ABORTION RIGHT: US SUPREME COURT AH THUKHENTE IN LIMITED ABORTION A GUPNA THU GEN

 

ABORTION RIGHT: US SUPREME COURT AH THUKHENTE IN LIMITED ABORTION A GUPNA THU GEN

Dec. 3: Mississippi law in numei kibuan ahih kei leh tanau kinai lua kiteng ahih kei leh a pa in a tanute a luppihna ahih kei leh unau lupkhopna (rape or incest) hangin a gaite naungek nipi kal 15 a pha khinsate a phiat theih lo ding uh hi, a cih thukham US Supreme Court in zong kipsak dingin gum uh bang hi. Nilaini in hih case vai ngaih khiatna hunah Supreme Court of United States (SCOTUS) ah conservative justices (thukhente) a tam zawte in Mississippi abortion law lepkip dingin a gupna thu gen uh hi.

Hih vai tawh kisai June kha ciangin neih dingin a kilamen thukhenna hangin numei millions a simte in nauphiat theihna ding (abortion acess) ngah lo kha thei uh hi. Nauphiat ding a deih loin a tangkopih pawl anti-abortion activists in SCOTUS in naungek piang nai lote (unborn children) humbitna dingin a nget uh hangin abortion case tawh kisai mi siamte (experts) nauphiat ding a kikham leh naupaai nupi a si (maternal mortality) kibehlapsakin khangsak beh ding hi, ci uh hi.

US ah abortion rights tawh kisai conservative ideologies mittaw sialkhau let teta in nuntakna humbit ding deih pawl (pro-life) kici napi-in gun rights violence hangin kum simin US ah mi 3,000 ta bang a kithah den hangin gun rights gumin thau tawh kithahna phamawh a sa vet lo tam mahmah leuleu uh a, mizawngte in healthcare gina ngah loin a sih uh hangin tuate nuntakna thudon vet lo uh hi.

America ah nauphiat a tam zawte pen Christian mite sung ahih lam a thei lo right-wing pawl leh scientific ideologies bulphuhin abortion law a khauhna munte ah maternal mortality sang zaw hi cih bulphuhin a nei mi siamte kinialna case Dobbs v Jackson Women's Health Organization a kici tawh abortion rights tawh kisai kinialna leh kidona nasia mahmah napi-in thukimna a piang thei lo kidona (all-or-nothing fight) suaksak den hi. Tua bek hi loin conservative lamte (Republicans) ten political game kimawlna ding leh votes zon'na dingin lim zat zaw uh hi.

Mississippi law a gum thukhente in SCOTUS in a beisa hunin US Constitution bulphuhin a gam tangthu sung adingin thukhenna a ciamteh tham nihte SCOTUS in a lumlet leh a phiat kik ding deih leh kalh uh hi. A case masa pen Republican President Richard Nixon' administration hun Jan 22, 1973 in Roe v Wade case vai SCOTUS in 7–2 votes tawh a thukhenna ah, "US Constitution sunga Due Process Clause of the Fourteenth Amendment in naupaai numeite in nau a phiat noh leh nop lohna dingun suahtakna a neih uh fundamental "right to privacy" humbitsak hi," ci-in a phiat nuamte leh phiat nuam lote amau suahtakna tuak na pia hi.

Roe vs Wade case thukhenna ah abortion rights a piak hangin ut bangin phiat theihna (absolute right) pia lo a, numeite cidamna leh nupi naupaaite nuntakna humbitna dingin nauphiat theihna bek na pia hi. Naungek kha thum phate bek phiat theihna ding "absolute right to an abortion" pia a, second trimester a pha naungekte phiat theihna ding a ciangtanh (limited rights) bek na pia hi.

Abortion right a nihna 1992 kumin Planned Parenthood v Casey case vai tawh kisai democratic president Bill Clinton' administration hun June 29, 1992 in SCOTUS in 5-4 votes tawh a thukhenna uh-ah a beisa hunin nauphiat phal lohna (abortions restrictions) nga omte phal lohna Roe v. Wade (1973 pawlkhat, City of Akron v. Akron Center for Reproductive Health (1983), Thornburgh v. American College of Obstetricians & Gynecologists (1986) na lumlet (overtuned) uh a, nu sunga naungek piang nai lo (foetus) a nuntak theih hun ding nipi kal 24 kiim ma-in nauphiat nuamte US state 50 governments ten nauphiat nuam nupite tungah vangik kisam lopi leh kilawm lopi ("undue burden") guan lo ding hi, ci-in khensat uh hi.

