LAI SIANGTHO' DEIHNA BANGA GAM UKPA LEH AMA DEIHNA TAWH KITUAKIN GAM UKPA KOI MANG ZAW DING NA HI HIAM?

 LAI SIANGTHO' DEIHNA BANGA GAM UKPA LEH AMA DEIHNA TAWH KITUAKIN GAM UKPA KOI MANG ZAW DING NA HI HIAM?

Sawltak Paul in, "A kuamah peuh in hong ukte’ thu na mang ciat un. Bang hang hiam cih leh Pasian’ thukimpih lohin kuamah in ukna thu nei lo hi; ukna thu nei i cih mite pen Pasian’ koih mite ahi hi. Tua ahih manin ukna thuneite a nialte pen Pasian’ koihsa mite a nial suak a, tua bang mite in thukhenna a thuak ding uh hi. Bang hang hiam cih leh gam uk mite pen a gamtat hoih mite’ kihtak ding hilo a, mi tatsiate’ kihtak ding hi bek hi. Ukna thu a neite kihta loin na om nop uh leh a hoihin gamta un. Tua hileh amaute in note hong pakta-in hong phat ding uh hi. Ukna thuneite pen note’ hoihna dingin Pasian’ nasemte ahi uh hi. Ahi zongin a sia-in na gamtat uh leh gim hong pia taktak ding uh ahih manin na lau ding uh ahi hi. Bang hang hiam cih leh amaute pen Pasian’ nasemte hi a, a sia-in a gamta mite tungah Pasian’ hehna bangin gim a pia dingte ahi uh hi. Ukna thu a neite in amau’ sep ding teng a kim takin a sep uh ciangin Pasian adingin na a semte hi uh ahih manin tua thu hang mahin zong mangmu a pia na hi uh hi," ci-in Rome 13:1-4, 6 sungah na gen hi.

Ukna thu nei i cihte pen Pasian' thukimpih loin ukna ngah lo mah uh a, Pasian' thukimpihna lo tawh a sia leh a pha a piang bangmah om lo hi. Pasian' thukimpih khempeuh zong ama' deihna hi den lo hi. "Hong ukte thu na mang un," cih hih Rome 13 sung siksanin thuneihna neite (authorities) thu khempeuh man' ding thu pen Medieval Age panin kinak gen mahmah a, Kumpite pen leitungah Pasian' lim leh mel (God's image) tawh gam uk hi ci-in Divine Rights of King kici na nei uh a, Kumpite a khial thei lo bangin kingaihsunin Pasian zahin kingaihsun uh a, mi dangte site nangawn mawhpih thei leh suhsak thei uh hi.

Sawltak 13:1-2 sung bek a deihna eukhia in ut bangbangun vaihawm theihna ding leh a ut bangbangun a vaihawm hangun a thu uh man' ding kinak gen mahmah napi-in, a nuai-ah bang gen beh lai hiam cih kithudon nawn lo hi. Democratic political society ah a kigen beh nawn lo leh i thudon loh a neu thumna panin a nuai-a kigelh teng a poimawh pen na hi zawsop hi.

Gam uk thuneite pen Pasian' thukimpihna bangin thuneihna len ahih manun a kampau bek uh hi loin a gamtatna uh leh ngimna geelna a neihte uh (policies) Pasian' deihna leh Lai Siangtho tawh a kituah kei leh Pasian langpangin a gamtang ahih manun a thu uh manna leh pum gupna pen Pasian' deihna tawh kituak loin a thuneihna a khengval in a zangkhial (power abuse) khat thapiakna leh kipawlpihna hi. Lai Siangtho sungah zong tua bangin kumpi hoih lo a dim a ha mah in na om hi. John Calvin in, "Pasian in mite tungah thu a khen nop ciangin gam uk gilote pia hi," a cih na man mahmah hi.

"Ukna thuneite pen note’ hoihna dingin Pasian’ nasemte ahi uh hi," ci-in Sawltak Paul in a gen mah bangin, tangpi tangta noptuamna (public welfare) ding, biakna tuamtuamte deidantuamna nei loin gam uk makaite pen mipite hoihna dingin gam uk hi bek uh a, a thu uh a mang lo leh lehdo kuamah om lo pah hi.

