CHINA' NATIONAL DAY (ANALYSIS) THAHATNA NEI BANGMAH IN CHINESE NATION LINGSAK ZO LO DING HI: XI JINPING

CHINA' NATIONAL DAY (ANALYSIS)

THAHATNA NEI BANGMAH IN CHINESE NATION LINGSAK ZO LO DING HI: XI JINPING

Oct. 2, Nilai: Zan in People’s Republic of China (PRC) a kum 70 cin’na ni pawi hun in grand military parade etkhiatna a neih ma-in Chinese President Xi Jinping in “One-China” principle bulphuh in Communist Party leh People’s Liberation Army (PLA) in a heekna heekin (steered) in, gam mite kipumkhatna tawh China in kilemhuai takin a khan’tohna (peaceful development) a ngimna ngah ding hi ci-in a ciamna kipsak pha kik hi.

A tomkim in Chinese President in Tiananmen Square ah minute giat sung a thugenna ah PRC’ kipatna bul zungsan (red-roots) nak gen diak a, China in kum zalom nih sungin a ngimna nihte – 2021 in zawn’na (poverty) beisak ding leh 2049 ciangin advanced socialist gam khangto suahsakna dingin mansa-in ki-om ta hi ci-in gen hi. “Thahatna nei bangmah in Chinese nation mainawtna lingsak zo lo ding hi,” ci-in President Xi in gen hi.

President Xi in PRC hong kipatna bul leh baal a suutna ah US tawh China kikal a “trade war” hatang leh Hong Kong khuapi-a buaina lian thu zong inspection rostrum ah Mao’ puan (suit) tuampian khat a silh kawm in gen hi. Communist Party makai lui thumte — Jiang Zemin, Hu Jintao leh Wen Jiabao omna munah President Xi in a thugenna ah, PRC phuankhiapa Mao Zedong min bek lo a, 1978 kum in China gam-a reforms pankhia lak-a makaipi Deng Xiaoping min lokha lo hi.

“Xi in People’s Republic of China (PRC) phuankhia Mao’ min bek gen in, tua kikal ah tu huna gen ma-in China’ tangthu leh tuanthu (history) gen pelh hi,” ci-in CPC newspaper Study Times deputy editor lui Deng Yuwen in gen hi ci-in South China Morning Post in suaksak hi.

China in grand military parade 80 minute sung a neihna ah a masa penna dingin a galvan neih 40% lahkhiatna nei a, President Xi in midangte ngaihsutna tawh kilamdang pianin ama ngaihsutna a genna ah “One-China” principle tona bawl peuhmah tungah thuakzawhna bangmah kilak lo (zero tolerance) ding ci-in "One-China" principle a hun vang kim in dotna bawlin China panin a lengkhiatna dingin gamtatna (separatism) omna Xinjiang leh Tibet, leh suahtakna deih pawl (pro-independence) politics omna Taiwan leh South China Sea (SCS) tuipi tunga buainate (maritime disputes) omte ah thuakzawhna kilak khum lo ding hi ci hi. SCS ah US Navy omna leh a galvilna (patrols) hangun West Pacific ah China-U.S. kikal ah kikangtuahna leh kinan'tuahna piangsak den hi.

“I mainawt kawm in kilemhuai takin kipumkhatna (peaceful reunification) a pian theihna ding, ‘One country, Two System’ a om theihna dingin strategy i letkip kisam hi. Hong Kong leh Macau in saupi khan’tohna leh hauhsatna leh kip leh kho (long term prosperity and stability) in a om theihna ding uh, cross-strait relation ah advance peaceful development i hanciam ding, i gambup kipumkhatna ding leh i gambup a kipumkhat kikna dingin i hanciam ding uh kisam hi,” ci-in President Xi in gen hi.

Chinese President Xi in Chinese sovereignty, security leh gam ngimna tangtun sakna dinga ngimna (interest) leh leitung bup ah kilemna a om theihna dingin PLA in mawhpuakna lianpi nei hi ci-in gen hi. China pen global powers lakah mawhpuakna nei hi ci-in President Xi in a genna ah, "China’ ngimna pen mailam hun in mi khempeuh in mi kipawlkhawmna neihkhop ding - 'community of shared future for mankind' pian’sak ding cih ngimna kinei hi," ci hi.

Ahih hangin Chinese National Day ni-in China’ military thahatna (might) kilahkhiatna pen US leh a kipawl gamte lehnan’na ding ngimna hi.

