MAKAI NAM NIH OM HI

MAKAI NAM NIH OM HI

Ni dang lai-in a vanglian leh a hausa mahmah kumpi khat in tanu melhoih mahmah khat nei hi. Ni khat a tanu hong cina a, an leh tui bangmah duh lo hi. Kam dam tawh zolna leh aanna tawh nawhna hangin an leh tui piak zawh ding hilo hi. An leh tui ne lo dawn loin om den ahih manin nisim in a tha kiam semsem a, a dam zawh ding lametna om nawn lo hi.

Kumpipa zong cimawh lua ahih manin a tanu kiangah, "Bawi aw, na deih peuhmah hong ngen in. Nong nget peuhpeuh - ka kumpi gam bup leh hauhna khempeuh ahi zong kong pia ding hi. An ne tui dawn kik ta peuh in," ci-in va zol hi. A tanu in, "Pa aw, khapi ka deih hi. Khapi hong pia lecin an ne tui dawn kik zo pah in ka dam kik zo pah ding hi," ci-in dawng hi. Kumpipa zong cihna ding thei loin a tanu' omna dei sung panin mai khing dimdem sa-in pusuak a, a tanu zak loh dingin a dei sungah kong kipua kalh khum in deih takin kapkhia baba hi.

Tua leh kumpipa in a gam sunga mipil misiam khempeuh a nasemte manlang takin sam sakin hong kkaikhawm uh a, "Ka tanu adingin khapi hong laksak thei na om kei uh hong that khin ding hi. Ka tanu adingin khapi hong laksak thei na om uh leh ka kumpi gam phel langkhat kong pia ding hi," ci-in kumpipa in ciam hi. Kumpipa' mipil leh misiamte khat beekin khapi lak ding dan thei lo uh a, cihna ding thei loin lau in liing deldel in a kithah kal ding bek uh ngak uh hi.

Tua hun lai takin hih thu a zakha sikseekpa (blacksmith) kumpipa kiangah hong pai a, "Na khan sau ta hen a vanglian kumpipa aw! Na tanu adingin khapi kong laksak ding hi. Ni thum sung hong ngak lecin khapi hong va laksakin kong tawi ding hi," ci-in khukdin in hong gen hi. Kumpipa zong nuam lua lungdam lua-in nui peekpak a, sikseekpa kawi in manlang takin an lim penpen lui pah samsam a, ciahkik sak pah hi.

Ni thum khit ciangin kumpipa kiangah sikseekpa hong pai kik hi. Kumpipa in khapi tawh hong tawi lo hi cih a muh ciangin a thangpai mahmah a, hong khem teh ci-in kumpipa in amah a cing mihatte in thahna dingun mansak hi. Sikseekpa in, "Hilo hi kumpipa aw... Na tanu hong musak lecin ken a deih ka nei hi," ci-in kumpipa in a tanu omna dei sungah a lutsakna dingin thum hi. A thumna bangin kumpipa in lutsak hi.

Sikseekpa in kumpipa' tanu lupna dei sungah amah bek lut khinkhian in a ip sung panin khapi lim tawh kibang lian in a seek a dum dide khat hong lakhia-in kumpipa' tanu lak hi. Kumpipa' tanu in tua a muh ciangin, "Ka lawng khak loh khapi sangin etlawm zaw a, khapi taktak sangin etlawm zaw hi," ci-in sih ding ngakin a lupna tung panin lungdam maitai seisai sa-in hong thoto buatbuat a, an ne tui dawn kik in a tha hong hat kik pah hi.

Ngaihsutna hoih nei-in ama ngaihsutna bek man sa-in a paihpih ngaungau makai (kumpi) khatin nungzui ding tawlkhat sung nei tei sam napi-in, ama ngaisutna bangin na khempeuh a piang zawh loh ciangin thanem in lawhsam pah ahih manin nungzui ding ngah zo nawn lo uh hi.

Ngaihsutna hoih nono a neihte bek hun sa loin a nungzuite ngaihsutna hoih teng tawh a gawmkhawm makai (kumpi) khatin a nungzui ding tasam ngei loin tama ngei lo a, ama ngaihsutna tawh na khempeuh a piang zawh loh ciangin a nungzuite ngaihsutna hoihte zat khiat ding tasam ngei loin lawhsam ngei lo ahih manin makai hoih leh muanhuai suak hi. A nungzui ten muantak sa uh ahih manin ama tang dinga si ngam mi tampi a om in, a nuntakna uh a piakkhiat ngam ban uh-ah makai muanhuai ding tampi piangkhiatsak thuahthuah lai uh hi.

I simmawhna leh neumuh pente, i hai bawl pente zong i cihmawh tawp khong hun ciangin hong huh dinga muanhuai pen suak thei a, ngaihsutna hoihpen nei leh ngaihsutna hoihpen hong pia theite na hi thei hi. Makai khat hih manin nungzui leh nautangte ngaihsutna a neumuhsak khak ding pen khialhna lianpi piansakna ding suak baih mahmah ahih manin lauhuai hi.

🖋️Thang Khan Lian