TURKEY AH GALKAP TEN THUNEIHNA LAK SAWMIN LAWHSAM

TURKEY AH GALKAP TEN THUNEIHNA LAK SAWMIN LAWHSAM

July 16, 2016: Zan nitakin Turkey Air Force Commander lui khat makaihna tawh galkap ten kumpi laih ding leh thuneihna lak ding (military coup) sawm uh a, galkapte leh galkap thahatna zanga thuneihna lak sawmte kikaptuahna hangin mi 90 in sihna tuak in, mi 1,560 kiman ta hi. President Recep Tayyip Erdogan in zan nitakin bomb puak, thau ging leh kinawktuahna a pian'khit zawh in tu ni-in thuneihna len lai ing ci-in tangko hi.

Bang hanga hih thu hong piang?

Zan nitakin galkap leh law enforcement ulian - Council for Peace in the Homeland kici ten Turkey khuapi Istanbul a om Ataturk International Airport, Bosphorus ah lei (bridge) nih leh Turkish broadcasters, TRT leh CNN-Turk la uh hi. Council for Peace in the Homeland kici ten TRT leh CNN-Turk panin galkap ten thuneihna la khin zo a, galkap thuneihna tawh vaihawmna martial law leh curfew Turkey gam sungah kikoih hi ci-in tangko uh hi. Council for Peace in the Homeland in Turkey gam-a galkap khempeuh (Armed Forces) in hong gum hi a cih uh hangin galkap a tamzaw in President Erdogan gum uh hi. Turkey pen democracy ahih hangin President in ama deihna bek paipih ahih manin Council for Peace in the Homeland Turkey thukhun (constitutional order), human rights leh suahtakna kembit ding hi ci-in tangko hi.

President Tayyip Erdogan' maan golpi khat Ankara ah kisuang in, galkap hatna tawh thuneihna lak ding a hanciamte Bosphorus Bridges ah pawlkhat kipiakhia uh a, hih thu hangin President Tayyip Erdogan gumte lungdam in awng ngeingai uh hi. Galkap hatna tawh thu neihna lak ding sawm ten Istanbul airport ah bomb puaksak in, parliamentary complex, Ankara, presidential teenna (residence) leh national intelligence headquarters munte thau tawh kap uh hi. Kumpi deih lo a kiphin galkap (Rebel soldiers) ten galvan tawh a kithuah mawtaw (armored vehicles), tanks, kidona vanleng leh helicopterte zang uh hi. Prime Minister Binali Yildirim in kumpi lehdo galkapte hawl vanlengte a kikapkhiatna dingin thu pia hi. Tua khit a sawt loin Turkeyte state satellite operator Ankara a om Turksat kap dinga leng helicopter khat Turkey galkap ten F-16 fighter jet zangin kapkhiatsak uh hi. Turkey Chief of Staff General Hulusi Akar zong thuneihna lak sawm ten galmat in na man man uh a, tu-in kihunkhia ta hi.

Thuneihna lak sawm galkapte lak-a kihelte leh galkapte military police command, Ankara ah kikaptuah uh a, kumpi lehdote mi 16 kikaplum a, Aegean kiim-a chief of staff of Turkey's command len Gen. Memduh Hakbilen leh kumpi lehdo mi 250 kiman hi ci-in Police Chief Celalettin Lekesiz in gen hi. Tua loin thuneihna lak ding sawm-a kihel ulian (pro-coup officers) mi 1,563 kiman ta a, ulian pawlkhat zong kikem in, policete khutah ki-ap hi ci-in gen beh hi.

Hih bang thu a pian' lai takin President Recep Tayyip Erdogan in khuan (holiday) zangin Turkey leitaw-nitumna lamah a om lai tak hi a, amasa pen dingin FaceTime, iPhone app zangin thugenna a neihna ah mipi ten galkap ten curfew a koih uh palsat a, kuapeuh khua sungah suakta takin a vak khiatna dingun kun hi. Tu zingsangin Istanbul a om Ataturk Airport ah a tun khit phet in galkap thahatna tawh thuneihna lak ding sawmte hanciamna lawhsam hi ci-in gen hi.

Turkey ulian ten hih galkap hatna tawh thuneihna lak ding sawmte pen nidangin president Erdogan tawh a kipawl leh Turkey a mipi gupna tampi a nei Hizmet movement makai leh US pansan Islamic biakna makai lian (cleric) Fethullah Gulen hi ci-in ngawh a, ahih hangin Gulen in hih ngawhna nial in, hih bang thupiang a mawhpaih thu gen beh hi.

Mi 90 site lakah nautang tampi kihel a, mi 1,000 val in liamna tuak hi. Leitung gam makai tuamtuam ten tangpi tangta deihna banga ki-ukna (democracy) tawh a kiteelcing kumpi a gup thu pulak uh a, ahih hangin Syria ah pawlkhat hih thupiang na lungdampih mahmah uh hi. US President Barack Obama in hih buaina ah kihelte khempeuh in buaina a kibehlap ding dalna in pilvang takin a gamtatna dingun kun hi.

-Sputnik