DEVELOPMENT PROJECTS LEH NGIMNA KHAT PEUH I NEIH LEH....
Khantohna ding ngimna leh geelna tampi i neih hangin geelna leh sepkhiat ding dan kician om lohna mun ah i ngimna leh sepkhiatna ah matutna kician om lo hi. Tua ahih manin development project or scheme bawlna dingin a kisam mahmah pawl khat:
1. I ngimna (goal) kician nei masa ding. Plan A, B, C ciang beek nei ding. Ngimna laih thumthum in a ngimna kung (goal post) laih thapai den lo ding. Sailungtang khat tawh vasa nih kapkhiat sawm lo ding.
2. I ngimna tunna dingin i sepkhiat zawh hun (mission accomplished) ding geel khol masa ding. Short-term leh long-term ngimna nei ding. A term tawh kituakin sepkhiat zawh teitei ding hanciam ding. Mipite lungneuna ding leh lungbuaina dingin a term hun sot beh toto themthum lo ding.
3. I ngimna i sepkhiatna zawhna dingin i ngimna hong thukimpih, i sepkhoppih theih ding i lungsim kibatpih team members muanhuai seh in, panmun pia ciat ding. Team members teng i ngimna kahlei (ladder) ah kahsak in makaih ding. Development project or schemes khat peuhpeuh mimal (individual) bek tawh sepkhiat zawh ding hi loin nasemkhawm a pankhawm (team work) kisam hi. Tukpeng kimawlna tawh kibang hi. Panmun leh tavuan hawm kisam hi.
4. I nasep ding hilhcian/gencian in geelcian (define your work) ding. Lim tak-a geelna nei lopi a nasepna pen a kung i tun hangin lamet bangin hoih zo ngei lo hi.
5. I ngimna tawh mainawtna a, khantohna ding bawl a sepkhiat ding. A tang lo a mainawt lo ngimna hilo ding (Develop your plan and delegate smartly)
6. Vaihawmna tawh semkhia ngiat ding, encik den ding (Execute and Monitor continuously). Nasepna muanhuai maw, kip leh kho ding tawh cih i sep hun teng encik den ding.
7. I nasepna ah hih khialh bawl khialh i neih leh mawhpuakna, sim theihna leh ciamteh theihna (responsibility leh accountability) la ngam ding, i nasepna seelsim loin a kimupailet thei (transparency) ahih ding. Transparency om lohna ah thumanna tawh nasepna piang zo lo hi.
Development project or schemes leh infrastructure lamsang ngimna nei lo om lo a, a hanciam lo leh a sem lo omna gam om lo hi. A team leader leh a team work a kihel teng hong pankhawm siam ciangun a ngimna leh geelna bangin semkhia zo bek uh hi.
Nambat 6 leh 7 a om lohna mun ah sepkhiatna om napi sep leh bawlna a ki-etcik lohna leh sepkhiatna ah mawhpuakna la ngam a om loh ciangin sepkhiatna om tei sam napi a gina om lo a, nekgukna leh golhgukna omna ding mun om golpi hong om pah ahih manin nasepkhiatna a om tei sam hangin kho loin kip lo a, sawt a kimang om ngei lo hi.
✍️Thang Khan Lian
No comments:
Post a Comment