ESAU IN A INNLUAHZA A ZUAK BANGIN NA SUAHTAKNA, NA MIPIHTE LEH NA GAM ZUAKIN BUANLEI SUAKSAK MAI DING MAW?

 

ESAU IN A INNLUAHZA A ZUAK BANGIN NA SUAHTAKNA, NA MIPIHTE LEH NA GAM ZUAKIN BUANLEI SUAKSAK MAI DING MAW?

Myanmar junta regime' State Administration Council (SAC) in elections neih kik ciangin kivaihawmna a noptuam leh baihlam (administrative convenience) zawkna ding cih paulapin districts thak bang zah hiam bawl thak ding, ci-in a geelna a pulak khit zawh thangah lua-in lungdam lua kisa sakhi bangin a hawk lala, ui bangin hon kut henhanin a nuam pialpual kitam mahmah dep hi. Suu Kyi leh Falam ten hong dal MAL in DC hong pia khin ta hi, a ci bang tam zaw lai hi. Hong pia khin hi deksuai loin junta pawl dingin kizolna in district thak bawl beh dinga geelna hi pong pan a, sa beng leh kap dinga kithawi hi pan a, sa man hi nai lo mipa bangin humpinelkai man zah liangin a lawp kitam mahmah henhan hi.

DC thak bawl beh dingin a geelna a pulak khit nung Tedim township sung junta military in mot suam honh kisan pah ngekngek uh hi. Junta regime nuai-ah leitung buppi hong pia zongin a phattuamna leh kimanna nei kiuhkeuh lo hi, cih kitelcian sinsen pah hi. Tonzang township zong district piak dingin hong zol beh lai hileh tua khit teh khuai bangin hong a ngongtatna uh leh tatsiatna uh hong laang beh henhan leh kisan kik nuam ding hileh kilawm hi.

Zogam Federated State or autonomy or independent homeland hong pia phial ta zongin junta dictatorship regime ukcip hun sung zusa bangin hong khutkhut ding, hong thah zo zahzah hong thatthat lel ding ahih lamtak nangawn a ngaihsutna khuak un Kawl ngian leh junta ngian kithuah khawm kum 50 sung piikpeek junta regime ngongtatsiatna in a phawn' zawh nai loh na tam lai bilbel hi. Bang khuak, bang mit, bang bil tumdang nei belbal sese uh ai tam? Hong thah khit, hong hal vom gipgiap leh hangkeu khit teh junta regime a lehdo sawm pan kitam lai ding hileh kilawm hi.

A beisa 1962-2011 (kum 49 sung piikpeek), leh a beisa kum khat dektak 2021 February 1 coup d'ètat khit junta dictatorship regime ukcipna, saltan'na, hencipna, nengniamna, tuatcilna, bawlsiatna, lauhsakna, thahna mah nuam a sa zungzung leh nuam sa ngaungau lai-in junta regime Golden Jubilee cin'na pawi peuh district tawh hong zolna kikhemna daak ging laampihin a tawntawn ngap lai kitam lai mawk hi. Ahih hangin tua dan mite sungah gam leh minam it, suahtakna lunggulh a kici ngam, a Zomi min bek nangawn ka sihpih ngam hi, a cici mi na tam tuak bilbel dep zawsop lai hi.

Junta dictatorship regime nuai-ah kum 50 sung piikpeek ukcipna, saltan'na, hencipna, nengniamna, tuatcilna, bawlsiatna, lauhsakna, thahna thuakin mihing ihna man nei loin ki-om napi-in cimtak nai mahmah loin junta regime panin suahtakna lunggulhin a lehdo ngamte peuh Zomite' sa leh gal zahin a ngaihsun zawsop, ei bekin lah do ngam lo napi-in junta lehdote tawh mapangin kipawlna pen minam dangte sila kisuahsak hi, a ci Zomi sungah virus na tam mahmah bilbel hi.

Esau in a innluahza an leh be meh ankuang khat bek tawh a zuak (Pian. 29:31-34) ngam bangin gam leh minam it a kineih pha diakte in junta dictatorship Golden Jubilee a cin' zawh district piak dingin a geelna a cih pong tawh a hong zolna leh bumna peuh tawh a suahtakna, a nuntakna, a democratic rights i neih khempeuh uh a zuak ngam khin na bang zen uh hi.

Mihing khat bangin a piang ngawngaw hi buang napi-in suahtakna na neih kei leh kamkaih tawh bulh loh a kiphamawh sakol  leh la  sangin na nuntakna manpha lo zaw leh man nei lo zaw suak khin hi. Sakol leh la pen nasem ding leh uk zawh ding bekin kamkaiha kibulhhi bek a, kimot thah lo, kimot bawlsiat ngam loin an lim nono tawh hoih takin kivakin kipia a, a ganbuk uh a nuam thei penin lungnuam takin kigiak sak hithiat zaw hi. A giahna uh a ganbuk sungah va kimot suamin kipatausak ngei lo a, a ganbuk uh tawh kihing hal lum khawm ngei lo hi. Junta regime in Feb. 1, 2021 khit nung tua bangin hong hoih bawl ngei hiam?

Junta dictatorship regime in a moi a ham, numei naupang cih khentuam nei loin a ut teng pheng thah a, a ut bangin a bawlsiat banah buanin, mihing' ten'na innte bek hi loin Pasian biakna biakinnte, buh lak hunin zanglei leh galtai gamlak ah a bukna uh temporary shelters kicite nangawn halsak ziahziah kawikawi zaw lai uh hi. A mi thah bek uh hunsa zo lo leh lungkim zo nai loin meihol in zat ding lah hi buang sam lo napi-in, si luangte mihing bangin pumpi leh guh leh tang kim tawh vui theih loh dingin hal beh lai uh hi.

