KIPUMKHATIN A OM KHAWM KIMLAI TAIKHIAT KHIT TEH A BULPI MAHAH VA CIAH KIKNA "FINAL DESTINATION" TUN'NA A KICI THEI ZEN TAM?

KIPUMKHATIN A OM KHAWM KIMLAI TAIKHIAT KHIT TEH A BULPI MAHAH VA CIAH KIKNA "FINAL DESTINATION" TUN'NA A KICI THEI ZEN TAM?

1907 in ah Chin Hills Baptist Association kiphuankhia hi. 1952 kum bei kuanin Chin Hills ah tuiphum Zo suan khempeuh kipawlna leh kupumkhatna dingin ZBC phuankhiat ding thukimna Falam, Tedim leh Hakha Association ten thukimna a neih khit zawh March 5-7, 1953 in Thantlang township general meeting ah ZBC cih dingin officially leh universally in kipsakna na nei uh hi. 1983 zong ZBC Triennial Conference ah delegates 434 paikhawmte lakah 424 deihna tawh democratic consensus in ZBC mah ci-in a national title dingin Zomi mah zat dingin vote khiatna tawh na kipsak beh lai uh hi.

1952 leh 1953 in tuiphum kipawlna khat in a national title in ZOMI "official leh universal" in zat ding a thukimna leh 1983 in general consensus deih loin Zomi min a seekneu nuamte makaihna hangin April 1995 in Khuasak ah ZBC Triennial Conference ah lengkhia (secede) kua teng hi mawk mah ahia? Zomi min tawh ''official leh universal" in biakna nangawn ah kipumkhat ding a ut loin taikhia napi-in Zomi kineih pha diak kineih pongin Zomite kipumkhatna leh kithutuahna ding zumna nei loin a gen ngam lailai sia nengnengte tam hi.

Khris sisan leh singlamteh phungah Zomi min tawh kipumkhat ding a ut loin a lengkhia leh a tangtat leh kitangpeek nuamte leh Zomi min zangin kipumkhat ding gengen pong napi-in makai za leh panmun leh sum deihna hang bek tawh kipawlna thak phuankhiat ding bek leh Zomi min sangin Zo suan ethnic dangte langbawl leh elna ding bek mission nasepna lian pen zah bangin a ngaihsunte Zomite kipumkhatna dingin kimakaihsak mawk leng githa nei khempeuh in makai za deihna tawh kipawlna thak phuan khia lel lo ding maw?

March 5-7, 1953 in Saikah, Thantlang township ah national title in ZOMI "official leh universal" in zat ding thukimna ah kihel, April 1983 in Khuasak during 5–9 April 1995 ah ZBC triennial meetings panin paikhia leh ZBC panin a lengkhia (secede) pen Tonzang Township Baptist Association (TTBA), Tedim Baptist Association (TBA), Kale Zomi Baptist Association (KZBA), leh Tamu Valley Baptist Association (TVBA) hi. Tua hi tuiphum kikhenna Chin state ah a pian'na thu sakhi tui nekin pan le'ng.

ZBC panin taikhia napi-in ZBC (Zomi Baptist Convention' 21st Triennial Conference Kalaymyo, Sagaing Division ah 21 to 24 March, 2013 neihna a thukimna bangun 1 April 2013 panin "Chin Baptist Convention" a kici ta) kizoppih Baptist World Alliance (BWA) tawh NASSAU, THE BAHAMAS ah Baptist World Alliance (BWA) 2019 Annual Gathering ah membership va ngen daidai veve in, a General Council vote khiatna tawh thukimna bangin BWA kum 114 cin' kum July 11, 2019 Wednesday in 240th member body a suak pan kuate hi mah ahia? ZBC/CBC kicite hi loin BWA member thak Zomi Baptist Convention of Myanmar (ZBCM) hi mah hi.

July 11, 2019 in BWA member thakin a lak lutna BWA Membership Committee chairperson Roy Medley in makaih a, “In his report, our President stated that nothing brings him more joy than baptizing new believers. That’s the way I feel when I bring the possibility of a new member before this BWA body. There’s a sense of joy that there are those who want to join us and become part of this movement that is blessing so many around the world," ci hi. Myanmar ah military nengniamna hangin Khristian pawlpi bei tuan loin a om suak laina thu a pahtakna in, "Their faith is strong. Their commitment to Jesus Christ is solid. They desire to expand their witness and their participation by joining this Baptist World Alliance,” ci-in Medley in na gen beh hi.

