CHRISTIAN HYMN-TE' TANGTHU "Hong Naisak In (Draw Me Nearer)"

CHRISTIAN HYMN-TE' TANGTHU

"Hong Naisak In (Draw Me Nearer)"

(Hebrews 10:22)

Fanny J. Crosby (1820-1915)

William H. Doane (1831-1915)

Hih la phuaknu Fanny Crosby a la-aw phuakpa William Howard Doane-te’ inn-a a hawhna pan-a hong piangkhia la ahi hi. William Doane-te’ teEnna Cincinnati, Ohio ah Fanny Crosby a hawhna pan-a hong piangkhia la ahi hi.

William H. Doane-te’ kianga hawh ding Fanny Crosby lawp gige den hi. A gamlum lua mahmah den New York City pan suakta ding cih thu bek hi sam lo a, Dr. Doane-te innkuan pen a khami mahmah, Pasian um mahmah-a, Pasian a it mahmah innkuan ahih manin Fanny Crosby in tua inn nuamsa ngiat hi.

Nitak khat, nitum kuanin Dr. Doane-te’ innmai innka ah tukhawm liiliai uh hi. Tua lai tak-a bawlpa Pasian bek in a zeptheih nitum kuan meiite in mel tuamtuam nei-in zepzep bangin hoih lua mahmah hi. Fanny Crosby pen kha khat leh a lang a phak-a kipan a mit in khua a muh loh hangin a pi’ gengenna tungtawnin nitum kuan mel tuamtuam tawh kizem meiite zong a mu ngei zel ahi hi. Ni zong damdam in tumsuk hiaihiai ta hi. Tua lai takin Dr. Doane in tua bang hun cianga Pasian tawh i kinai theihna, nisim-a i kisapnate Pasain in hong sik hong guat dennate kuppih a, a thupipen Pasian, na khempeuh a piangsakpa eite’ Honpa hong suahna mahmah a lamdan'na genin Pasian’ thu kikum uh hi. Tua banah, nisim-in Pasian lungkimsak ding bek i tup semsem ding cih thute kikumkum uh hi.

Thakhat-in Fanny Crosby in Dr. Doane’ kiangah tua thute a gengen sungun a lungsim sungah la khat hong suak ahih manin laidal khat la pak a a gelhkhiatsakna dingin ngen hi. Gual khat khit gual khat, tang khat khit tang khat, tua khit teh a sakkik, khawl lo-in gen ngelhngelh a, a gen bangbangin Dr. Doane in gelh khia ngelhngelh hi. Fanny Crosby in gospel la ngaihpi khat a phuak khin hong hi ziau zel hi. A zing ciangin Dr. Doane in a la-aw phuak a, a mal leh a aw kituak lua mahmah hi Tua hang mah in Fanny in ama’ phuah late lakah a deihpen khat hong suak hi.

Hih la a phuaknu Fanny Crosby pen America gam Southeast, New York ah March 24, 1820 ni-in suak hi. Kha khat leh a lang (nipi kal 6) a phak ciangin a mitna a, zatui kinuh khial ahih manin a mittaw a, a khan tawntung mit khua mu loin om hi. A sih dongin New York City a St. John’s Methodist Episcopal Church ah pawlpi mi citak mahmah khat-in om den hi. A neu tunga kipanin a pi in thu leh la kici khempeuh ah pantah hi. New York Institution for the Blind (NYIB) kici mit khua mu lote’ sangah pilna sin hi. 1847 kum pan 1858 kum dong tua sang mah ah sangsia sem hi. 1958 kumin tua sanga mite’ zahtak mahmah music sia Alexander Van Alstyne tawh kiteng uh hi.

A neu tunga kipan in laphuah lam a vak hi a, ahi zongin leitung la pian vive hizaw hi. Church music lam-a minthang mahmah William B. Bradbury’ thuzawhna tungtawnin kum 40 a phaka kipan gospel lamal bek phuak a, ama’ genna ah “tua gam sunga a lungnuampen mi” hong suak hi. Fanny Crosby in la a phuah ciangin khukdin-in thungen a, Pasian’ makaihna zong masa lo peuhmah-in phuak ngei lo hi. A Lai Siangtho sungah American lan (flag) khat tep liklek den se hi. Ama’ hun-a gospel laphuak minthang mahmah Ira D. Sankey, William H. Doane, John R. Sweney, George C. Stebbins, George F. Root, William J. Kirkpatrick, leh adang tuamtuamte tawh kithuah-in la tampi phuak hi. A khan sunga a laphuah pongpong 8,000 val hi, ci-in kiciamteh hi. February 12, 1915 ni, ama’ kum 95 a phak lai takin i Topa’ kiang hong zuatsan hi.

Fanny Crosby’ phuah late lakah hih la “Hong Naisak In” (Draw Me Nearer) banah, “Lungmuanna Thupha” (Blessed Assurance), “Amah Thei Ning” (My Savior First of All), “A Sia Ding Honkhia In” (Rescue the Perishing), “Lam Tawntung A Hong Paipih Hi” (All the Way My Savior Leads Me), “Pasian Min Pha Ta Hen” (To God Be the Glory) cih la ngaihte kihel hi.

Hih la-aw phuakpa William H. Doane pen America gam Preston, Connecticut ah February 3, 1832 ni-in suak hi. Mihau mahmah khat hi a, factory president khat ahi hi. Music a uk hangin nasep-a nei bel hi lo hi. Tua hun lai-a gospel musician minthang mahmah khat hi veve hi. A la-aw a phuah gospel la dawng 2,000 val hi. Tuate lakah “A Sia Ding Honkhia In” (Rescue the Perishing), “Hong Paisan Ke’n Migi Topa”(Pass Me Not Gentle Savior), “Nang A Hi’ng, Topa”(Draw Me Nearer), “Singlamteh Kiang”(Near the Cross), “Pasian’ Min Pha Ta Hen”(To God Be the Glory), “Zeisu Min Manpha Na La In” (Take the Name of Jesus) cihte kihel a, a tamzaw-in Fanny Crosby’ laphuahte a aw phuahsak denzaw hi.

A tei : Rev. Zam Khat Kham (Christian Hymn te’ tangthu 2005)

Courtesy : Zomi Daily

Maan : Fanny Crosby