US EVANGELICAL CHRISTIANS TEN TRUMP' JERUSALEM THUKHENSATNA IN "ARMAGEDDON NAIHSAK HI" CI

US EVANGELICAL CHRISTIANS TEN TRUMP' JERUSALEM THUKHENSATNA IN "ARMAGEDDON NAIHSAK HI" CI

Dec. 10, 2017: President Donald Trump in Israel khuapi dingin Tel Aviv hilo in Jerusalem kiciamteh a, Tel Aviv panin Jerusalem ah US embassy kituah suk ding hi ci-in a tangkokhiat khitin Trump' thukhensatna in "hun beina ding" (end of days) leh Messiah "Nih vei hong pai kikna ding" (Second Coming of the Messiah) mihingte tawh kinaihsak hi ci-in a upna thu US evangelical Christian makai min nei mahmah Texas pansan Lamb and Lion Ministries director Dr. David Reagan in Sputnik newste kianga gen a, Trump' thukhensatna ka muak hi ci hi. Pope Francis, Arab League, Egypt' Coptic Church, EU, UN kihel in leitung gam makai ten khuapi kituhna Jerusalem khuapi US in Israel khuapi dingin a ciamtehna hangin a mawhpaihna thu gen ciat uh hi.

Trump in hih banga thukhensatna a bawlna pen Jewish state bawlkhiat ding gum US a evangelical Christian 50 million omte bil ah music bangin ging a, Lai Siangtho' genkholhna tangtun'na dingin Armageddon galpi, hun bei ni leh Jesuh hong pai kikna ding tawh mihingte kinaihna piangsak hi cih ngaihsutna nei uh hi. Dr. David Reagan pen US gam-a in 80 million in a lak uh 13 Christian TV channels kici ah nipi kal sim in Christ in Prophecy kici program producer hi. Dr. Reagan in, "Jerusalem pen Israel khuapi kum 4,000 na hi den a, Judahte bekin khuapi dingin na zang uh a, gamdang kuamah - Muslim gam leh Arab gam ten khuapi dingin zang ngei lo uh ahih manin Trump' thukhensatna ka muak hi. Sawt kingak lua hi zaw hi. US President tengin campaign a bawl ciangun US embassy Jerusalem ah tuah dingin kamciam napi un a cing khit ciangun a kamciamna uh mangngilh uh hi. Hih pen Trump' campaign kamciamna ahih manin a hoih lahna hi," ci hi.

Nung kum kiteelna ah US gam-a Judah voters a tamzaw ten Hillary Clinton' adingin a vote uh pia uh a, hun beina ding nai ta hi cih upna nei evangelical Christians a tamzaw ten Trump' adingin vote pia uh hi. Hun beina theology um ten Judah ten Jerusalem khuapi thuneihna la kik in, Muslimte adingin mun siangtho pen thumna al-Aqsa Mosque omna (Solomon' First leh Second Temple omna) Temple Mount ah Third Temple kilam kik ding upna leh lametna nei uh hi. *First temple pen Babylon kumpi Nebuchadnezzar' galkapmang Nebuzaraddan in 586 BC in suksiatsak a, Second Temple pen Rom general Titus leh ama' second-in-command Tiberius Julius Alexander in AD 70 in na suksiatsak uh a, tua khit nung a lam kik ding a hanciam hangun lawhsam den uh a, Temple of Mount sung thuneihna nangawn Islamic Waqf foundation let ahi hi.

Kum tampi sung hun beina ding thu sinna nei Dr. Reagan in LST genkholhna a sinna leh leitung bei ding a muhkholhna thugen hi. "Thakhat thu-in Laktohna (Rupture) hong tung ding a, 50 million evangelical Christians kihel in thu-um taktakte leitung panin mang vatin vantung ah kilato ding a, si thei nawn lo ding uh hi," ci hi. 2014 in Hollywood actor Nicholas Cage in "Left Behind" movies ah a piahna ah transatlantic pilot in pang a, a vanleeng a leeng lai takin Rapture hun tung vatin a passengers puakte mang uh hi. A film pen upna bulphuh a films bawl company- Stoney Lake Entertainment in a sum bei teng a sik ahi hi.

Rapture khit ciangin evangelicals ten a upna uh-ah "Gimna Lianpi" (Great Tribulations) hun ding hong tung ding a, tua hun pen Dr. Reagan in kum sagih sung hi ding hi ci hi. "American Evangelical Christians a tamzaw in LST genkholhna bangin Israel lehdo in na khempeuh siatsakna gal 'war of annihilation' kici om ding a, Israel gam kiim-a om Muslim gam ten Israel do huan ding uh a, Israel in zo ding hi cih um uh hi. Tua ciangin Arab gam ten Russia' huhna leh Muslim gamte - Iran leh Turkey cihte tung panin huhna ngen ding uh a, Israel gam-a mualte kisusia ding hi," ci-in Dr, Reagan in Sputnik newste kiangah gen hi.