Nassau ah BWA 2019 Annual Gathering ah ZBCM ngetna leh lakna dingin General Council vote khiatna ah kihel dingin a va kuan ZBCM Consultant leh Superintendent Rev. Dr. Gin Khan Khual hi a, ama thugenna kammal zat lakah, “Today the Lord has blessed the Zomi Baptist Convention of Myanmar to become a member of the Baptist World Alliance and to participate in this conference. This is the result of much prayer. It has been a long journey, and today is the day we reach our FINAL DESTINATION,” cih kihel hi.

Khristian kici napi-in pawl khatte in vantung gam sangin gualgen minthang ZuEs peuh leh BWA peuh FINAL DESTINATION na hih tuak thong mawk hi. BWA General Secretary Elijah Brown hunin BWA members thak nih kila pen 2918 in a ngetna uh a BWA in a san'sak Carribbean ah tuikulh kigawm gamneu 2020 a gam milip 1.11 lakh (101,000+) kiim bek a pha leh poverty line nuai-ah tampi omna St. Vincent and the Grenadines panin St. Vincent Baptist Convention pawlpi khit a nihna ZBCM hi.

BWA application process tawh kituakin July 11, 2019 in ZBCM statement of faith, organizational history, convention constitution, registration documentation with the Ministry of Religious Affairs and Culture a support nading documents pia pan dihdih hi. BWA application review process tawh kituakin ZBCM pawlpi pen ZBC/CBC om khitsa mah regional BWA fellowships guk omte lak-a khat Asia Pacific Baptist Federation (APBF) ah zong member thak dingin na kila lut pan hi.

ZBC panin a taikhiat or lengkhia in 1993 ZBCM a kici leh July 11, 2019 in BWA 140 thakun a kibehlap pawl thakte 27,964 members pha a, church associations 190 pha meimai ta keei ta hi. Pawlpi bel khang hanhan kibehlap hanhan pong ven ahih hangin thu um mi bel kibehlap tuam dingin ka um kei hi. ZBCM headquarter pen Kalaymyo Myanmar hi a, tu lai takin a President Tuan Khan Mung leh General Secretary Lang Za Kap hi.

Taikhiatna pawlpi kizopna mun mahah tapa taimang bangin tun kik teh lungdam kohna in FINAL DESTINATION hong kitung hi, va cih liang zawzen pen Khristian kici taktakte final destination pen vantung gam ah Khris tawh mang khawm ding hi zaw ahih manin ngaihsun thei le'ng zumhuai mahmah hi. Ui bangin a luak khiatsa a nek kik khit teh FINAL DESTINATION hong kitung kik hi, cih tawh hong kibang pian hi. Taikhiatna munpi mah tawh kizom nuam veve leh va tung kik nuam veve pen tapa taimang vai mahmah hi.

ZBC/CBC kizoppih (affiliated) BWA, APBF, leh nasep khawmpih ecumenical organizations lakah Myanmar Council of Churches, Christian Conference of Asia, World Council of Churches leh World Association for Christian Communication cihte lakah ZBCM in a taikhiatna a parent body ZBC kizoppih khitsa BWA leh APFB ah membership 2019 July in na ngah hi ven, a mission om lai Myanmar Council of Churches, Christian Conference of Asia, World Council of Churches leh World Association for Christian Communication cihte tawh kipawl/nasep khawm theihna ding a mission lianpi om lai leh a DESTINATION dang kisap beh ding bang hi.

Pawl kikhenna leh a kumpumkhat kimlai panin taikhiatna leh lengkhiatna panin a bulpi ah va ciah kikna peuh Khristian thu upna ah "FINAL DESTINATION" tun'na hi, a kici thei leh ngam takpi ding hiam??? Thuman hi, gamtat kilawm ahih manin ciin' ding leh ki-etteh ngeingai ciat dinga hoih hi, a cih ngam huai takpi tam??? Lai Siangtho tawh kituak hi, a cih ngam huai zen tam?

Lai Siangtho sungah Paunak 26:11 in, "Ui in a luak a zuatkik bangin mihaite zong a haitat ngei bangin ta kik zel hi," na ci hi. Sawktak Paul in Korin mite a laikhakna ah, "Ahi zongin a nuai-a thu tawh kisai-in note ka hong pakta kei hi. Bang hang hiam cih leh pawlpi kikhopna na neih uh ciangin phatna sangin siatna na piangsak zaw uh hi. A masa penin, pawlpi na kikhop uh ciangin note lakah pawl kikhenna om hi, ci-in ka za hi. Hih ka zak thu a manna om kha dingin ka um hi. Bang hang hiam cih leh kua teng pawlpi mi citak ahi hiam, ci-in a kilatna dingin kikhenna a om mah ding ahi hi," ci-in 1 Korin 11:17-19 ah na gen hi.

Thang Khan Lian