NASA IN ASTEROIDS PANIN LEITUNG HUMBITNA DINGIN TECHNOLOGY THAK TEST SAWM

NASA IN ASTEROIDS PANIN LEITUNG HUMBITNA DINGIN TECHNOLOGY THAK TEST SAWM

July 5, 2017: I teenna leitung hong dengsia leh dengzan zo dinga kituat Mars leh Jupiter kikal a aksi nonote ahih kei leh Jupiter orbit kimkot "asteroid" kici ten leitung hong dengsiat ding dalna in NASA ten technology thak sit (test) sawm uh a, a technology thak pen asteroid a tattuah thei leh a tang thei (kinetic impact) pansak a kibawl DART kici zat sawm uh hi ci-in space agency in suaksak hi. Space agency in a genna ah tua kinetic impact pansan DART pen space (mun awng) a suang deng leh asteroid orbit (a kimkot a kipei) kiheikhiasak (deflected) thei ding a, asteroid in leitung hong deng kha loin leitung tawh kitaihkha lo ding hi ci hi.

Space agency' press release in DART pen NASA mission adingin kinetic strike technology masa pen ding hi lai hi ci hi. DART sitna mun ding pen asteroid "Didymos" kici ah sitna neih sawm uh a, leitung kiimkot ah Oct. 2022 leh 2024 in lengsak sawm uh hi. Tua bangin DART sitna kinei leh a technology pen asteroids in leitung hong suksiat theihna ding thahatna panin leitung humbit thei ding hiam cih etkhiatna ding cih ngimna hi pan hi.

Non-profit partnership "Center of Planetary Protection" a general director Anatoly Zaytsev in Sputnik ten a interview na-ah, "NASA in tua bang technology sit ding geelna a neih uh pen asteroids in i teenna leitung hong nawk kha dek hi cih a theih ma-in a asteroids a kimuh masak kei leh zat theih loh ding hi. DART kinetic golna pen asteroid golna sangin tul tampi vei ahih kei leh millions zah vei neu zaw ahih manin asteroid a hun khenma sung a tha ngah deuhdeuhna (momentum) neu zaw ding a, millimeter per second ahih kei leh centimeter per second value hi bek ding hi," ci hi.

Tua ahih manin DART impact pen asteroid tawh teh zawh ding hilo a, DART method in ciangtan nei ahih manin a kihtakhuai mahmah asteroid in leitung hong dengsawm hi cih kum tam lo theih masakkholh kisam hi ci-in Zaitsev in ci hi. DART deviation speed pen neu lua ahih manin leitung panin kilometers thul tampi gamla ah asteroid lengkawi sak ding cih pen baih lo hi ci hi. Tua ahih manin kinetic impact zang loin nuclear kipuakkham sak leh ahih theihna vanglian zaw ding hi ci hi. Tua bangin leitung susia kha lo dingin kinetic impact zang loin nuclear kipuakkham sak leh asteroid in leitung hong deng khak lohna ding dal loin asteroid puakkham sak ding hi ci-in Anatoly Zaitsev in gen beh hi. Zaytsev in a kihtahhuai space a om na tuamtuamte (objects) panin leitung humbitna dingin international monitoring system kibawl leh pilhuai leh ciimhuai pen ding hi cih ngaihsutna nei hi.

A beisa kum tam lo sungin aksite thu a sinmi, ni-kha aksi leh van a om nate thu a sinmi (astronomers) ten leitung kiim ''sphere of gravity'' kicihna sunga leng asteroids 150 kiim muh beh zen uh hi. Asteroid i cihte pen a laizang pan a kim kihalna ahih kei leh a laizang panin a radius sphere pen 1 million kilometres ahi hi. Nipi kal sim in leitung sphere of gravity ah asteroid 2-3 kikal leng den a, hih banga a kihtakhuai buaina a dalna ding a kingaihsut meng kei leh a tawpna ah asteroid sanga neuzaw aksi them kia (meteor) Chelyabinsk meteorite kici in Russia' leitung a tuam huih leh meii, van awngthawl sung huih (atmosphere)15 February 2013 in hong puakkhap bangin hong piang kik ding a, tua sanga nasia zaw zong hong piang lai ding hi ci-in Zaitsev in ci hi.

#Behlapna: Chelyabinsk meteor pen leitung panin metre 20 gamla a om superbolide in a piansak hi. A hatna (speed) pen 19.16 ± 0.15 kilometres per second (60,000–69,000 km/h or 40,000–42,900 mph) hi a, hih superlobide meteor pen Southern Ural kiim ah va vak lela hi. Metoer a vakna pen Ni (Sun) sangin vakpha zaw a, 100 km (62 mi) a gamla panin kimu thei ahih manin Southern Ural region leh a kiim a republics omte nangawn ah kimu thei hi. A mu ten bel a sa mahmah meikuang (fireball) tawh kibang hi ci uh hi. Chelyabinsk meteor pen Chelyabinsk Oblast huih lakah 29.9 km a gamla ah puakkham a, meiilum sa, leivui leh gas piangsak a, tuate 26.2 km sung pailet (penetrated) zo hi. A hatna kinetic energy tha pen infrasound leh ziinling tehna (seismic measurements) tawh kiteh leh nuclear galvan 400–500 kiloton (about 1.4–1.8 PJ) range a puahkham hatna tawh kikim a, US ten Galpi Nihna in Hiroshima khuapi ah atom bomb a khiat uh sangin 26-33 kikal vei hatzaw hi.

Bottom line: Hih asteroid i cihcihte pen Mangmuhna sunga aksi hong kia-in leitung hong dengsia ding hi ci-a Johan' mangmuhnate dingin upmawhhuai hi. Scientist ten amau pilna leh siamna tawh asteroids ten leitung hong dengsiat ding a dal sawmsawm hangin Pasian' geelna khaktan zo lo ding uh ahih manin a hanciam pong hangun lawhcing dingin ka um vet kei hi. Asteroids in leitung hong dengsiat ding lawhcing takin a dalna uh Hollywood sci-fiction movie "Armageddon" (*Ben Afflect, Liv Tyler, Bruce Willis) en le uh cin cimphawng zawzen hi.

Source: Sputnik; Wikipedia
@Thang Khan Lian #ZUNs