TRUMP IN SYRIA KUMPI LAIH DING NGIM IN NEI LO AHIH MANIN US-TE' KUM 16 GEELNA BEISAK

TRUMP IN SYRIA KUMPI LAIH DING NGIM IN NEI LO AHIH MANIN US-TE' KUM 16 GEELNA BEISAK

April 1, 2017: US President Donald Trump in Syria President Bashar Assad laih dingin ngimna nei lo ci-in thukhensatna nei ahih manin US in kum 16 sung Middle East gam tuamtuam ah kumpi laih (regime change) ding a geelna beisak hi ci-in US Army Major pension Todd Pierce in Sputnik newste kiangah gen hi. Zan in White House spokesperson Sean Spicer in US in Bashar Assad tawh kisai politics diktak (political reality) tawh kisai san'sak in, IS (Daesh)-te beisakna ding ngim in a neih ding kisam hi ci-in gen hi.

“US policy pen WikiLeaks in a cih bangin kum 2001 in a zat uh, Richard Perle leh Michael Ledeen in Syria ah buaina lianpen (greatest chaos) leh siatna lianpi (catastrophe) tawh mihing tampi sihsakna piansak ding neoconservative fascist modeled plan a neih uh kibang hi," ci-in Todd Pierce in ci hi. US strategy pen al-Qaeda ten US a suam uh September 11, 2001, or 9/11 (mi 3,000 phial si) khit nung Middle East ah kumpi laih ding cih geelna hi a, Bush administration in Middle East gam sagihte ah kumpi laih gawp ding ngimna na nei hi ci-in gen beh hi. US policy a sia lam in lawhcing mahmah a, Syria gam-a dongtuak ten Europe gam cih loh taina ding nei lo uh a, Europe gamah galtai a tam luat manin Europe gamte politics cih mahin ka muh ngei loh siatna lianpi tuak lawh hi ci-in gen beh lai hi.

Todd Pierce in President Donald Trump in Syria tawh kisai US strategy (kumpi laihna ding leh Arab kumpi gamte linglawngsak gawp ding) ngimna a tawpsan pen a letkip zom leh phat ding leh pahtak dingin kisam hi ci hi. US in Assad' ukna pen a haihuai mahmah galkap thahatna tawh ngim dingin geelna (fanatical militaristic scheme) khawlsan in, Syria buaina ven'sak sawm takpi ahih leh leitung bupin a husan uh nuam tuam ding hi ci-in gen beh hi. Ahih hangin hih bangin Syria kumpi laihna ding tangkopihna (campaign) in geelna nei khempeuh Netherlands gam-a International Court of Justice ah thukhenna mai-ah dinsak ding hi ci-in Todd Pierce in kalh hi. Mihing tungah siatna ding geelna neihna a US policy a kigolh khempeuh gal omna mun-a thukham palsat (war criminals) hi ci-in Serbian President lui Slobodan Milosevic dan a kipiak bangin tuate zong dan piak ding kisam lai hi ci-in gen beh hi.

#Behlapna: US in democracy leh human rights agenda tangkopih in WoD galvan nei lopi Iraq kumpi Saddam a sim bek hilo in Syria kumpi zong mipi tamzaw deihna tawh kiteelcing hi napi-in ama deih banga gam-uk (dictatorship) ci [pongin laih ding na hanciam hi. US in hih bangin paulap zangin mi khut a gul matna dingin Syrian rebels tuamtuam galvan, sum leh training pia-in zang hi. US in a ngim bangin Assad ukna tuk dek tak a, tua lai takin Sept. 30, 2016 in Russia in Syria President Assad hong huh ciangin USte geelna hut mut khiat ansi leeng suak ziau hi. Trump in 2016 in US presidential election campaign a bawl cil a kipanin USte ngian leh ngimna khawlsan ding na tangkopih pah a, a tangkopihna banga gamta suak hi.

US Department of State diplomat lui Anthony Salvia in hih bangin Trump in US policy laih in, Syria kumpi laih ding vai a khawlsan pen Democrats leh Republicans-te a lungkim lo hon khat a om hangin Trump in US policy laih ding hi ci-in vote khia ten a vote uh a piakna bangun kilaihna piangsak hi. Assad in Syria tualgal kipat cil pan tu dong kum guk sungin Syria gam-a Christian hum bit hi ci-in gen hi.

Source: Sputnik
A tei: Thang Khan Lian @ Zomi United News (ZUNs)