I MINAM IT ZIA KOI CIA, KOI CIANG HUAM CIH KISITTEL PHA KIK NI

I MINAM IT ZIA KOI CIA, KOI CIANG HUAM CIH KISITTEL PHA KIK NI

November 14 panin i minam sungah political opportunists leh vested interests neite kisam lopi-in mimal kinawktuahna hong pian khak manin i minam sungah kikangtuahna tu dong dai nai loin press releases (PR) gal nasia thei lai mahmah hi. PR kikhah khempeuh haipih pah henhan loin i minam sung kipumkhatna leh cidamna dingin kampau i kidop hun hi. Guptuam leh paihtuam nei hun hi loin i minam kipumkhatna ding bek ngaihsut hun hi.

Hih bang thu om ma-in i minam vai kikupkhawmna munte ah Kawlgam politics thu ah comment pia kha leng India lamte nong kitaklahna ding om kei hong kicihsan eueu ka tuak mun mahmah hi. Tu-in Lamka lam a minam leh namke kikal sungah kitelkhialhna dek pianna hong piang ciang Kawlgam Zomi ten zong hong awlmawh sam in hong pau khak ciangun Burma lamte nong kitaklahna ding uh om kei cihsan eueu uh hi. Zadah thei mahmah leuleu uh hi.

A kipat cil in mimal kinawkte amau mimal buaina hi ci-in ngaihsutna nei thei in, amau zong i pu i pa' ngeina leh i Khristian ngeina bangin inndongta level ah kimaisak le uh hih ciang dong kitung lo ding hi. Mai lam hun ah mimal buaina pen mimal buaina bangin koih in, inndongta level ah ven' sak ziauziau theih teng vengsak in khai kikaih awkna dingin police case dong leh PR pheng khah khiat kidophuai mahmah hi.

Ei Zomite pen patriotism ciang galmuh nai lo, nationalism ciang nangawn zong lungsim nei nai loin i minam itna pen radical chauvinism, ethnocentrism leh regionalism ciang bek hi pan hi cih guh dawk liangin kitel sinsen hi.

I ngaihsutna kawcikte uh i taanzausak mateng uh i minam kipawlna paallun ngei loin a neu seek semsem ihi hi. Minam it i kineih pong hangin i Zomi muhna kawcik lai mahmah a, minam it mel ki-om vet lo hi cih kimu thei a, hong kidawkkhia hi. Minam it ci-a kuku lanlan teng mah in minam leh namke sungah kitelkhialhna ding behlap in kuangsak zawsop uh hi. I minam it zia koi dan hiam? Namke dangte neuseekna ding ciang bek maw? I minam leh namke itna in kikhenna ding piangsak beh maw, kipumkhatna ding piangsak zaw maw? I minam itna i neih zawh kei leh i namke/nambing sung beek ah kikhenna piangsak beh kei ni. Kingaihsun pha kik in, kisittel pha kik ni.

A lungnem mite in Pasian’ ciamsa leitang ngah ding uh ahih manin thupha ngah mi ahi uh hi. Pasian’ deih teng sep ding a hanciamte Pasian in lungkimna ngahsak ding ahih manin thupha ngah mi ahi uh hi. Midang a hehpih mite tungah Pasian in hehpihna pia ding ahih manin thupha ngah mi ahi uh hi. Kilemna ding deihin a hanciam mite in Pasian’ tate cihna ngah ding uh ahih manin thupha ngah mi ahi uh hi.
(Matthai 5:5-7, 9)

✍️Thang Khan Lian