ZIMBABWE PRESIDENT IN KITAWPNA LAI KHIA

ZIMBABWE PRESIDENT IN KITAWPNA LAI KHIA

Nov. 22, 2017: Britain panin 1980 in Zimbabwe in suahtakna a ngah khit a kipanin kum 37 gam uk kum 93 mi "Grand Old Man" President Robert Mugabe in zan in kitawpna lai (resignation letter) parliament ah khia hi. A kitawpna lai Parliament speaker Jacob Mudenda in simkhiatna a neih in Zimbabwe gammite a lungdam mahmah uh hi. Kitawpna lai khia lo hi leh zan in Parliament in paihkhiat (impeachment) nei ding hi.

Mugabe in kitawpna lai khia ahih manin ama' lieutenant lui Vice-President zaa panin a paihkhiat Emmerson Mnangagwa in Zimbabwe interim President len ding hi. Guinea President leh African Union (AU) chief Alpha Conde in, "Inn nung lam panin Mugabe a pusuak kul pen maizumhuai mahmah hi. Mugabe in kitawpna ding thukhensatna a bawl manin kilungdampih a, AU in Zimbabwe ah thatang tawh thuneihna lakna (coup) a pian ding kideih loin kivau hi. Mugabe pen suahtakna ding a dona hangin "African ngalliam" hi a, galhang ahih manin kimangngilh ngei lo ding hi," ci hi.

Al Jazeera reporter Tania Page in in South Africa President Jacob Zuma in Angola President Joao Lourenco tawh a geelna bangun tu ni-in Zimbabwe khuapi Harare va pha ding uh hi ci hi. South Africa a main opposition party Democratic Alliance in Mugabe' kitawpna pen Mugabe' ukna nuai-a nakpi tak-a thuak Zimbabwe gammite adingin gualzawhna hi hi ci hi. Zambia opposition makai Hakainde Hichilema in Mugabe' kitawpna hanga thupiang in Africa makaite message khak a, hih mipite thuneihna pen mipite thuneihna leh mipite ading hi hi ci hi.

United Nations secretary-general Antonio Guterres in Mugabe' kitawp khitin Zimbabwe gammite dai leh kidawm tak a om dingin kunh hi. Antonio Guterres' spokesman Farhan Haq in UN secretary-general Guterres leh secretary-general lui ten makai ten mipite thu a ngaihkhiat uh a, a thudon ding uh deih a, makai ten mipite aw a ngaih ding uh pen gam khempeuh government inn kiu suang hi ci hi.

Zimbabwe gam kum tampi ukkhum in a nuaineh mangpa Britain-te Prime Minister Theresa May in Mugabe' kitawpna in ama' ukna nuai-a nuahnehna beina ding lampi thak sial hi ci hi (amau gamtatna kitheihmawh bawl nuam dep lai hi). UK Foreign Minister Boris Johnson in a Twitter ah Mugabe' kiat ka dah kei a, a kitawpna hangin Zimbabwe mipite adingin lametna piangsak hi ci hi. US State Department in hih pen a ciamteh tham thu hi a, thukham kibang a ki-ukna (rule of law) leh democracy gamtatna leh ngeinate zahtak ding hi ci-in a statement ah tuangsak in, Zimbabwe gammite a lungdampihna pulak hi.

Robert Mugabe' kitawpna lai hih bang ahi hi:

Notice of resignation as President of the Republic of Zimbabwe (Constitution of Zimbabwe, amendment number 20, 2013 provision Section 96, Sub-Section 1 tawh kituakin)

National Assembly Speaker Advocate Jacob Mudenda tawh 13:53 hours, 21st November, 2017 in kithuzaktuahna panin kibialna hangin President of the Republic of Zimbabwe, kei Robert Gabriel Mugabe in Constitution of Zimbabwe Section 96, Sub-Section 1 bangin tu a kipanin President of the Republic of Zimbabwe panin a kitawp hi.

Kitawpna dingin ka thukhensatna lakna Zimbabwe gammite phattuammna ding, ngongtatna om loin thuneihna nawngkaina bangmah om loin a kilaih theihna ding, gam bitna ding, kidemna ding leh kho/kina ding dengdelna hangin kei ut thu a thukhensatna hi.

Hehpihna tawh ka kitawpna thuzaksakna Constitution of Zimbabwe Section 96, Sub-Section a kisam bangin mipi theih dingin na zasak in.

Nnang adingin cihtakna tawh,

Robert Gabriel Mugabe, President of the Republic of Zimbabwe.

#Bottom line: Na mipihte suahtakna ngahpih napi in na ut bangbangin ukkhum in, mipite thu leh aw na lak kei leh ni khat ni ciangin mipite thuneihna in hong lawnkhia veve ding hi cih mangngilh kei in. Makaite thuneihna pen a sawt pen kum 30-40 val hilo a, mipite thuneihna pen a bei thei ngei lo leh zing nisuak banga ni sim a thak den ahih manin thuneihna khempeuh nei na kisak den hangin khat vei ni teh ek kiat in na kiat ni hong tung peelmawh veve ding hi.

Source: Al Jazeera
@Thang Khan Lian #ZUNs

Photo: Mugabe