Christian Hymn-te’ Tangthu :

“KA HI BANGIN” (Just As I Am) - by Charlotte Elloitt, William Bradbury

A kiphuak ngei la dangte khatpeuh sangin hih la in mite’ lungsim sukha-in, Khris’ adding mite zo zaw hi ci-in gen lehang kikhial lo ding hi. Hih lamalte amah leh amah bangmah man a kisa lo numei zawngkhal khat in a lungkiat mahmah lai tak-a a phuah lamalte ahi hi.

“Ka Hi Bangin (Just As I Am)”  laphuaknu Charlotte  Elliott pen England gam Clapham ah March 18, 1789 ni-in suak hi. Elliott pa min pen Charles Elliott hi a, Clapham leh Brighton khuami hi a, a  pu pen Huddersfield khuami Rev. H. Venn ahi hi. A khangno lai-in lungkhamna bangmah neil lo-in om meelmeel a, nuntakna nuamsa mahmah hi. Portrait artist (Meel kisun dinga limsuai) khat hi a, mite’ nuihzak theih ding ciamnuih tom nono a gelh thei khat ahi hi.  Ahi zongin kum 32 a phak ciangin dam loh kipan a, a sawt loin lupna tung ngak mi zawngkhal khat-in a khantawn om suak hi. A dam lohna tawh kizui-in lungimna lianpi leh kisungsiatna lianpi hong nei a,  a lung zong kia mahmah hi. A dam lohna hangin kha thu lamah zong nakpi hong zawngkhal hi. 1822 kumin Switzerland gam pan Swiss Evangelist  Henri A. Cesar Malan a inn uh-ah va hawh a, Cesar Malan’ kiangah kha thu lam-a a zawngkhalna thu teng hong ko hi.  Cesar Malan in  a thangahna theihna ding leh gupkhiatna thu hilh hi. Ahih hangin Elliot in, “Jesu kiangah bangci pai ding ka hi hiam cih thei lo hi’ng,” ci-in gen hi. Cesar Malan in, “Na Hi Bangin Ama kiang zuanin pai in,” ci-in dawng hi.  Kha lam ahi a, lungsim lam ahi zongin a kisapna bangbang Pasian’ thu tawh kuppih a, Cesar Malan in, “Na hi bangbang in na mawhna tawh leitung mawhna a puakhia Pasian’ Tuuno’ kiang na zuat ding ahi,” ci-in hanthawn zom zel hi. Kum simin Elliot in Swiss Evangelist Cesar Malan in Jesu Khrist tawh kizopna man taktak-a a makaih tua ni phawk den hi, bang hang hiam cih leh Elliot in tua ni pen a khalam suahni in ciamteh hi. A pianthak zawh kum 12, 1834 mateng hih la a phuah nai lo hi. Zan khat ihmu thei loin omcip hi.  A zing ciangin a ihmu theih loh zaan-a a ngaihsut thute, a zawngkhalna leh a natna panin Pasian hehpihna tawh a gualzawhna a ngahna thute lahna dingin laikung leh laidal la in “Ka Hi Bangin Paulap Nei Lo” cih la hong gelh hi. A pianthak cil in hih la a phuah pah loh  hangin hih la lamalte ah i muh bangin Charlotte Elliot in Cesar Malan’ kammalte mangngilh ngei lo ahihna kilang hi.

Charlotte Elliott kum 82 bang a nuntak hangin dam sinsen cih bang nei ngei lo hi. Khat veivei bang tawlkhat sung natna lianpi thuakin genthei mahmah hi. “Pasian in hong mu, Pasian in hong makaih a, Pasian in hong cing hi. A hehpihna in hong tuam a, a nasep ah ka hi banga ka lungdam ding a aw nem in hong ngen den hi,” ci-in gen ngei hi.

Charlotte Elliott in Dr. Malan’ thugenna “Na Hi Bangin Jesu kiang zuanin Pai In” cih a phawk kikkikna panin hih la 1834 kum-a a phuah hi a, Johan 6: 37 “Ka pa in kei tungah a hong piak mi peuhmah ka kiangah hong pai ding a, ka kiangah hong pai mi peuhmah ka hawl khia kei ding hi,”cih siksan in a phuah ahi hi. “Ka Hi Bangin” la pen “Christian Remembrancer” sungah kisuaksak masa hi. 1836 kum in ama’ phuahsa la dawng 115 a kikhetna “ Invalid’s Hymn Book” kici laibu leh sungah kihel hi. Charlotte laphuah  150te labu tuamtuam “Invalid’s Hymn Book” (1834 leh 1854), “Hymns for a Week” (1839) leh “Thoughts in Verse on Sacred Subjects” (1869) cihte ah kihel hi. A la phuah a tamzawte pen anatna leh haksak thute tuang a, a natna leh gentheihna panin a upna hangin thuakzawhna leh lametna a ngahnate gen bel in nei hi.  England gam Brighton a pastor sem a sanggampa in a cimawh zaw deuh Pasian’ nasemte’ tate’ ading  ngaihsutna tawh lam dinga a hanciam sang khat a kilam zawhna ding sum leh paai a huhnop man-a a phuah ahi hi. Tua nasep manpha ahih lam thei napi-in bangmahpi sem zo kisa lo hi. Pasian in a lungulh thupha pia takpi a, tua sang a kilam zawhna dinga sum zonna bazaar (sumbuk) te leh project tuamtuamte pan-a kingah sum khempeuh sangin hih numei zawngkhal khat’ laphuah la tungtawn a kingah sum tamzaw takpi hi. A sanggampa mahmah in, “Pasian’ ading kum tampi na ka sepna ah ka nasepna  gah pawl khat a mu kha dingin ka kilamen a, ahih hangin ka sanggamnu’ phuah hih la dawng khat bekbek in Pasian’ na tam sem zaw hi,” ci-in ka ngaihsun hi,” ci-in gen ngei hi.