Tua khit nungin siavuante in a suah ma leh khit nung natna hang ahih kei leh medicacal constitution loin naungek khuaphawk loin a om theih (can resusciated) leh nuntak theih hun a cih uh nipi 24 hun sung "foetal viability" standard a kici abortion law ah "red line" hi a, naungek nu sunga kipaai lai nipi 24 ma phiat ding khatpeuh na dal (preventing any bans on abortion before this time or gestation period) hi. Nauphiatna a deih lo anti-abortion campaigners pawlin tu lai takin SCOTUS ah thukhen kua lakah conservatives thukhen guk tak om ahih manin amau deihna bangin abortion law bawlsak dingun kilamen uh hi. US modern history adingin ex-President Donald Trump in kum li president a let sungin conservatives justices thum a guan' behte pen conservative suuksia pen hi lai uh hi, kici hi.

SCOTUS IN BANG CASE HEARINGS NEI HIAM?

SCOTUS ah thukhen kua om lak panin conservative justices guk leh liberal justice thumte zakna ah Mississippi Solicitor General Scott Stewart in a beisa hunin Roe vs Wade case leh Planned Parenthood v Casey case vai thukhenna hangin i gam sikha ahih kei dawi leh kau in hong vil bangin hong vilvil (haunt our country) banah thukham gu suaksak (poison the law) hi, ci-in foetal viability standard ah kal 24 nauphiat theihna abortion law a suam kawmin tua bang thukham pen US Constitution lui hilo ahih kei leh balkeek lo (not "tethered") hi, ci-in nial hi.

Liberal Justice Sonya Sotomayor in Mississippi Solicitor General Scott Stewart' genna a dawn'na ah, "Constitution sungah a tuang kha lo thu tampi tak om hi," ci hi. Roe vs Wade leh Planned Parenthood v Casey cases a kilumletna dingin SCOTUS a kigolh leh thukhen innpi hi loin "political body" bangin Americans ten mu ding uh ahih manin SCOTUS in mindaina a tuahna panin damkik zo lo ding hi, ci-in a warning gen hi.Mipite ngaihsutna leh san'na bangin SCOTUS a gamtat leh a uihna (stench) suak ding ahih manin SCOTUS nungta zo lo ding hi, ci-in gen beh hi.

Justice Sotomayor in kal 24 in a upa naungek piang nai loin na sa thei hiam? ci-in dotna bawl hi. Mississippi Solicitor General Scott Stewart in naungek piang nai lote nuntakna khut tawh kisawk (poked) a, tua khit ciangin buangnai bangin eite hong kilehkaih ahih kei thau lot dingin a kilehkaih (recoil) bangin naungek piang nai lote kibawl hi, ci hi.

Justice Sotomayor in, "Mi si khinsate khe va kuaihsak leh 40% kilehkon kik (recoil) ding hi. A khuak un bangmah a phawk nawn lo mite (brain dead people) in zong a pumpi nate un khua a phawk theihna (stimuli) tawh tang/dawng (respond) thei uh hi. Tua ahih manin naungek a piang nai loin a response theih hangin khuaphawkna nei ahih kei leh nasa thei hi ci-in ka ngaihsun kei hi," ci-in dawng hi.

Tua khit in Mississippi ah abortion clinic omsun Jackson Women's Health Organization sik leh tangin a ding (representing) Center for Reproductive Rights panin Julie Rikelman in SCOTUS in Mississippi law khauh a phiat leh sat tukna dingin ngen hi. "Misssissippi law in viability standard hun ma kha nih in nauphiat a kham pen a beisa hun kum sawm sawm-a sim hun-a thupiang omsa tawh kituak loin US Constitution tawh kikalh hi. Mississippi in numeite in a gaina ding uh leh amau ut lohpi-in nau a neihna dingun zawhthawh thu zat khum ding hi," ci-in buanna a tuak ahih kei leh a pate ahih kei a sanggamte tawh mawhin naupaaite nauphiat ding nangawn kham hi, ci hi.

US Solicitor General Elizabeth Prelogar in zong Biden' administration sik leh tangin Mississippi abortion ban a deih lohna thu gen hi. Roe vs Wade leh Planned Parenthood vs Casey cases kilumlet hileh leitung bup zeel ding hi. Numeite in hih cases nihte pen a "fundamental right"ngakna dingin zang uh hi, ci hi.

CAMPAIGNERS TEN BANG GEN?

SCOTUS in Roe v Wade phiatin a lumlet ahih kei leh Mississippi law in nauphiat nuamte tungah vangik bangmah guan lo hi, ci-in Texas abortion law SB8 a kici tawh siavuante in naungek piang nai lote lungphu (heartbeat) nangawn kithei thei nai lo hi a cih uh kal guk pha khinsate nauphiat ding a khamna a gup bangin a gup kik leh US ah Republican-ruled states 21 a tawm pente in kal 15 a pha khinsa (kha li cing lo) naupaaite in nau a phiat ding kham ding uh hi.

