US GAL VANLENG NI 60 SUNGA TOM ZAW SUNGIN 7 KIA; CIK A KIA HI A, BANG HANGA KIA?
#Gone_in -60 Days
Aug. 13: Alamogordo, New Mexico pulam a om Holloman Air Force base ah Monday in US Air Force General Dynamics F-16C Viper 4th generation multi-role fighter lei a bawh dingin kia-in lei kidenna hi. Hih thupiang pen kha nih sanga hun tom zaw sungin US fighter jets sagih a kiatna hi ta hi.
Aug. 10, Monday 6pm local time in Holloman Air Force Base ah 49th Air Wing unit vanleng F-16C a bawh dingin kia hi. A hawlpa parachute in tuakkhia man ahih nak liam lua loin kikem lai hi. Bang hanga F-16C Viper kia hiam thu kician kipulakkhia nuam nai lo uh a, ahih hangin US Air Force leh US Navy fighter jets in buaina a tuah thupiangte khat khit khat kibehlapsak hi. A beisa kha nih cing nai loin US fighters jets sagih kia khinte lakah F-15s leh F/A-18Fs banah US in a kisialhpih mahmah a gal vanlengte lakah a suakthak pen, radar in a mat theih lohna ding ngimna tawh "fully stealth coated" in kibawl hi a cih uh - Donald Trump in, "Galte a lingsak a kimuthei lo vanleng hi," ci-in a pumphat cutting-edge 5th Generation F-35 nih kihel hi.
- June 30 in South Carolina a Shaw Air Force Base-a 20th Fighter Wing unite-te zat F-16CM a ngeina bangin training in a leng (routine training flight) kimlai kia a, a hawlpa si hi. A F-16CM vanleng kiat manin Shaw Air Force Base ah a meikuang lianpi (major blaze) piangsak hi. A vanleng hawlpa Lt. David Schmitz pen gam danga gal dona (overseas combat operations) a kuan dinga kithawi lai hi ci-in US military in gen hi.
- June 18 in training mission in a leng kimlai US Navy' gal vanleng suante lak-a khat ahi Boeing F/A-18F Super Hornet fighter jet Philippine Sea ah kia a, kamphatna tawh a hawl Navy pilots nihte tuakkhia man uh a, gal vanleng puakna teembawpi USS Theodore Roosevelt aircraft carrier tunga kinga leh a bawh helicopters ten a hawlte gel va hunkhia thei bilbel vanglak hi. Bang hanga Boeing F/A-18F Super Hornet fighter jet Philippine Sea ah kia hiam cih a hang US Navy in genkhia lo a, US military in thukankhiatna (investigation) kinei lai hi bek cih teng gen hi. A vanleng pen USS Theodore Roosevelt teembaw a kinga ‘Black Knights’ squadron unite vanleng hi dingin kingaihsun hi. Hih thupiang pen USS Theodore Roosevelt crew member a za bang zah hiamte in Covid-19 a ngah manun a kha a sim a kikhawlcip sak khit nungin Western Pacific ah operations dingin a kitaisak kik khit zawh a sawt lo-a thupiang hi.
- Tua khit zaw ni thum nung - June 15 zingsang in Yorkshire a North Sea tuipi panga kia US Air Force McDonnell Douglas' F-15C Eagle kia a omna mun kithei a kisia (wreckage) khinsa British Coast Guard ten va mukhia uh hi. US Air Force McDonnell Douglas F-15C Eagle kiat hun pen routine training flight in a leng lai takin a kia hi a, a hawlpa Lt. Kenneth Allen si hi. A vanleng kingakna phual pen Galpi Nihna hun in British 48th Fighter Wing RAF ten Lakenheath base a zat uh hi a, US in Galpi Nihna khit nungin operations a neih dingin a zat uh ahi hi.
- June 9 in Utah’ Hill Air Force Base a 388th Fighter Wing unit' Lockheed Martin F-35 Lightning II fighter jet a ngeina bangin a kilengsak (routine flight) lai-in a bawh ciangin a khawlsakna (landing gear) kisia in a bawhna ah bawhkhia ahih manin a hawlpa in liamna tuak ahih manin medical evaluation bawl kisam hi. Lockheed Martin F-35 Lightning II fighter jet kiatna hangin Utah’ Hill Air Force Base kisia ahih ahih manin a base’ airstrip kikhaklawh liang a, tua airbase a vanleng omte a kiim-a airfield ah kihemkhia liang hi.
