POPE IN TRANSGENDER LEH HOMOSEXUAL-TE VAI A GENNA

POPE IN TRANSGENDER LEH HOMOSEXUAL-TE VAI A GENNA

POPE IN NEIH KIBANG KIPAWLTE RC SUNGAH POM/HUAI DING HI ZAW HI CI

Oct. 6,2016: Pope Francis in transexual (gay, lesbian,bisexual) leh homosexual (pasal leh pasal kipawl)-te pen pampaih ding hilo ah, Catholic biakna sungah pom a, kipawlpih dinga deih a, huai (embrance) ding hi zaw hi ci-in gen hi. (Hih thu pen group tuamtuam ah Zolai man loin kitei in kipost ngeingai kawikawi ahih manin kiselna leh kinialna tampi a om manin kong post hi a, kinialna dingin kong post hilo in, a gennop pen i telsiamna ding deihna hi zaw hi). Daily Mail na en le uh cin a thulu ah "Pope Francis in transsexuals leh homosexuals-te pen Catholic Church in a muak (welcome) ding leh huai/pom (embraced) ding hi ci-in kituangsak ngiat a, RC biakna in phal hi (legalized) hi ci peuhmah lo hi.

Pope Francis in Jesuh in transgender (neih kibang neite) nolh lo ding, pampaih lo ding ahih manin priest leh bishop ka sep lai-in homosexual (pasal leh pasal kipawlte)-te adingin na kasep bangin Pope ka let khit hangin ka nasep sa bangin ka zom zel dinga, amaute khentuam loin ka pampaih tuan kei ding hi ci-in gen hi. Jesuh mai-ah mi khat peuh a pai ciangin Jesuh in, "Nang homosexual hi teh ci-in na nolh in, na hawlkhia lo hi," ci-in gen hi. Hih bangin neih kibang kipawlte pen tu-in zong pampaih loin i huai a, i kipawlpih a, a buaina thu uh lim takin i kantel a, i huai ding hi zaw hi. Jesuh zong tu-in leitung ah hong vak kik hi leh tua bang mahin hih ding hi ci hi.

Pope Frances in hih bangin neih kibangte zong huai ding leh pampaih loh ding hi ci-in ka gen hangin sanginn ah khangnote a numei/pasal hihna laih ding (sex changes) kihilhna pen nakpi takin ka langpang hi ci hi. Sanginn ah sangnaupangte pen nu/pa thu lamsang 'gender theory' ah sangsia ten a lungsim uh a man loin a laih theihna dingin aana nei lo uh a, tua bang pen leitung leh ngeina tawh kituak lo hi ci hi. Gender theory i cih pen i pian khiatna bangbang tawh/i pianpih (biologically) pasal/numei ahih kei leh pasal leh numei hihna nei kop ahih kei leh pasal leh numei hihna kician nei lo a khenttel theihna ahi hi.

Pope in Georgia leh Azerbaijan gamte ah a zinna ah priests leh nuns (sister i cihte) kiangah Gender theory tawh kisai sanginn ah hilhna pen leitung bup in kiteenna siangtho a neih thukham om khinsa lehdona hi ci-in gen hi. Hih thu tawh kisai a genna tel gen dingin Rome ah news reporter na dong uh a, Pope in gender theory kihilhna hangin khango tampi lungsim laih khin zo a, kitenna siangtho buahsak in, thanghuaisak khin zo ahih manin hih thu ka gen ahi hi ci-in dawng hi. Tua bang gender theory kihilhna hangin khangno tampi in numei/pasal hihna (sex) nangawn laih ta uh hi ci-in gen beh hi. Hih bangin gender theory sanginn ah kihilhna pen ngaihsutna tawh gamkeekna 'ideological colonisation' hi ci-in Azerbaijan ah gen hi.

Pope Francis in RC sungah a sep cil-a kipanin pasal neih kibang kipawlte (gay) deidan tuam loin leengah tui leh khomun na pia in, biakna ah na khentuam loin makaih (ministered) in thupha na pia den hi. Jesuh in zong "Nang gay hi teh" ci-in na nolh lo ding ahih manin hih bang mite ka nusiatsan ngei kei hi ci hi. Francis in Spanish transgender (nu leh pa hihna neikhawm) khat zong ka na pampaih kei e, tu-in numei panin pasal ka suak a, numei tawh kitengin siangtho takin ka nungta ta hi ci-in laikhak hong khak hi ci hi. Tua bang mite nolh loin na huai ka hih manin lungdam mahmah uh hi ci hi. Tua bang mite na sangin, "Hong pai-in Jesu in nong phawkna dingin na ne-in, dawmkhawm un hong cih bangin ne-in ka dawm khawmpih hi," ci hi.

Pope Francis in RC sungah transgender tawh kisai buaina pen a kilawm lo buaina hi mah hi ci a, hih pen mihingte buaina ahih manin vengsak theihna ding ngaihsut hun ta a, Pasian hong hehpihna leh itna tawh kituakin thuman tawh kituakin vai ven'sak den ding hi zaw hi ci hi.

#Pope Francis pen Argentina gammi hi a, 13 March 2013 in Pope zaa na len hi. A min taktak lian bel Jorge Mario Bergoglio hi a,17 December 1936 in Buenos Aires, Argentina ah piang hi. Roman Catholic pawlpi adingin Pope 266na hi a, Vatican City ah Pope a let sung teng ding hi. Pope Benedick XVI zalaihpa ahi hi.

#FB leh internet sunga thu kipost khempeuh up pahpah ding hilo a, lim takin kantel masak ding ahi hi

-Daily Mail/Wikipedia