UK MILITARY THINK TANK TEN RUSSIA IN NITAK LAM KHAT SUNGIN UK HONG SUSIA ZO DING HI CIH THUKIM 

April 1, 2017: UKte' defense lamsang ngaihsutna leh geelna siam nei (think tank) Centre for Historical Analysis and Conflict Research (CHACR) ten "UK in a thahat mahmah gal (belligerent foe) (Russia a cihna) pen dona dingin thahatna kinei lo ahih manin galdona khatpeuh ah NATO tungah i kingak kul hi," ci hi. CHACR kicite pen UK galkapbu pension khinsate leh galkap ulian len laite hi a, ni nih sung meeting a neih khit un a muhna uh suaksak (published) uh hi a, "UK pen 2010 kum lai tawh tehin khutguak (hollow out) tawh kibanga, galdona dingin i thahatna teng (fighting forces) tawh Russia do hi leng Russia in nitak lam/sun bei khit ni tum ma (afternoon) khat in hong nulmang (wipe out) ding hi," ci hi.

CHACR pen Sandhurst officer acedamy pansan hi a, laisiamte omna leh kinialna munpi khat ahi hi. CHARC ten ni nih sung kimuhkhawmna a neihna ua a muhna bang uh a gelh (authors) ten Russia kihtakhuai zia a gen hangun Russia pen UK adingin gamdangte lam panin hong sim dingin (direct attack) lauhuai loin a muanmawhhuai pen hilo hi. Russia pen UK sim dingin a muanmawhhuai pen gam ahih loh hangin UK pen NATO member khat hi a, NATO a gup manin Russia in hong sim ngei lo ding hi cihna thu om lo hi ci-in CHACR laigelh ten a paper published uh-ah tuangsak uh hi.

CHARC in a paper ah British Army ten gal tuak vat hi leh galdo zawhna dingin thahatna nei mah uh hiam cih pen dotna lianpi hi a, UK in net manpower leh kinetic force thahat zawhna (capacity) nei mah hiam cih a dawnna pen "Nei lo" cih hi a, British Army-te budget pen ni dang tawh tehin tu lianin a tawmpen hun hi a, a budget uh tam kikhiamsak lua hi ci hi. UK galkapte budget pen May 2010 in David Cameroon in party tuamtuam tawh kipawl in coalition government hong bawl khit nungin British galkapte, galkap phazah leh vanzatte uh puahna dingin budget tampi khiam suk hong kipan hi. Ministry of Defense in a ciamtehna ah UK in full-time galkap 87,000 leh galkap zat dinga kimansa a kikoih (reservists) 100,000 bek nei hi ci hi. UK full-time leh reservist galkap kigawm sangin Russia' full-time galkap (active personnel) tamzaw a, 770,000 pha hi. Tua banah reservists galkap 2,000,000 bang neih beh lai hi. Hih bangin galkap bek tehkak leng zong UK galdona lamsang ah a thanemna hi pah hi ci-in CHARC in ci hi.

Tua loin UK in galdona phual (theater of war) ah galkapte a puakna ding kicing nei lo a, a neihsa mawtaw, vanleng leh teembaw (fleet) teng tawh galkap brigades thum - galkap 5,000 kiim bek puakna ding nei hi. Tua ahih manin UK in chartered or commandeered commercial ships leh aircraft (mi puakna dinga kizang teembaw leh vanleng)-te galkap puakna dingin a zat kul hi. Tua banah UK in nisuahna lam panin a kidalna dingin air defense kicing nei lo a, leitunga military budget tam zang pen ngana in pang a, UK military budget pen US$9 billion bek ahi hi.

Tua bek tham loin Britain' armed forces leh mipi ten gamdang tawh galkap lamsang ah kipawl (military alliances) uh ahih manin amau bekin galdo (unilateral war) sawm ngei lo uh hi ci-in defense consultant Nick Watts in ci hi. "UK pen NATO member sungah a lian pen pawl ahih hangin NATO puahna dinga sum kisam 2% bek kipia hi. France in ei sangin galkap adingin tawm beisak zaw lai hi. Tua ahih manin UK (Westminster) leh France (White Hall) in bang kisam hiam cih ngaihsut kul ta hi. Tua banah zing cianga galdona dingin UK in thahatna kinei lo hi," ci-in Nick Watts in Sputnik newste kiangah ci hi.

Nick Watts in UK in galkap thahatna bek hilo in galkap kicing leh nuclear dalna ding kicing nei vet lo hi. US President in NATO puahna dingin sumbeite NATO member dang ten tawm sik lua in, US in a vangik teng pua den a cih hangin NATO member hih theihna dinga kisam pen NATO' article nga ten hong pia ahih manin Trump thugen pen lunghimawh tham ding hilo hi ci hi. UK a opposition makai Jeremy Corbyn in NATO ah UK' din'na a kicingin gen khin zo a, lunghimawhna ding om nawn lo hi ci hi.

Hih bangin Russiate galkap thahatna tawh kisai senior UK military ulian ten a pulakkhiat masakna uh hilo hi. August 2016 in zong report kipholak khia (leaked report) in Russia in galvan lamsang ah thahatna leh galdona dingin galphual a zat ding galvan hoih nono (high-tech battlefield techniques) hoih neih lua hi ci-in na suaksak hi. Ahih hangin Russia ulian ten bel UK tawh kido ding vai ngaihsut in zong kinei ngei lo hi ci uh hi. January 19 in zong UK in Russia tawh kido khak vat leh ci-in galdona tanks-te Channel Tunnel ah galdo kisinna a neih in taisak uh hi. Hih thu tawh kisai Russia colonel pension khatin hih banga upmawhna pen "man lo" ((spurious) hi ci hi.

Source: Sputnik
UK Military Think Tank Admits Russia Could Destroy Forces 'in an Afternoon'
https://sputniknews.com/…/201701231049920546-uk-military-c…/
A tei: Thang Khan Lian