- June 9 in Lockheed Martin F-35 Lightning II fighter jet Utah’ Hill Air Force Base a kiatna thupiang pen May 19 in zan lai-in eastern Florida a Englin Air Force Base a F-35 fighter jet dang khat night training sortie in a leng kimlai a kiman'sak (lost) khit nunga thupiang ahi hi. Eglin Air Force Base a kinga 5th Generation F-35 a kimangsuah hun in kamphatna tawh a hawlpa tuakkhia man ahih manin $80 million man a vanleng leh a hawlpa in liamna (casualties) tuak hi cih report bangmah kiza loin hih thupiang tu dong ki-imcip hi.
- Hih thupiang ma deuh in in US military in a vanleng neihte lak panin a suan' penpen 43rd Fighter Squadron unit-te Air Force Lockheed Martin F-22 Raptor stealth fighter khat May 15 zingsang in Englin leilu-nisuahna lamah kia a, a hawlpa tuakkhia man hi. Reports in a genna ah F-22 Raptor fighter pen Covid-19 pandemic dona ah panla - healthcare workers, first responders, military leh a dang dangte tungah lungdamna lahna dingin Donald Trump' vaihawmna leh thu theihna in “America Strong” flyover tour in a lengsak uh ahi hi.
Cold War-era hun panin a kizang F-15s leh F-16s panin a suaktak stealth fighters ahi F-22 Raptor leh F-35s fighter jets hih bangin a kiat zom vengveng pen a vanzatte a lui (ageing equipment) man hilo hi cih kimu thei hi. US military in kha nih zong kivei man loin a gal vanleng sagih kiatna ahih kei leh tuahsiatna thupiangte a hang genkhia nuam loin a imcip den lai hangin a vanleng hawl zia kisinna a kicinglahna ahih kei leh kicing zawh lohna (inadequate pilot training,) a vanleng vante in a nasep ding bangin a sep lohna (hardware malfunctions), a software vante thakhat thu-in tawkhat sung nasem lo ahih kei leh nasep ding bangin a sep zom lohna (software glitches) leh buaina dang tuamtuam a neihte hang hi kha ding hi. Tu ciang dongin kha nih bei man loin US fighters jets sagih a kiat khitna vai tawh kisai a hang a kithei a omsun pen friendly (US pr NATO) airspace sungah "routine training" kici a ngeina bangin kisin in a leng lai takin a kia vive hi bek a, gal kidona ah leng hi leh bang zah a kia tam cih ngaihsut tham lianpi ding piangsak hi.
US gal vanlengte tuahsiatna pen a ciamtehteh tham cing hi ta hi. A diakin April 2003 in US in US in Iraq gam a va sim lai-in US fighter jet F-15E khat Tikrit, Iraq airspace ah a galte uh galdo mite (enemy combatants) ten na kapkhiatsak uh hi. Tua ma-in US in a gal vanleng neihte lak panin a kisialhpih mahmah uh - galte radar in a len'na a muh leh a theih theih loh "stealth aircraft" a cihte uh lak panin namkhat ahi stealthy F-117 Nighthawk bomber khat leh F-16C khat 1999 kum in US makaih NATO coalition gamte in a bomb khiat lai-un Yugoslavia gam-ah Serbia galkap ten na kapkhiatsak hi.
US stealthy F-117 Nighthawk bomber vanleng 27 March 1999 in Yugoslav army ten 1961 kum panin a kizang Soviet-era hun- kibawl S-125 Neva/Pechora surface-to-air missile tawh na kapkhiatsak ziau thei uh ahih manin "stealth fighter jets" kici radar in a muh leh a mat theih lo (undetectable) fighter hi kicici pen zuau thu a suah banah Yugoslav gam mite in a zahkona dingun, "Sorry, na vanleng uh a kimu thei lo (stealth) ahih lam ka thei kei kha uh hi," ci-in nasia takin propaganda khah uh a, tu dong US stealthy F-117 Nighthawk bomber kia Serbia gam-a Belgrade Aviation Museum ah muhtheih dingin a them kisiate (wreckage) mipi et dingin TROPHY dingin kem in kikoih lai hi. Yugoslavia in US stealthy F-117 Nighthawk bomber them pawl khate study bawl dingin Russia leh China kiangah khak hi.
Sources: Sputnik and History of Yesterday
No comments:
Post a Comment