SAI LEH VOK TANGTHU TOM

SAI LEH VOK TANGTHU TOM

Ni khat sai khat lui-ah kisil a, lim takin a kisilsiang sitset khit ciangin gam lak lam manawh dingin lampi ah pai valval hi. Tua sai kisiangtho sak mahmah lampi ah hong pai hiathiat lai-in lei (bridge) kan dingin a kithawi lai takin thakhat thu-in buan lak-a kibuai khin phet vok nin mahmah leh uih mahmah a thuah tua sai lam mai lam manawh in hong kising phei thalthal in, hong tai phei thulthul hi.

Sai in tua vok a muh ciangin lipkhap lua ahih manin thakhat thu-in lam nawl-ah kihem khia in, tua vok paisak hi. Tua vok a pai khit teh a lam pai hong zom leuleu hi.

Tua vok nit leh uih a thuah in a lawmte kiangah hih thupiang khempeuh gen in, kisialpih mahmah a, "Hong en dih vuau guai! Bangzah takin gol in, vanglian in kihtakhuai ka hi hiam? Den in sai gol mahmah khat tawh lampi a ka kituak kha uh hi. Sai in hong kihta ahih manin lampi panin lam nawl-ah kihem khia in, kei paina ding lampi hong awn a, lampi hong hon'sak hi," ci-in kiphat dep hi.

Vok in tua bangin a lawmte kiangah tua thupiang khempeuh leh a kiphatna thu a genna sai dang ten zong a sawt loin na za kha uh ahih manin maizum mahmah uh hi. Tua leh sai khempeuh in emergency committee khat sam khawmin tua vok lampi a awn sai thusitna leh tua thupiang khempeuh dong uh hi. Vok lampi a awn sai in tua thupiang khempeuh thugen telna nui kawm in hih bangin hong gen hi, "Liang tak uh ciai lawmte aw, tua vok lel tak ka mawl tawh vik leng lengmang ziau ding a, tua loin zong ka khe tawh sik leh a gil lot in a ek teh liangin si ding hi. A man takin cileng tua vok pen a nin bek hilo-in uih mahmah tuah zaw lai ahih manin kei pen a kisil siang sitsit khin sa-in lam pai ka hi a, kibuah/kininsak nuam lo ka hih manin lampi panin kihem khia in ka paisak hi zaw hi," ci hi.

Vok bangin gualzo na kisa kha pong ngei ngei hiam? Bangci bangin gualzawhna ngah ngah na hi hiam cih lim takin na kingaihsun ngei hiam? Na thuman loh man, na lip khaphuai luat man peuh in mi dang ten na ut bangin hong awng saksak kha ngei hiam? Na buah luat man leh na thuman loh luat manin na ut bangbangin na gamtat hangin mi dang ten hong kimuhmawh bawl in hong kihep khiatsan ngei hiam? Na gualzawhzia leh gualzawhna ngahzia lim takin kisittel pha kik in. Pasian in zong Satan a ut bangbangin a gamtat theihna dingin thukhenna ni a tun' ma dong a khahkhong lamtak phawk gige in.