social media post ah Yair in Arab sumbawlte "zawltate (bangmah a kimang lo, manna beite - ''bastards") leh left-wing thunei ten Arab mite thukham a palsatna a kimuhmawh bawl hi ci-in a ngawhna kammal hoih lote tuangsak hi. Sixty One Project in Yair in ski vacations a paina tampi ah sum beite pen Israel Defense Ministry in siksak a, a sum siksakte pen bankrolled ah a val vive hi ci hi. Yair Netanyahu a khualzinnate ah Australian sumbawlmi James Packer' neihsate (properties) ah tung mun mahmah ahih manin hih thu hangin zong a pa (Netanyahu) in James Parker tung, Parker' lawmte leh a sumbawlpihte tungah letsong tampi pia hi cih ngawhna a om manin Netanyahu in thukanna (investigations) tuah lawh hi cih zong tuang hi.

Yair gamtatna hangin a pa'n thukanna a tuahnate August 1 ciangin Yair in dawnna nei ding hi. Yair in a Facebook Post ah a kituak leh kilawm lopi in kei bek hong kingawhtuam ahih manin Sixty One Project-te zuau ka dawng kei ding hi ci hi. Tua ban ah Yair in Project Sixty One pen ngongtatna tawh nakpi a kikhel ding deih (radical), Zionist langpang kipawlna hi a, Foundation for the Destruction of Israel [Hebrew pau in bel New Israel Fund ci-in kilet hi] leh European Union ten sum tawh huhna a piak hi ci-in ngawh hi. Yair in a social media ah, "No lamte hoih si uh teh... a lungluthuai lam bek uk in, mi dawi suaksak in, mi minsiatna ding bawl in, red line palsat uh teh," cih tuangsak hi. Tua a Facebook post a tawpna emojis nih tawh beisak a, ek lim, khutzung lai (pasalte zahmawh lahna) lim tuangsak hi. Khutzung laita pen leh ek lim emoji 💩a lahna hang pen Jerusalem park ah numei khat in na ui ek hahsiang in ci-in sawl a, tua nu a khutlai a lahna hangin ngawhna thanghuai (scandal) tuak a, tua thupiang gentehna dingin a zat hi.

Project Sixty One in Yair kiangah na Facebook post phiat in la, maisakna na nget kei leh mi minsiatsakna ngawhna (defamation lawsuit) tuak in, thu hong kibawl ding hi ci-in zasak hi. "Na heh a, Israel galte tung panin huhna sum ka ngahna thu uh thumam tawh lah theihna ding (evidence) bangmah share ding na nei kei hi. Nang gamtatna hangin Israel Prime Minister tungah thukhenna inn ah ngawhna hek behna tuak in, na pa vangik puakgik suan beh nuam na hiam? Maisakna ngen in la, na post phiat in. Tua hi leh Israel in buaina kuang (burning issues) a tuahte leh gam ukpa nekgukna lam bek kibuaipih thei ding hi," ci-in Project Sixty One in a group uh-ah tuangsak uh hi.

Ahih hangin Nair in a post phiatmang nai lo a, maisakna zong ngen nai lo hi. A thu post pen ciamnuih bawlna leh nuih suak huaina (comic) suak a bat hangin a pa' thukham buaina tuahsa khit nung vangik ding behlap zaw hi. Netanyahu pen innkuan it mi (loving family man) hi ci-in in gammi ten ngaihsun in, tua hangin zong kiteelna ah gualzawhna a ngahna ding lampi sial hi. Yair pen a suah cil a kipan leh kum 13-19 (teens) ahih a kipanin tu dong a gamtatnate a nuihzakhuai leh mawhsakna ding thu tampi media ah kiciamteh (documented) a dim a ha in om a, Israel gammi ten siah piate zangin a ut bangbangin sum pheng zat in playboy lifestyle bangin amah leh a lawmte gamtatna a sum beite siah piate sum pheng zat hi ci-a lungkim lo tam mahmah ta hi. Gamdang ah a zinkhiat loh ciangin zong kumpi car tampipi zangin bodyguard-te kicingsak a, bars leh clubs ah hawh in a ut bangbangin phengtat hi.

Source: Sputnik
@Thang Khan Lian