Hih US states 21te ah US numei naupaai theih hun or reproductive age (18-49) kikal sunga om 36 million ten nauphiat thei lo ding uh hi, ci-in abortions tawh kisai a research data a pia healthcare organisation Planned Parenthood in gen hi. Anti-abortion group National Right to Life president Carol Tobias in BBC kiangah, "Naungek piang nai lote nuntakna humbitna dingin SCOTUS hong kigolh dingin ka lamen hi. SCOTUS in Mississippi law a gup ding ka lamen a, mihing piang khinsate a humbit bangin a piang nai lote a humbit dingin kal sau zaw a suan ding kimu nuam hi," ci hi.

Ahih hangin Washington DC panin numei dangte in abortion right a kiphiat khak ding lau uh hi. "Lamdangsakna tawh ka kiguih kei a, ahih hangin ka lau hi. Thukham in a phal (legalize) a, a phal kei zongin nauphiat bei tuam lo ding hi. Ahi zongin a kikham bikbek leh nauphiatte adingin bit lo ding hi. 2021 hi. Abortion thu tawh kidodo lai ka um thei kei hi," ci-in Olivia Dinucci in ci hi.

Experts pawl khatte in nauphiat a kikham leh tuihual lauhuai (dangerous ripple effects) piangsak ding hi, ci-in genkhol uh hi. "Naupaai lai-in a si ahih kei leh nau neihna ah a si (maternal mortality) a ciamteh thamin a khan'na i mu ding uh a, a diakin tua bangin a si mikang nupi ahi lo namdangte lakah nasia diak hi. Zawn'na (poverty level) ah kiat sukna hangin tate kem zo leh inn sungah ngongtatna (domestic violence) a tuak innkuan kibehlap ding hi," ci-in columbia University ah center for gender and sexuality law ah director Katherine Franke in gen hi.

US AH KUA TEN NAUPHIAT

Donald Trump hun panin abortion right tawh kisai vote zon'na dingin lim zat mahmah a, Roe vs Wade thukhenna lumlet ding kamciamin conservative support nakpi takin ngah hi. Trump' presidency hun 2019 in US ah nauphiat 630,000 case om a, 2010 kum sangin 18% niam zaw hi, ci-in US Centers for Disease Control (CDC) in gen hi. 2019 in nauphiat a tam zawte pen kum 20s kiimte hi uh a, 57% in nauphiat uh hi.

US ah black Americans (mivomte) sungah nauphiat tam pen a, kum 15-44 kikal mi sungah mi 1,000 lak panin 27 in nauphiat uh hi. Pro-choice Guttmacher Institute in mivom numeite in healthcare gina ngah loin deidantuamna (discrimination) a tuahna hangun amau sungah nauphiat tam hi, ci hi. 2014 survey ah US gam sunga nauphiat seh li suah seh thumte pen sum muhna niam neite ahih kei leh mizawngte (low incomes or below the poverty line) hi, ci hi.

2011 in Guttmacher Institute report in a genna ah US ah nauphiat numei thum lak panin nih Christian hi a, tua lak panin Protestants biakna zui numei 37% in nauphiat uh a, Catholic biakna zui numei 28% in nauphiat uh hi ci hi. 2000 hun in US Catholic numei nauphiat pen US average general population tawh kikim ahih manin Catholic numei 29% in nauphiat uh ahih manin Protestant numei nauphiat zah sangin a milim a nauphiat zah tam zaw uh hi. 1996 study in a muhna panin US ah nauphiat nga lakah seh khat pen Christian numei a piangthak khinsate (born-again) hi cih kimukhia hi. 2008 survey in tua bang mahin nauphiat numei nga lak panin seh khat pen a piangthak khinsa numeite mah hi ci kimu a, tua lak panin a piangthak khinsa ahih kei leh evangelical a kici kum 18 pan a tunglam nauphiat 13% tung zo lai zen hi.

America ah nauphiat numeite lak panin religious service ah kal khatin khat vei leh a tam zaw kikhawm leh kihel (biakna lamsang tawh ah kihel leh biakinn kai) numei 15% in nauphiat uh a, religious service ah a kihel ngei lo 41% in nauphiat uh hi. Numei nauphiatte abortion index kici sungah kiciamtehna a, abortion index value 1.0 assigned tawh population's average kikim hi. America ah abortion index metric zangin US Catholic ten nauphiat zah na ciamteh uh a, a ciamtehna uh Guttmacher Institute in 2000s in a nuhna ah abortion 1.00–1.04 kikal tung hi.

Tua mah bangin Protestants ten abortion index a piak uh 0.75–0.84 tung a biakna dangte (other religions) 1.23–1.41 tung a, non-religious women kicite abortion index 1.38–1.59 tung ahih manin Protestants numeite sangin Catholic numeite sungah nauphiat zah tam zaw cihna suak hi. Tua ma-in Roper Center for Public Opinion Research in study a bawlna US Protestants numei sunga abortion index 0.69 tung a, Catholics numeite index 1.01 tung a, Jews numeite index 1.08 tung a, non-Judeo-Christian religions numeite index 0.78 tung hi. "No organized religion" kicite index 4.02 tung hi.