"Tua khit ciangin EU panin Antichrist kicipa hong khangkhia ding a, Middle East buaina hong ven'sak sawm ding hi. Antichrist in Israel tawh Antichrist in kilemna bawl ding a, Middle East ah kilemna omsak ding hanciam ding hi. Tua hun a kipanin gimna hun 'tribulation' kici hong kipan ding hi. A pilna hangin kilemhuai takin Antichrist' thuneihna hong khang ding a, leitung a lakna dingin gam sim hong kipan ding hi. Tua hun ciangin nuclear gal hong piang ding a, gimna hun kimkhat (3.5 years) sungin leitung bup ukna hong la ding hi," ci-in Dr. Reagan in ci hi.

2008 in Christian internet forums tampi ten UK PM Tony Blair pen Antichrist hi ci uh a, evangelicals pawlkhat ten bel Antichrist pen England kumpi ngak Prince Charles, Russian President Vladimir Putin ahih kei leh Turkey President Recep Tayyip Erdogan hi a cih hangin Dr. Reagan in Antichrist pen Rom mi/RC sung pan hi ding hi ci hi. Dr. Reagan in, "Gimna hun kimkhat sungin Jerusalem khuapi-ah Third Temple kilam kik ding a, tua hun lai takin Jerusalem ah Antichrist va pai-in kei pen Pasian hi'ng hong ci ding hi. Ahih hangin Judah ten na nolh ding uh ahih manin Antichrist in Judahte bawlsiat hong kipan ding a, leitung panin thah cimit hong sawm ding hi. Judahte tung panin LST leh Messiah hong kipia ahih manin Satan in ngimna hoih lo tawh Judahte tungah itna lak dingin ka um uh hi. Nazi ten Holocaust hun bangin Judahte a lom thah bangin Satan in Judahte lomthah kik ding hi," ci hi.

Dr. Reagan in., "Asia panin Antichrist lehdo ding hong piangkhia ding a, Far East dong hong do ding uh hi. Asia panin Antichrist lehdo ding China hi kha thei hi. Hih bang a pian' theihna dingin China in Middle East leh Asia kizopna ding tu-in highway a bawl CPEC hi dingin ka ummawh hi. Armageddon mual tungah a kikhopkhawm ciangun Jerusalem khuapi a om Olive mual panin lei-ah Jesuh hong kumsuk ding a, a lamdang vangliatna kammal tawh Antichrist' galkapte leitung panin susia ding hi. Tua khit ciangin Jesuh in leitung kum tul khat sung uk in mang ding a, tua hun pen kum tul khat ki-ukna/vaihawmna (millennial reign) i cih uh hi ding hi. Jesuh in Pasian um lote sihna dan tuak dingin thukhen ding a, Pasian umte kum tul tampi sung si loin nungta in Pasian tawh mangkhawm ding uh hi," ci hi.

LST pen kum Islam phuankhiapa Prophet Mohammed leh Islam pian'khiat ma zalom tampi in na om khin a, Judahte sal in a kipuakkhiatna hangin Palestine gam kilaih hi. 1967 Six Days War in Israel in Jerusalem khuapi nisuahna kimkhat sim in Jordan' ukna khut sung panin laksak a, ahih hangin United Nations resolutions in Palestine khut sungah piakkhiat dingin thu a piak hangin Israel in nusiatsan nuam loin tu dong ukkhum hi. Israel in Jerusalem khuapi bup amau khuapi bangin ngaihsun uh a, ahih hangin Arab leh Muslim tampi teenna ahi Palestine thuneihna East Jerusalem sung pen Palestine in mailam hun adingin a khuapi dingin a zat sawm uh ahi hi.

Hih bang thu om bialbual ahih manin Trump' thukhensatna in
international resolutions a palsat banah tanglai panin ui leh keel banga leitang kituh a kigal den Israeli-Palestinian peace process kalsuanna ding dal hi ci-in Nilaini in Palestinian makai Mahmoud Abbas in ci hi. Jerusalem khuapi sunga Muslimte mun siangthote kem dingin Jordan in thuneihna Islamic Waqf foundation (Arabic in al-Quds kici) tawh tavuan len a, a sum bei khempeuh sik hi. Muslimte mun siangtho sungah non-Muslims lut ding leitung thukham in phal lo hi. Jordan kumpi Abdullah in Trump' thukhensatna pen Palestine leh a kiim-ah bitna leh daihna om theihna dingin kihtakhuaina piangsak hi ci hi.

(Dr. David Reagan' ngaihsutna leh thugente pen Sputnik' ngaihsutna hi khin lo hi).

Source: Sputnik
@Thang Khan Lian #ZUNs