NORTH KOREA IN US-TE HONG KAP DING KIKIHTA LO HI CI

NORTH KOREA IN US-TE HONG KAP DING KIKIHTA LO HI CI

March 21, 2017: US Secretary of State Rex Tillerson in South Korea a zinna ah North leh South Korea gamgi kikhenna, galkap ten nasia takin gamgi a cin'na mun a phak khitin US in North Korea tawh kisai strategic policy ah thuahzawhna a neih teng bei ta a, North Korea in nuclear leh missiles a bawl beh ding dalna in a tung uh-ah khalna (sanctions) khauhzaw sem, nawhna (pressure) tamzaw sem leh a kisap leh amau hong kap ding dalna in a kigin' kholh lai takun galkap thahat zat ding "pre-emptive military action" cihte sabuai tungah om dimdiam hi ci.

Hih bangin a kampauna North Korean Foreign Ministry in nakpi takin mawhpaih a, USte kap ding kikihta lo a, vauna khauhzaw sem hong bawl beh hangun nuclear bawl kikhawlsan tuan lo ding hi cihsan hi. North Korea pen nuclear thahatna nei hi a, thumanna pen temsau dingin kizang a, socialist leitang humbitna ding leh gam mite nuntakna humbitna dingin gal nan' zawhna ding thahatna kinei hi ci hi ci-in official Korean Central News Agency (KCNA) in suaksak hi.

Tillerson in nung diakin Japan, South Korea leh China gamte ah va zin a, North Koreate' nuclear programme gen bel in va nei hi. South Korea ah a zin ma-in Tillerson in a beisa kum 20 sungin North Korea tawh kisai US in foreign policy a zatte lawhsam a, President Trump' ukna nuai-ah kidaksak kik ding hi ci-in kamciamna nei hi.

KCNA in a genna North Korean foreign ministry spokesman min gen loh khatin US in North Korea pen nuclear nei dinga kilawm gam khat hi ci-a a pom ding kisam ta a, gal pian' theihna dingin US gamtatna thukkik zawhna ding thahatna nei hi cih a phawk hun ta hi ci hi. Sumbawl panin US gam thunei a suak ten North Korea kihtakna ding piangsak thei dingin kingaihsun uh a, tawl khat sungin a sawmna khempeuh uh guaksuak ziau ding hi ci-in gen beh hi.

#Behlapna: Nung Kiginni in North Korea in lei nuai-ah high-thrust rocket engine kici suakthakte a sitna uh-ah leikhamang Kim Jong-un zong kihel a, hih rocket engine thahat mahmah pen i space programme adingin lawhcin'na a piangsak kilaihgawpna (revolutionary breakthrough) hi ci hi. North Korea in UN Security Council resolutions tampi palsat in galvan thahat tampi sitna na nei hi. A masa pen dingin 2006 in nuclear sitna na nei a, tu dong 5 vei sitna nei ta hi. Nung kum bekin nuclear nih vei leh ballistic missile sitna 24 tak na nei hi. Nipini in Trump in North Korea vai tawh kisai meeting na neihpih a, Kim Jong-un' gamtatna pen siahuai lua mahmah hi ci hi. Zan in China in North Korea' dinmun pen lampi ka bom thak ah dinga - a lipkhathuai leh a nasia mahmah gal leh diplomatic (gam khat leh gam khat kikal) a kihona tawh ven'sak ding muntuah ah ding hi. Kamdam a kihona hunpha a om theih lai liai teng leh lametna a om theih dong kihona hunpha lak ding hi ci-in Chinese Foreign Ministry Wang Yi in ci hi. US in North Korea a philphil pong hangin tawm bek nawk kha leh zong leikhamang ngongtat hong gamtang leh nuclear hong zang peelmawh dinga, South Korea ah US galkap a omte zong China' mit na sip khin lua zo ahih manin Korean peninsula ah US galkap a om beh ding China in dal ding hi. China hong kigolh lai leh leitung khempeuh linglawng zo dinga nuam khin khol lo ding hi.

Source: News agencies
A tei: Thang Khan Lian @ Zomi United News