JESUH' KIVUINA HAN ZAN IN MIPI MUH THEIH DINGIN KIHONG TA

JESUH' KIVUINA HAN ZAN IN MIPI MUH THEIH DINGIN KIHONG TA

March 23, 2017: Singlamteh tungah Jesuh a kikhailup khit in a kivuina/a luang kisialna mun dinga ki-ummawh Jesusalem khuapi sunga Old City a om Church of the Holy Sepulchre ah zan in Jesuh luang kisialna suang pek kikoihna mipi muh theih dingin a hon'na Ecumenical biakna upa/Bishop (Patriarch) Bartholomew I zong kihel hi. Hih mun hon'na ah kihel dingin Pope Francis in Patriarch Bartholomew I pen ama sik leh tang dinga a seh ahi hi. Zan pen Jesuh' luang kisialna mun/han dei neu tung tunga om a pianzia (structure) neu (Edicule) a kibawlphat/puahphat (renovation) a kizawh ni ahih manin mipi muh theih dingin a kihong khia ahi hi.

Hih Jesuh luang kisialna han pen Greek scientist leh a omsa na khat puahpha kik a, a om kik sak siammi (restorers) kipawl "renovation experts team" kici ten kha kua sung a puahphatna hun beisak uh a, hih misiam ten Jesuh' kivuina dei neu tung (Edicule) lim takin puahphatna nei uh hi. Jesuh kivuina mun pen Khristiante adingin mualsuang/taanglai a na thupi kibawl sate uh lak panin a siangtho (sacred monument) pen in kingaihsun hi. "Hih bangin 'renovation team" ten hih bangin Jesuh' kivuina mun siangtho puahpha kik in, omsak kik kei le uh a kicip siat gawp ding lauhuai mahmah a, tu-in a omsak kikna ding nasep ding teng man siang ta uh hi ci-in World Monuments Fund makai Bonnie Burnham in ci hi.

Hih bangin Jesuh kivuina mun siangtho, a luang kisialna mun lian "burial bed" kici pen a sia het lo dingin lei thukpi sung panin mi muh theih dingin a omsak kik (restorers)-te pen National Technical University of Athens panin misiam vive mi 50 in a bawlphat uh hi a, a beisa in Greek khuapi (capital) Acropolis leh Turkey gam-a Istanbul khuapi-a Hagia Sophia ah nasem ngeite ahi uh hi. Hih khutsiam leh misiam ten sun hun in Jesuh kivuina mun siangtho (shrine) en dingte leh mun siangtho a Pasian bia dinga hawh mite (pilgrims) nawngkaisak se loin a et theihna dingun zan hun bekin nasem uh hi.

Hih Jesuh' kivuina han pen kum zalom 200 val khit a masa pen dingin nung kum October kha-in Jesuh kivuina tuamna suang tunga kiphah a sah mahmah marble pek (marble slab) na la khia uh hi. Tua marble suangpek a lak khiat manun Jesuh luang kisialna mun lian "original rock shelf ahih kei leh burial bed" kicihna mun puahphat kik theihna ding lampi hong kihong hi. Khutsiam leh misiam nasem ten Jesuh kivuina a kimuh theihna ding leh mun siangtho a Pasian bia dinga hawh mi ten a kivuina a et theihna dingun tua marble suangpek at kek in, tawlet (window) neu khat bawl uh hi. Tua khit ciang misiam ten a nasepna uh leh Jesuh kivuina mun siangtho puahphat kikna dingin titanium tawh a kibawl siktukilh kipei theite (bolts) leh siktumte (mortars) zangin Jesuh' luang kisialna mun a siat lohna dingin nasep kipan uh a, khuaimeivak a kidet ciangin khuaimeivak tui tak khia (candle soot) sa teng leh vakhute ek leh nin a khiatte uh lim takin damdam in hah siang thei uh hi. Nasem ten Jesuh luang kisialna mun lian a siat khak lohna dingin vanzat nam tuamtuam - radar, laser scanners leh tuithe vanleng (drones) nangawn zang uh hi.

Hih Jesuh' luang kisialna mun lian omna Church of the Holy Sepulchre pen kulh tawh a ki-umcih Old Jerusalem khuapi sunga Christiante ten'na mun (quarter) sung hi a, hih mun pen Jesuh' kikhailupna, kivuina leh thawh kikna mun dinga ki-upmawh ahi hi. Hih mun pen leitung bup-a khuazinmite leh mun siangtho a Pasian bia dinga hawh mite tam mahmah na mun ahi hi. Jesuh kivuina mun kem dingin pawlpi (denominations) tuamtuam guk — Latin (Roman Catholic), Greek Orthodox, Armenian Apostolic, Syrian Orthodox, Ethiopian Orthodox leh Coptics-te a kem ding (custodian) in kiseh hi. A mun kem ding kituhna hangin kitotna leh kilaina, thagum thathang hat zatna nangawn na kisuah ngei uh ahih manin a om kiksakna ding leh bawlphatna ding hun kum sawm tampi (decades) na zekai sak hi.

Biakna pawlpi guk ten hih mun siangtho a kituhna hangun a biakinn tawh (Church of the Holy Sepulchre's keys) pen kum zalom 12 a kipan in Muslim innkuan khat in na kem den hi. Jesuh kivuina mun siangtho (shrine) pen leitung khangthu adingin li vei na kilam kik a, a nunung pen dingin meikat khit 1810 in kilam kik hi. A mun kem ding kituhna hangi kum 70 sik tawh kicilhcip a, kuamah lut thei lo hi. Jesuh' luang kisialna mun mipi muh theih dingin a ki-omsak kikna dingin a puahphatna dingin $ $4 million bei hi. A kipuahphat kikna dingin Jordan Kumpipa Abdullah II leh Palestinian President Mahmoud Abbas in 150,000 euros ($210,000 AUD) tuak na thawh khia uh a, tua lo adangte pen mimal leh pawlpi tuamtuamte huhna sumte kigawmkhawm in a kipuakpha kik ahi hi ci-in Bonnie Burnham in ci hi

Source: The Guardian, The Hindu and news.com.au
A tei: Thang Khan Lian