I THU UPZIA LEH SANZIA KISITTEL PHATHUAI MAHMAH

I THU UPZIA LEH SANZIA KISITTEL PHATHUAI MAHMAH

News kipostte ka et ciangin US leh Israelte kisuamna leh kithahna thu a tuan khak ciangin a dah leh suamna a tuah man un a dahpih tam mahmah hi. Ahih hangin gam dang, a diakin Middle East buaina kisuamna khawng a kipost ciangin amau leh amau mah hi ven kithat khin le uh phamawh se ahia ci-a comments pia leh a thukimpih dep a, lungdam tam mahmah hi. Biakna uk kisa leh a kikhami sak leh LST sang panin buaih ngahte nangawn in Middle East ah kithahna pen thukimpih mahmah mawk uh ahih lamdang ka sa hi. Tua bang ngaihsutna nei ten makai za leh sia hong sem le uh gal kihauh tuak mahmah ding bang hi.

Hih thu hangin i thusanzia leh i thu upzia kisittel phat ding leh lungngaih phat hiai ka sa mahmah a, leitung mihing khempeuh pen Pasian in ama lim leh a mel sun in hong bawl vive ahih lam Khristian thu upna a thei lo tam tuak lai kasak manin dahhuai leh maizumhuai ka sa a, Khristian i cih ngam pen zumhuai phial ka sak hun tam mahmah hi. LST ah i ciah kik loh phamawh hi cih hong phawksak hi. A piang khempeuh pen Pasian deihna leh geelna loin a piang lo bangmah om lo mah a, i it khat a sih ciangin i kah ngaungaupih buang leh Pasian' bawlsa namdang khat sihna peuh i lungdampih thei lai mawk leh i thusanzia pen a paikhial taktak hi dingin ka ngaihsun zaw hi. Thuciam Lui hun a om kihi nawn lo a, Thuciam Thak hun hita hi cih zong phawk a, leitung ah itna lo ngal lei na kiba kei un ci-a hong kivaikhak thu umte hi hang cih i mangngilh loh ding i tavuan hi.

“Note in, ‘Na vengte uh na it un la, na galte uh na mudah un,’ ci-in a kigenna thu na zaksa uh ahi hi. Ahi zongin ken note kiangah kong genin-ah: Na galte uh na it un la, no hong bawlsiate adingin thu na ngetsak un. Tua hileh vantungah a om na Pa uh tate na hi thei ding uh hi. Bang hang hiam cih leh amah in mihoihte leh misiate tungah a kibangin ni taangsak khawm a, a gamtat phate leh a gamtat siate tungah zong a kibang mahin guah zusak khawm hi. Tua ahih manin no hong itte bek na it uh leh Pasian in bang thaman hong pia zenzen ding ahi hiam? Siahdongte nangawn in amau a itte it thei uh hi. Na lawmte bek uh hopihin thupha na piak uh leh mi mawkmawkte sangin na hoihzawkna uh bang om ahi hiam? Gentail mite nangawn in tua bang ciang lel hih thei uh hi. Tua ahih manin vantungah a om na Pa uh a cingtaak mah bangin note zong lungsim citakin na cingtaak nading uh na hanciam un," ci-in Matthai 5:43‭-‬48 ah Jesuh in a thugen a ngai Judahte kiangah Mual Tung Thuhilhna a genna tawpna ah a thugen na khum hi.

"Bang hang hiam cih leh Thukham khempeuh thu khatin kigawm thei a, “Nangmah na ki-it bangin na vengte na it in,” cihna tawh kitomlak thei hi," Sawltak Pau in Galati khua mite a laikhakna Galati 5:14na ah na gen hi.

Hong itte bek i it leh mawhnei siahdongte tawh kilamdang vet lo hi hang cih i phawk ding kisam a, Pasian' tate cih hi thei ngei lo ding hi hang cih i mangngilh loh ding thupi hi. Nang hong itte bek na it leh na lungsim pen siahdongte tawh kibang ahih manin na thaman ding om lo hi. I kam tawh tualthat kei ni. I lungsim khempeuh tawh Pasian i it bang i veng i paamte (mi dangte) it ding pen thukham lianpen ahih manin thukham khempeuh zui i kisak hangin midangte it lo i hih manin i thukham zuih kisittel pha kik ni.

Thukhupna: Pasian aw, kei hong entel inla, ka lungsim hong thei in. Kei hong sit inla, ka ngaihsutnate hong thei in. Kei sungah siattheihna a omkha hiam hong en inla, tawntung lampi-ah kei hong kha in. (Late 139:23‭-‬24).

🖋️Thang Khan Lian