Ahih hangin gam uk makaite leh thuneihna neite in minam tuamtuam leh biakna tuamtuam leh ngaihsutna tuamtuam neite lakah angvantuam leh deihsak tuam (favoritism or nepotism), deidantuam leh muhdah tuam (discrimination or racism) nei-in gam hong uk ciang uh leh minam khat leh khat kideidantuamna ahih kei leh biakna khat bek angvantuam in, biakna dangte a deidantuam ciangin mipite hoihna dinga gam uk kici thei lo a, Lai Siangtho' deihna tawh gam uk hilo uh ahih manin langpan'na leh lehdona a piangsak ding gam uk suak zawsop hi.

Lai Siangtho sungah, “Nangmah na ki-it bangin na vengte na it in,” ci-in a genna Topa’ Thukham zui le-uhcin a hoih hi pah hi. Ahi zongin mi na deidan uh leh note a khial na hi uh a, Thukham a palsat na hi veve uh hi. Mi khatpeuh in thukham dang khempeuh a zuih hangin khat a khialh nak leh a vekpi-in a khial mah ahi hi. Bang hang hiam cih leh, “Numei leh pasal mawhna na bawl kei in,” a cipa mah in, “Mi na that kei in,” ci thuah lai veve hi. Numei leh pasal mawhna na gamtat loh hangin mi na thah nak leh thukham palsat mah na hi veve hi. Tua ahih manin mi a khahkhia thei thukham tawh kizui-in thukhenna a thuak ding mi bangin kampau-in na gamta un. Bang hang hiam cih leh hehpihna lungsim a nei lote tungah Pasian in thu a khen ciangin hehpih lo ding a, hehpihna lungsim a neite tungah Pasian in thu a khen ciangin a hehpihna in zo zaw ding hi, ci-in James 2:8-13 sungah na gen hi.

A zuih zawh thukham teng bek uh, gentehna dingin neih kibang kiteen'na (same-sex marriage), nauphiatna (abortion) zang ngei lo napi-in thukham dangte zui loin a palsat nilohte leh hehpihna nei loin phengtatin thu a khen den nuamte pen Pasian' deihna banga gam uk kici thei ngei lo hi. "Ukna thu a neite in amau’ sep ding teng a kim takin a sep uh ciangin Pasian adingin na a semte hi....," na ci napi-in a citlahna (ginatlohna) leh hilkhialhna leh sepkhialhnate khempeuh ah mawhpuakna (responsibility) bangmah la ngam loin mi dangte bek a mawhpaih leh ngawh den gam ukpa pen Pasian' deihna banga gam ukpa kici thei ngei lo hi. Pasian' bawlsa a it mite gim a pia ding bek-a gam uk gilopa hi zaw hi.

Lai Siangtho sungah, “Nangmah na ki-it bangin na vengte na it in,” ci napi-in a mipihte leh amah a pum gupte bek, a biakna kibatpihte leh a gam mite bek a it, mi dangte a deidantuam gam ukpa pen thukham khempeuh a palsat mah na hi veve ahih manin Pasian' deihna banga gam ukpa kici thei ngei lo a, Pasian in hehpihna nei loin a thukhenna thuak ciangin gimna lianpi ngah ding pa hi zawsop hi.

Lai Siangtho in, "Pasian khat bek om hi, ci-in na um hi. Tua pen hoih mahmah hi. Dawite nangawn in zong tua bangin umin lau-in ling deldel uh hi," ci-in James 2:19 sungah na gen hi. Tua ahih manin a kampau khiatna, a gamtatnate leh a ngimna leh geelnate a hoih lo vive neite pen dawite tawh a a kilamdan'na om lo ahih manin Khristian mite adingin makai muanhuai leh Khristian mite a humbit hi zaw loin Khristian mite lampi manlo ah a pialsak gam ukpa hi zaw bek hi.

Pasian' deihna tawh kituakin gam ukpa thu man' ding a kilawm leh a kituak hi. Ahi zongin mihing khatpeuh a hoih bukim (perfect) om lo ahih manin thuneina neite mittaw sialkhau len bangin mittaw bangin pum muanna pen thuman thutang gal lianpen na hi zawsop hi. Tua ahih manin, "Mi i muan sangin Topa belh ding hoih zaw hi. Uliante i muan sangin Topa belh ding hoih zaw hi." (Late 118:8-9)

 Thang Khan Lian #ZUNs