1996 study in US ah nauphiat numei nga lak panin khat a piangthak khinsa numeite (born again Christian women) hi zen lai uh hi. Nauphiatna a deih leh zangte Christian a kici pha diak tata leh a piangthak khinsa mah na suuksia zaw uh cih kimu thei pah hi. Republicans party, adiakin Donald Trump hun in nasep leh policies hoih manifesto ding nei lo ahih manun abortion thu tawh vote leh political support zon hong hahkat uh hi leltak hi.

ANALYSIS BOX BY ANTHONY ZURCHER, NORTH AMERICA REPORTER

Kum 50 dektak pai khinsa hun lai-in US ah kha thum ciang naungek phate phiat theihna leh tua sangin a upa zawte phiat theihna ding ciangtanna SCOTUS in Roe vs Wade case vai Republican governers leh conservative anti-abortion campaignners mite ngawhna bangin a lungkimsak ding uh Trump in a guan' conservatives ten geelna a neih uh tawh kituakin 1973 Roe v Wade in abortion rights baseline a khun'na sia thei ding dinmun in om hi.

Roe vs Wade suksiatna a pian' leh a lamdang hilo a, US Supreme Court ah conservatives tam a tam zaw hi hi a, Roe vs Wade thukhenna lumlet ding lametna tawh Donald Trump in conservative thum guang hi. SCOTUS justices ten zingsangin Mississippi in naupang kal 15 pha khinsate nauphiat ding a khamna vai a genna uh-ah justice nga majority in gum uh hi. SCOTUS ah ideological center a nei den Chief Justice John Roberts in zong a tam zawte ngaihsutna thukimpih ahih manin Roe vs Wade in first-trimester abortion protections kici humbitna a piak kisusia thei ding bang hi.

Hih thu hangin abortion-rights supporters lamte deihna piang ding bang pian hi. Conservative justices dang Trump' guante lakah Amy Coney Barrett leh Brett Kavanaugh cihte in Roe vs Wade lumlet ding deih uh ahih states cihin abortion legality vai amau deihna bangin khensat ding uh tawh kibang hi. SCOTUS ah conservative justices ten lumlet dingin a khensat zongin abortion rights a deih state ten amau federal state right zangin bawl thei veve ding uh ahih manin America ah nauphiatna kibeisak zo tuam lo ding hi. Tua bang ahi zongin Republican ukna states 21 kiimte in Roe vs Wade thukhenna lumlet ding sawmin kum sawm tampi a kitomtom den anti-abortion activists pawlte sunmang a tangtun'na ding nai semsem bang hi.

America ah Jan 22, 1973 in Roe v Wade case vai SCOTUS in 7–2 votes tawh a thukhenna ah, US Constitution sunga Due Process Clause of the Fourteenth Amendment in naupaai numeite in nau a phiat noh leh nop lohna dingun suahtakna a neih uh fundamental "right to privacy" humbitsak hi, ci-in thu na khen uh hi. US Constitution a zahtak leh lenkip "law and order" party hi ung a kici Republicans leh conservatives hih 13th Amendment zadah mahmah napi-un US ah mass shootings ah mi kilom thahna dingin a kilim zat mahmah AR-15 leh automatic rifles tuamtuamte tawi theihna dingin 2nd Amendment puahphat ding zadahin US Constitution kilaih thei lo hi, ci zel uh hi.

SCOTUS in Texas law leh Mississippi law a gum zongin federal system tawh kiu-ukna gam ahih manin states tuamtuamin amau abortion law tek zang ding uh ahih manin kum cing loin nu leh pa mawhna bawlna, deih loh ding naupaai kha-in phiatna, kibuanna hang leh unau leh pata lup khawmna a bei mateng america ah nauphiatna kham zo ngei lo ding uh bang hi. Tua ahih manin US ah tengte adingin nu leh pa kipawl vet dah le-uh ahih kei leh neih leh neih kibang bek kiteng le-uh nauphiat kul sese lo ding hi.

A zawhmawh kampau a bat hangin Moses Pau' kampau leh, zang huksak lo, su huk sak sese kei uh hen la, dating, hotel leh party ah nupa bangin ut bangin phengtatna, pornography legalized sese dah vet le-uh hih zah liangin abortion thu America in buaipih het lo ding hi. Trump administration in judiciary body kimlai political body a suahsak SCOTUS in American Constitution tawh kituak loin political body bangin a gamtat niloh leh US gam buai semsem ding bang hi.

Source: BBC, Guttmacher Institute report and https://en.m.wikipedia.org/wiki/Christianity_and_abortion

@Thang Khan Lian #ZUNs