RUSSIA ICC PANIN KIPHEL KHIA KIK TA DING

RUSSIA ICC PANIN KIPHEL KHIA KIK TA DING

Nov. 16, 2016: Russian President Vladimir Putin in leitunga a kibuapihpih mahmah gal om ciangin thukham palsat, mi a lom-a kithahna leh mihing tunga thukham palsat-a gamtatna (war crimes, genocide and crimes against humanity) thubuaite ah thukhen International Criminal Court (ICC) panin a kiphel khiatna dingin thukhenna/thupiakna (decree) suai kai ta hi. ICC pen Hague pansan hi a, Russia in ICC ah a kihel theihna dingin member dingin 2000 suai na kai a, ahih hangin ICC Court kipsak (ratify) lo hi.

Putin in thukhenna/thupiakna (decree) a kaih pen zan in Kremlin website ah kisuaksak a, Putin in hih bangin suai a kaihna pen zanhal in UN General Assembly's human rights committee in thukimna (resolution) bawl a, tua-ah Russia in Crimea sim in, Russia in Crimea gam-a tengte Tartar minamte tunga hamphatna a kizang ding bangin zangsak loin gamta in deidan in, tuam bawl hi (rights abuses and discrimination) ci-in a ngawh man ahi hi.

Putin' spokesman Dmitry Peskov in Russia ICC panin a kiphel khiatna pen Russia in ICC pen namkip (ratify) nai lo a, hih pen Russia adingin a hoih geelna leh hamphatna ding "national interests" hi zaw ci-in gen hi. Peskov in ICC' ngawhna nial a, Crimea in mipi tamzaw deihna tawh thukham tawh kituakin (legitimate popular vote/referendum) Russia hong beel ahih manin kisang hi ci-in gen hi.

#Behlapna: Soviet Union gam 1991 in a keek ma-in Ukraine leh Russia gam khat hi a, Crimea pen Ukraine sunga om ahi hi. Ukraine nisuahna lam Lugansk, Donetsk leh Crimea in Russia beel kik nuam in, thau tawi ten kiphinna nei uh a, Crimea mipi ten gambup mipi tamzaw deihna tawh vote khia in March 2014 in Russia beel a, ahih hangin Ukraine leh US makaih in nitumna gam ten Russia in Ukraine sim in Crimea laksak a, gamkeek beh sawm lai hi ci-in ngawh pong in, tua paulam in US makaih in NATO ten Russia ngimna dingin Russia kiim-ah galkap leh galvan tampi koih khin ta hi. Zanhal in ICC in preliminary report suaksak a, tua-ah Crimea buaina pen leitung bup galvan zanga buaina (international armed conflict) hi a, tua pen Ukraine leh Russian Federation gamte kal hi ci hi.

Russian foreign ministry in bel Russia in leitung bup-ah thukham palsatna (international crimes) kua peuh in thuman a tuah ding deih a, ahih hangin ICCte' thukhen zia pen deidan leh ngim tuam nei a, leitung bup thuman thukhenna zia tawh kituak lo a, ICC in kum 14 sung a nasepna ah $1 billion beisak in, li vei bek thukhenna nei pan a, sum tam beisak lua hi ci-in gen hi.

Russia in ICC panin kiphel khia ding hi ung cih a pulak ma-in UN human rights chief in ICC a gupna thu gen a, member ten a nusiat san lohna dingin kunh hi. ICC in Africa gam bek ngim tuam nei in thukhen hi ci-in October kha in Burundi in zong ICC nusiat san a, South Africa leh Gambia in zong nusiat san sawm hi ung ci-in pulak khin zo hi. ICC in Sudan leh Kenya gam-a uliante thu kanna nei in, Sudan President Omar al-Bashir zong mat theihna dingin "arrest warant" kici pia khia khin zo hi. ICC pen 1998 in kiphuan khia a, member gam 100 kihel hi. ICC in war crimes, crimes against humanity leh genocide ngawhna tuak gam makaite tungah thukhen ahih manin US nangawn ICC member in kihel nuam lo hi. Tua hangin Iraq, Afghanistan leh Libya a simna uh panin US peng thei bek hi a, tua lo hi leh mun tampi ah US awk kha ding hi.

Source: Agencies