Charlotte Elliott’ la phuah la peuhmah a kigawmin dawng 150 pha a, England gam-a numei laphuakte’ lakah a siampen khat-a kiciamteh ahi hi. 1823 in Clapham panin Bgrighton khaua Charlotte Elliott leh a innkuanpih peem uh a, September 22, 1871 in Brighton ah si hi. A sih khit ciangin a la dalte lakah hih a la tungtawn-a a nuntakna uh a kikhel mi tul tampite’ lungdam kohna laikhak tampi kimu hi. Natna, gentheihna, cihmawhna, zawngkhalna tampi a tuah hangin lungkia in a upna tawh Charlotte Elliott in gualzawhna a ngahna leh a la phuah in million tampite nuntakna lawng hi. I hihna bangbangin paulap nei loin, zong se loin Jesu khephung i zuatna ding Charlotte Elliotte in a nuntakna panin hong sinsak hi.

WILLIAM BRADBURY’ la phuah la awte lakah hih la, “Ka Hi Bangin (Just As I Am)” banah “Amah’n Hong Kha (He Leadeth Me)”, “Thunget Hun Nuam (Sweet Hour Of Prayer)”, “Jesu’n Hong It Ka Thei Hi (Jesus Love Me)”, “Depth of Mercy”, “Even Me,” , “The Solid Rock” cihte minthang mahmah hi.

Numei zawngkhal khat’ phuah hih la in mi bangzahte’ nungtakna khel hiam cih bel tawntung mun leh tawntung hun i tun ciang bekin kithei pan ding hi. Hih la bel kikhop man cianga ki-apna sapna bek-a zat ding hi lo-a, thu-ummi peuhmah in hih la kithuhilhsak a, tawntung i dinmun leh Pasian tawh i kilemnate ei’ hihna khat beek hi loin Jesu Khris hong zawhsaksa nasep hang hi cih kiphawksak kikkik den ding ahi hi.

Hih la “Ka Hi Bangin (Just As I Am)” pen Billy Graham in, “1934  in Charlotte, North Carolina, US ah Evangelist Mordecai in revival crusade hun hong nei a, ki-apna sapna (altar call) la dingin hih la hong zang hi. Hih la-in ka lungsim hong lawngkha lua ahih manin ki-apna nei-in Khristian ka suak a, Khristian ka suahna la hi,” ci-in gen hi.  “Ka hi Bangin (Just As I Am)” la pen kum zalom 20 kim khat khit nungin Billy Graham in crusade a neihnate ah ki-apna sapna la dingin kizang a, hih la in million tampite lungsim lawng in, Pasian kiang a zuatna uh la hong suak hi. Billy Graham in ama’ thangthu 1997 in a gelhna ah hih la min pen ama’  tangthu bu min mai-ah tuangsak in, a min dingin “Just As I Am: The Autobiography of Billy Graham” cih zang hi.  Pasian lasaksiam minthang mahmah Michael W. Smith in Billy Graham phawna dingin 44^th GMA Dove Award ah “Ka Hi Bangin,” la sa hi.

"Pasian nasepna dingin Pasian in na thugensiamna, na lasaksiamna, na meelhoihna, na pilna siamna leh na thatang hanta hong kalh masa lo a, na gentheihna, na thanemna leh na zawngkhalnate paulap se loin “Na Hihna Bangbangin na hanciamna hong deih hi''.

 “Mi khempeuh in na lianpi sem thei lo hi. Ahih hangin itna tawh na neu nono kisem thei tek hi.”  - Mother Teresa

 “Ka Hi Bangin”  la khui (album) sunga a kikhumnate:

·         1975 – Red Headed Stranger by Willie Nelson 

·         1999 – Just As I Am by Johnny Cash 

·         2002 – Traveling Mercies by Chris Potter 

·         2005 – As I Am by Krisrin Chenoweth 

·         2009 – Daisy by Brand New (Band) 2011 – In Times of Sorrow by Padraingin Ni Uallachai. 

·         2011 – A River With No End by Ghost Ship (Mars Hill Church) 

·         2012 - Just As I am (Paul Brandt album) by Paul Brandt 

·         2013 – Words of Life by Frank Morgan (Chilean Gospel singer). Spanish version "Tal como soy" kici sungah ah zong kikhum hi.

“JUST AS I AM” ORIGINAL POEM

Just as I am - without one plea,
But that Thy blood was shed for me,
And that Thou bidst me come to Thee,
-O Lamb of God, I come!

Just as I am - and waiting not
To rid my soul of one dark blot,
To Thee, whose blood can cleanse each spot,
-O Lamb of God, I come!

Just as I am - though toss'd about
With many a conflict, many a doubt,
Fightings and fears within, without,
-O Lamb of God, I come!

Just as I am - poor, wretched, blind;
Sight, riches, healing of the mind,
Yea, all I need, in Thee to find,
-O Lamb of God, I come!

Just as I am - Thou wilt receive,
Wilt welcome, pardon, cleanse, relieve;
Because Thy promise I believe,
-O Lamb of God, I come!

Just as I am - Thy love unknown
Has broken every barrier down;
Now to be Thine, yea, Thine alone,
-O Lamb of God, I come!

Just as I am - of that free love
The breadth, length, depth, and height to prove,
Here for a season, then above,
-O Lamb of God, I come!

Source: Wikipedia/Hymnaky.org/Sia Zam Khat Kham in a bawl “Christian Hymn-te Tangthu