NGAIHSUTNA HOIH LOTE NUSIATSAN IN NGAIHSUTNA HOIH LEH THAK TAWH KALSUAN TA NI

 

NGAIHSUTNA HOIH LOTE NUSIATSAN IN NGAIHSUTNA HOIH LEH THAK TAWH KALSUAN TA NI

"Hai (glass) khat sungah tui a dim om hi; a kimkhat ciang bek om hi; a khat hawm hi ahih kei leh a kimkhat dim hi; a hawm hi," cih tawh buaite pen, "Tua hai sungah tui dim khin zo ahih manin tui sun' beh theih nawn loh hi; a kimkhat om khin zo hi; a hawm hi," cih tawh a lawh ding dan bangmah thei zo nawn mahmah loin a buai gawp mite' ngaihsutna hi.

Hai sunga tui a dim khinsa in a om hangin a limcit kei leh buak khiat theih a, tui siangtho suak kikin a dim dong in sun' kik theih hi. A kimkhat bek i kham ngap kei leh a dim dong tui sun' beh theih a, i kham kei leh suah beh theih lai hi. A hai a hawm ahih leh i duh zahzah suakin i kham dong dawn theih lai hi cih ngaihsutna neih theih hun hi ta hi.

Ei Zokam sungah zong kammal hoih nono om napi-in, midangte in zang ta cih tawh midangte cih bang teekteek mah kammal zatpih sawmna pen, "I mai-a pai pen in lawi ek a sik leh en zong sik teitei ding hi; ek a nek leh en zong nek hamtang ding hi; kensang ah a tuak lum zongin ei zong tuah loh phamawh hi," cih ngaihsutna hi.

Kammal kilawm zaw zat ding a om leh laih ziau zawk pen guallelhna leh haina ahih kei leh mindaina ngahna ding hi loin pil vai zaw in, thukhual vai zaw hi. Zomi, Zolei, Zolai bek ci-in kampi bek tawh ot hun hi nawn lo a, a mite it-in huai in, a leitang leh a lai i zuun hun hi ta hi. Tangmai Festival zong Cucumber Festival i cih lanlan tuan loh bangin (Tangmai Pawi cih dingin khum zaw lai), i pawi minte, i minam nite, vai khat peuhpeuh tangpi tangta kipawlna dingin i bawlte ah Zokam mah zat tangtang hun ta hi. Biakna leh a dangte zong khen thei mel loin mi'n lasak kidemna min dinhi Lai Siangtho sungah kammal a zakdahhuai mahmah IDOL zang ta ci-in a kammal kipatna leh khiatna bulpi ngaihsut man lo liangin mot zat pah ding cih thukhun om lo hi.

Ei Zokam sunga kammal a kinak zat mahmah kamsia zat i kidem leh social media sung khawngah a zat i kizelhsak gawp (viral) bangin kammal hoih leh khum nono i zat ngei mel lohte zong viral sak ding kisin leh hanciam huai mahmah zaw kha ding a, zong khantoh vai zaw leh Khristian ngeina vai tawh kituak zaw ding hi. I kammal hoihte en zang kei le'ng kuama'n hong zatsak lo ding a, i tu i tate in hong mangngilh ziau in, pau mangthang a suah khakna dingin lampi keek behbeh hun hilo hi. I pawi minte zong mikang kammal khawng tawh i laih themthum khak ding baihlam bang ta hi.

Hai sungah tui a kimkhat hawm hi ahih kei leh a kimkhat dim khin zo hi cih tawh kinialnial in, hai sungah tui sun' beh theih hi cih ngaihsun man lo liangin leitung bei dong buai hun hi nawn lo hi. Hai sunga tui om lo ahih kei leh om zah tawh i buai lai teng a tui om zah na kilamdang tuam lo ding hi. A hoih zaw, a man zaw, a kilawm zaw omte zuih pah a, zat leh saan' theihna pen minam picing leh khangtote ngeina hi zaw hi. Kikhekna;kilaihna (change or transformation) kihtakna pen khantohna ding dalte lak-a gal lian pen hi.

Zogam a om va-ak ten "ak ak ak" ci uh a, gamdanga om va-ak ten zong "ak ak ak" mah ci uh hi. A omna gam uh a kibat loh hangin a ham dan uh kibang veve a, "ba ba ba, ku ku ku," peuh ci-in ham tuan lo uh hi. Va-ak utong kineih kei ni; utong kimlai va-ak kisuaksak kei ni. "Ka sisan laih thei kei ning, ka minam khek thei kei ning," cih la a sasa minamte ihi hi. I lasakte khawng a bat in sasa nawn kei ni. A hoih lo, a khantoh vai lo leh i ngeina leh i biakna tawh a kituak lo ngeinate mittaw sialkhau let tentan niloh keei khah in, i sila lungsim paikhia in, ngaihsutna thak tawh kalsuan ta ni.

✍️ Thang Khan Lian #ZUNs