INDIA IN TUNI-IN SPACE AH SATELLITE 8 KAPTO LEULEU

INDIA IN TUNI-IN SPACE AH SATELLITE 8 KAPTO LEULEU

Sept. 26, 2016: Indian Space and Research Organisationte’ (ISRO) rocket PSLV (Polar Satellite Launch Vehicle) in tu zingsang nai 9:12am in Sriharikota panin Algeria, US, Canada leh India gamte satellite 8 mun awng (space) ah kap to uh hi ci-in Indian Space Research Organization (ISRO) in pulak hi.

ISRO ten a genna ah PSLV rocket a kaptohsakte pen Algeriate' ALSAT-1B, ALSAT-2B leh ALSAT-1N, Canadate' NLS-19, USte' Pathfinder-1 leh Indiate satellite thum ahi hi. Polar Satellite Launch Vehicle in a 37na dingin PSLV-C35, 371 kg a gik khuahun gen kholh theihna ding SCATSAT-1 khat leh satellite sagih polar Sun Synchronous Orbit (SSO) ah leng dingin kapto hi ci-in ISRO in gen hi. Hih PSLV-C35 mission pen First Launch Pad of Satish Dhawan Space Centre, Sriharikota tuikulh panin kikapkhiato hi ci-in ISRO in pulak hi.

Indiate satellite thumte:

1. SCATSAT-1 pen altitude 730 km a gamla polar sun synchronous orbit kicihna kim-ah kum nga sung va leng kawikawi ding a, wind-vector products kici in khuahun genkholh theihna ding leh khuahun theihkholh theihna ding (weather forecasting services) nasem ding hi.

2. 10-kg a gik PRATHAM pen IIT-Bombayte' bawl hi a, 1km x 1km kiim sunga electron om zah va sim ding hi.

3. PISAT pen 5.25 kg. in gik a, PES University, Bengaluru a kibawl hi a, remote sensing applications kici nasem ding hi.

Algeria gamte satellite ALSAT-1B pen 103 kg. in gik a, leitung kim kual in leng ding hi. ALSAT-2B pen kg.117 in gik a, remote-sensing satellite ahi hi. ALSAT-1N pen kg.7 kg. hi a, technology demonstrator ahi hi.

India in a masa pen dingin satellite 1975 in na kapto a, 24 June 2016, ISRO in India in a bawl rocket leh gamdangte bawl rocket 74 zangin satellite 131 na kapkhiato ta hi. October 2015 in ISRO gamdang 23te satellite (Algeria, Canada, Germany, Indonesia, Japan, Singapore leh USte satellite kihel in) kaptohsak dingin na khentat a, 18 June 2016 in rocket khat bek zangin satellite 20 na kapto vau lel hi. Oct. 22 2008 in ISRO in khapi sungah Chandrayaan-1 na kap lut a, Oct. 22, 2008 mah in Mars sunga lut ding Mars Orbiter Mission na kap a, Mars orbit sungah 24 September 2014 in lut ahih manin leitung ading India gam pen a khatvei kapna tawh Mars sunga satellite kaplut masa pen suak hi. Leitung ading India pen Mars sungah satellite kaplut a lina hi a, Asia adingin lawhcing takin a kap lut masa pen suak hi. Satellite gik zaw sem GSLV Mk III kici ISRO in a bawl lai tak hi a, tua ban ah ULV zong bawl lai a, ULV zo leh satellite kapna dingin a zat kik theih (reuseable launch vehicle), human spaceflight, khapi sung vaan ding (lunar exploration), vantunga planet tuamtuam thukan ding (interplanetary probes) leh ni sung kancian ding (solar spacecraft mission) in kizang ding hi. ISRO pen Aug. 15, 1969 kum-a kiphuan khia ahi hi. India in satellite 88 a lawhcing takin a kaptohna leh a neihna hi ta hi.

Kawlgam in kum nga sungin a masa pen satellite kapto ta dup ding hi ci-in Ministry of Communications and Information Technology mun a sem Myanmar Deputy Minister H.E. U Thaung Tin in Dec.10, 2014 in Myanmar Satellite Forum ah pulak khia dum ta hi.

-Satellite Today/Sputnik/The Hindu/Wikipedia