MEDIA LEH SUAKTA TAK-A PAUKHIAT THEIHNA SAKOL MUK BANGIN BANG TAN VEI TUAMCIP LAI DING MAW?

MEDIA LEH SUAKTA TAK-A PAUKHIAT THEIHNA SAKOL MUK BANGIN BANG TAN VEI TUAMCIP LAI DING MAW?

Mediate ten thu suakta takin a suah theih lohna ding uh hanciamna leh media bet daih sawmna mun ah minam sung, khua leh tui (society) ah thuman kibengdai a, mipite in thuman leh thuzuau mu thei lo dingin khuamial lak ah koicip ahih leh a mit uh tuamsakna leh mipi muk an ne thei lo dingin sakol muk tuamcip sak banga hencipna hi.

Media pen cih pen democracy adingin a khuampi lina (executive, legislative leh judiciary khit) hi a, mipite mit leh bil hi a, mipi ngaihsutna (public opinion) hatsakna ding leh ngaihsutna tangzaisakna dinga poimawh pen ahi hi. Media a suahtak lai teng thuman leh thuman lo, golhgukna, nekgukna leh thuman lohna mipi ten kithei thei a, thuman leh thuman lo kikhen tel thei bek hi. Suakta takin i paukhiat theih hangin upmawh teng leh thuman lo teng leh mi hehna ding leh a man lopi-in a minsiatna ding uh gen theihna ding hamphatna (rights) kinei tuan lo a, tua bang i gen leh i hamphatna a zang khial (abused of rights) kisuak pah a, a khial leh mi hehpihhuaite kisuak ding hi.

India gam Champaran, Bihar ah Mikangte gam keek lai a piang British mi leh tangpi tangta lam (social) thuman lohna, party khat bek a ki-ukna (totalitarian) langpang George Orwell in bang gen hiam cih leh "Suahtakna i cih a khiatna khat beek a neih ding leh, midang ten a zaknop loh ding hilh/gen theihna dingin hamphatna (rights) hi,"... "Leitung bup ah thuman lo tawh kikhemna a om ciangin thuman genkhiatna pen thakhat thu-a kilaihgawpna pian'sakna dinga nasepna (revolutionary acts) hi," na ci ngiau hi. Mi dangte zakdah ding va gen pah ding hi a ci hi loin, thuman lohna tawh kivaihawmna leh ki-ukna mun ah kuamah in a zak nuam loh thuman va gen ngam ding kisam hi a cih nopna hi zaw hi.

US gam phuankhia ci-a ciamtehte lak-a kihel leh US President masa pen George Washington (1732-1799) in, "Suakta tak-a pau theihna (freedom of speech) kiphiat hi leh gawh dingin a kikai tuu ham lo pau loin a dai dide i bang ding uh hi," na ci hi. Media suahtakna leh suakta tak-a ngaihsutna genkhiat theihna (media freedom & freedom of speech and expression) hamphatna i neih mateng kumpite leh makaite thuman lohna, nek simna, golhgukna, ngongtatna, mulkimna bei a gamtatna leh thuman lo thahat ding hi cihna hi a, mipite pen gawh dingin a kikai a ham lo tuuno leh a dai dide a ham lo tuu mul a kimetsak tuu i bang ding hi.

I gam cidamna ding, thuman leh thuman lo a kimuh pailet (transparent) theihna ding leh mipite in thuman leh thuman lo i khentel theihna dingin media suahtakna leh mipite suakta takin i paukhiat ngam ding kisam ta hi. Thuman lo sawt ki-imcip lua ta ahih manin thuman lo teng peuh thuman mah a sasa tampi om ta a, thuman leh thudik in mun luah zo nawn loin, thuman leh thudik omna ding mun kawcik lua ta hi. A gen om kei leh kua'n za thei ding maw? A kigen lo thute kua in um thei ding maw? A zak loh thute kua'n um ngam mawk ding hiam?

A zekai luat ma-in media suahtakna leh suakta tak-a paukhiat ngamna mun leh hun pia ta ni. Tua hi leh thuman lo a gamta teng a gam uh hong neu pah ding a, a keel luphum teng uh hong kipholakkhia pan ding hi. Media beng dai nuam a, phuahtawm/bawltawm news (Fake news) cici lai teng bel mi dawilok teng leh ut bangbanga dictatorship banga gamta nuam lai a, vaihawm ut lai teng hi bek hi.

🖋️✒️Thang Khan Lian