Junta dictatorship regime ukcipna nuai-ah Myanmar gam mite nuntakna pen kamkaih tawh uk loh a kiphatmawh sakol leh la sangin a nuntakna uh man nei lo zaw lai hi. Mikangte in America ah mivomte sila in kineihna tawh slavery system tungtawnin kum 246 sung (1619-1865) a ukcipna hun sungin mivomte in bawlsiatna, nengniamna a thuak gimna uh, nuntakna hamsa a sak mahmah hun sung uh sangin Burma junta regime in a mite ganhing sangin man nei lo zaw in a bawl ziate un man nei lo zaw lai hi.

Tua hi napi-in daihna, lungnop suahtakna (peace and freedom), khantohna leh hauhna (prosperity) lunggulh ing a kici, ka human rights manpha hi, ci-in kuamah neumuh leh zahko ding nangawn a ut vet lote tata, gam leh minam humbit ding, leh a it a veina uh kam beembeem in a gen laulau ngam diakte peuhin mihing ahihna uh a manphatna (human values and dignity) teng Esau in a innluahza an kuang khat tawh a zuak ngam bangin district tawh zuak mang meng nuam lua kisa-in ciak henhanin lawp lua kisa ui cithak vei a bang tawh, ko hun lai pekin district ka ngetna bangun a kingah hi ta hi, peuh ci-in minphatna (credit) kituhin a buai henhan khin zaw lai peuh na om hi.

Mihing khat in a piang buang ihihna a manphatna teng junta dictator leh February 1 coup d'ètat makai Min Aung Hlaing' khut sungah piakhia (surrendered) ngamin, junta regime forces in a cimtak mateng hong ukcip khum ding, saltang den ding, hencip den ding, nengniam, tuatcil, bawlsiat, hong lausak leh patausak den ding, a ut hun peuh teh hong mot thah theih dingin a kiphal gawh dinga kikai tuuno a ham loh bang, a mul kimeet tuuno a ham loh bangin a ham sese lo, a kitom ngam sese lo ngalliam a kici nuam lai leh gam leh minam itna hangin ka si ngam hi, ka minam min Zomi cih ka sihpih ding hi, a kici na kitam lai bilbel hi.

Junta dictatorship regime' SAC in zawhthawh thu tawh hong ukcipna leh hencipna nuai-ah dictrict piak dingin a geelna hong zaksak khit teh ganhing leh sila sangin nuntakna man nei lo zaw in om ding, junta military leh police ten a ut hun peuhin hong gawh ding, a ut hun peuhin a ten'na a inn a lote uh a mot halsak a, a sanggam numeite leh zite a mot buansak zongin phamawh a sa vet lo kitam tuak lai mawk hi.

Junta regime in dictatorship tawh hong ukcipna nuai-ah Zogam Federated State piak dingin a geelna hong pulak beh lai zen leh Diamond Jubilee (kum 60), Platinum Jubilee (kum 70), Centennial (kum 100) leh Millenium (kum 1,000) pawi a tun dong junta regime khut sungah hingtangin a kipia ngam ding bang gam leh minam it pha diak a kineih honpi mah om lai mai leh kilawm zen hi.

Cik ciang va bang i pil zen tam maw? Cik hun ciangin khua phawkin minam leh gam itna taktak nei-in ma i pang khawm thei zen tam maw? Cik ciangin mihing ihihna tawh i lhihna a manphatna telin i humbit theihna dingin i kitom leh lehdo khawm ngam zen tam maw? Gal leh sa mai, vompi leh kamkei' mai-ah a tai lo a kici Zomi taktakte gal leh sa mai-ah tai loin suahtakna lunggulhna tawh mapang khawmin gal leh sa taktakcik hun ciangin i do khawm ngam zen tam?

Na nuntakna leh na rights a manphatna na telcian mateng, na humbit theihna dingin a kisap hunin na kitom leh lehdo ngam mateng na nuntakna ganhing leh silate sangin man nei lo zaw hi. Mipite leh gam leh minam suahtakna na kam beembeem in na ot pong hangin kimanna nei lo hi. Gam leh minam na it na veina a mawkna taktak = BEEM or ZERO a suak khinsak na hi ta hi. Leitung buppi na ngah zongin na nuntakna na suplawh leh a phattuamna leh kimanna om lo hi.

Gam leh minam bup humbitna dingin khutme tatsak ding thasial mahmah napi-in district bawl thak dingin junta geelna tawh lungkim suk miumiau napi-un, junta regime forces in a mot thah a, vokno leh uino bangin sih phamawh a sa lo minam leh gam it pha diak a kici leh a humbit a kici na tam bilbel hi.

Topa Jesuh in, "Mi khatpeuh in hih leitung khempeuh a ngah hangin a nuntakna bulpi suplawh leh bang phattuamna om ahi hiam? A nuntakna bang tawh lei kik thei nawn ding ahi hiam?" na ci hi (Matt. 16:26). District piak ding a geelna uh tawh junta military dictatorship kum 50 na lungkimpih lai teng leh junta regime panin suahtakna lunggulhin a lehdo ngamte na langpan' lai teng Esau bangin na gam leh na leitang, na mipihte leh na gam, na hihna manphatna teng a zuak khin na hi hi hi.

Tangpi tangi nuntakna dingin tuikhuk to nuam lopi-in tuikhuk ding a tote a lehdo niloh na hi hi. Kawlgam buppi in junta regime khut sunga saltan'na panin suahtakna lunggulhin a lehdo hun lai takin na om muang hithiat leh na gam leh na minam itna tua ciang bek hi zen maw? Mihing bangin man nei-in nungta nuam maw? Ahih kei leh man nei lo sila leh ganhing bangin khan' sung sila suak nuam zaw maw?

 Thang Khan Lian #ZUNs reports