State-of-the-art weapons

Tuesday’ grand military parade hun-ah China in Washington leh Beijing kikal a digital ah kihalna guam (gap) neu semsem hi cih lahna dingin amau khut tawh a bawlkhiat uh “intelligent” weapon systems, quantum computing ah a mainawtna uh, Artificial Intelligence leh big data lahkhiatna nei hi.

A masa penna dingin Beijing in tuinuai-a underwater drone a kilahsak ngei HSU 001 system zong lahkhiatna nei hi. Military parade lahna hun Chinese military drones nam tuamtuamte zong kilak hi. Tuate lakah missiles ahih kei leh laser-guided bomb kithuah thei-in radar detection system in a mat leh theihkhiat theih loh ding leh radar absorbent material tawh kithuah WZ-8 supersonic targeting drone leh Sharp Sword stealth drone cihte zong lahkhiatte lakah kihel hi.

US leh Taiwan’ tungah message kician takin khakna dingin People’s Liberation Army (PLA) galkap ten galvan tampi (multiple warheads) tawh leitung bup a ngimna mun khatpeuh a kap ban ding road-mobile DF-41 intercontinental ballistic missile (ICBM) zong lahkhiatna nei uh hi. Chinese in a thahat leh septheih hau mahmah nei-in, a hatna (speed) a manglang luat manin leitunga missile defense system om khinsa khatpeuh kapsia thei ding leh hypersonic glide vehicle a pua thei DF-17 ballistic missile zong lahkhiatna nei hi.

Tua loin gal vanleng puakna teembawte (aircraft carriers) kapsiatna dingin China in a galvan neih missile tumdang DF-21D missiles zong lahkhiatna nei hi. DF-21D missiles pen China in Pacific a US in a thahatna a lahna suksiatsak theihna dingin a bawl ahi hi.

Chinese ten nuclear zat masak ding (nuclear first strike) khawlsan ding ngimna tawh atomic weapons a kizatna mun-ah a lehsuam kikna (counterattack) bawlna dingin “second strike capability” neih ding nakpi takin hanciam uh hi. Tua banga zat dingin a masa penna dingin military parade ah JL-2 missiles lahna zong nei hi. Hih JL-2 missiles kicite pen Submarine Launched Ballistic Missiles (SLBM) hi a, advanced Jin-class nuclear submarines ah kizang dingin ki-um hi. JL-2 missiles in a kap dingin ngimna tuamtuam (strike options) nei a, Chinese tuipi pang ahih kei leh tuipi thukna a om submarines omte zong a kapna dingin kizang thei hi.

China in a gam kianga tuipi panin JL-2 missile lawnkhia leh US gam-a Alaska dong kap ban a, Japan leitaw lam-a tuipi panin lawnkhia leh Hawaii baihlam takin kap thei hi. China in a gam nitumna lam-a tuipi ahih kei leh Hawaii nisuahna lam panin KL-2 missile a zat leh US continental nitumna lam leh state 50 teng adingin lauhuai thei hi.

Tua loin China in conventional weapons leh nuclear weapons nam tuamtuamte huih lak panin lotkhiat theihna dingin nakpi takin hanciam uh bang hi. Tua banga zat dingin longer range missile strike capability nei H-6K bomber vanleng zong military parade hun ah lahkhiatna nei hi. Tua dingin a tui bawm golzaw (additional fuel storage) H-6K bomber ah kithuah beh ahih manin cruise missiles 2,000 km range dong kap ban ding ahih manin Alaska, Guam, Hawaii leh Japan kiim teng kap ban kha zo ding cihna hi.

China in a galkapte thahatna a lahkhiatna Sydney-based Lowy Institute’s International Security Programme director Sam Roggeveen in, “Beijing’ galkap thahatna mainawtna leh khan’tohna (military advancement) in Asia ah US military thahatna thakhat thu-in tuikhang bangin taai (erodes) a, hun sawt (long-term) adingin Asia ah America’ military primacy (masakna) lauhuaina ahih kei leh vauna (threat) piangsak hi,” ci hi ci-in Reuters news in gen hi.

Source: The Hindu

@ Thang Khan Lian

N.B: Beijing khuapi-a The Hindu correspondence Atul Aneja’ analysis bawlna i Zokam tawh hong kitei sawm pak ahi hi.