US-TE TEEMBAW WARNING A KIPIAK HANGIN TEEMBAW DANG TAWH A KINAWKTUAH KHAKNA MUN AH OM VEVE

US-TE TEEMBAW WARNING A KIPIAK HANGIN TEEMBAW DANG TAWH A KINAWKTUAH KHAKNA MUN AH OM VEVE

June 27, 2017: USte galdona teembaw guided missile destroyer USS Fitzgerald leh tua sanga golzaw Philippine gamte vanpuakna teembaw ACX Crystal container/cargo ship kici June 17 zingsang in Tokyo Bay leitaw lamah kitaituah (collision) hi. Hih thupiang hangin USte galdona USS Fitzgerald teembaw a tuang US Navy sagih a sih banah a commander pa un liamna tuak a, a teembaw zong naksiat mahmah hi. Hih tuahsiatna pen 2000 in Yemen gam-a Aden ah USS Cole teembaw bomb tawh a kisuam khit nung US galdona teembaw tuahsiatna lak panin a nasia pen hi lai hi. Navy guided-missile destroyer USS Cole (DDG-67) pen 12 October 2000 in al-Qaden ten Aden teembaw khawlna ah bomb tawh suam uh a, US Navy 17 si in, 39 in liamna tuak hi. Tua loin USS Stark galdona teembaw Iran–Iraq War lai 17 May, 1987 in Iraq gal dona vanleng in tung lam panin kap a, Navy 37 a sih banah 21 in liamna tuak hi.

June 17 ni a USS Fitzgerald leh van puakna teembaw kitaihtuahna bang hang hiam cih thukanna (investigations) tuamtuam guk takin nei a, tuate lakah National Transportation Safety Board sik leh tangin US Navy in internal hearing nih vei nei in, US Coast Guard (USCG) nei hi. Tua loin Japan Transport Safety Board, JCG leh Philippines government in zong a tuam in investigations nei hi.

Hih tuahsiatna a pianna hang pen thakhat thu in USS Fitzgerald in a taina lampi hong laih a, kitaihtuah kha ding hi cih a kitheih ciangin flashing light warning kipia napi kihemkhia lo a, Philippines teembaw in a taina lampi a ziat lam (starboard) ah a hawl hangin zingsang nai 1:30 am khit minute 10 nungin US teembaw phukha veve hi ci-in Philippine cargo ship Captain Ronald Advincula in report a piakna ah gen hi. Hih Philippines-te vanpuakna teembaw Captain in a teembaw nei Japanese ship owner Dainichi Investment Corporation kiangah report a piak Reuters in hong suaksak ahi hi. Reuters news in hih bang a suaksakna dotna US Navy ten tu dong dawng nuam nai lo lai uh hi. A kitaihtuah khakna hangin USS Fitzgerald' waterline a gash kicihna nuai teng sia a, a commander pa a cabin sungah liam a, Navy site pen berthing compartments sungah si uh hi.

Japan Coast Guard (JCG), U.S. Coast Guard leh ACX Crystal teembaw nei Dainichi Invest in zong Philippines teembaw Captain Advincula in report a piak Reuters news ten a suaksakna thu kician a kidot hangin comment pia nuam lo a, Reuters in Captain Advincula a hopih sawm hangin Japan nusiatsan ta ahih manin hopih thei nawn lo hi. Hih tuahsiatna thukanna nei investigations tuamtuam ten mit tawh thupiang a mute teci (testimony) leh US teembaw a electronic data encian lai ding uh a, bang hanga USS Fitzgerald a kizang radar hoih mahmah in amah sanga teembaw thum vei a golzaw mu buang lo lawmlawm a, flashing light warning signal kipia napi kitaihtuahna piang teitei hiam cih kan lai ding uh hi.

Tua loin tuahsiatna thu ACX Crystal teembaw in report a piak khit nung bang hanga JCG in tuahsiatna thu 2:25 am in a zak masak theih patna dingin hih bangin naikal khat phial hun sawt la hiam cih kanna nei lai ding uh hi. ACX Crystal teembaw captain in report a piakna ah ko teembaw ah telkhialna bangmah om lo a, a kitaihtuah khak lohna dingin warning kipia napi USS Fitzgerald a kihepkhia loh ciangin ziat lam ah (starboard) a kihei hangin zekai lua ta a, kitaihtuah veve hi ci hi. Tuahsiatna a pian khit nungin ka teembaw uh 6 nautical miles (11 km) tai suak lai hi ci hi. Thomson Reuters Eikon in Japante' Nippon Yusen KK charter a tai ACX Crystal in USS Fitzgerald tawh a kitaihtuah khak lohna dingin 12:58 in leh tai (complete U-Turn) a, a kitaihtuah khit 2:46 am in U-turn kik in a taina ding manawh in tai kik hi ci hi.

#Bottom line: April 27 in Black Sea ah Russiate galte etsima teembaw Reconnaissance warship mi 78 tuanna leh Togo-flagged cargo ship a mei sah luat manin a kitaihtuah lai-in Russiate Navyte teembaw tum in, tai kik a, Navy a si leh a liam om lo napi Russiate' thanemna bek gen bel a nei keei ten flashing light warning signal kipia napi USS Fitzgerald tuahsiatna a bang ci tehkak ta ding uh hiam? Tuahsiatna pen a piang thei den hi a, mihing bawl vante a tuahsia thei lo bangmah om lo hi cih phawk ding kisam hi.

Source: ABC; CNBC; Wikipedia; Al Jazeera
@Thang Khan Lian #ZUNs