TEHPIH OM LO TUNNU' ITNA

~ TEHPIH OM LO TUNNU' ITNA ~

I Nu ten hong itna uh leitung mihingte ki-itna lak pan a lianpen itna ahi hi. Hong it luat man-a thuaknate lungngai lecin:

> Nang hong paai a kipanin ama duh zong ne ngam loin nang hong khualna in a duhloh, lim a sakloh, nang i duh teng ne hi. Amah phun sese lo!
> Nang hong paai lai takin lung-ap, luaksuahna leh thazawmnate thuak lawh ngiingeei hi.
Amah phun sese lo!
> Gol tektekin kha tam na phak tektek ciangin a gilvunte kikang semsem in lian tektek a, a ut bangin gamtaang zo nawn lo hi. Amah phun sese lo!
> Na suah ciangin a kigakcip a guh a tangte kitamkham in sisan naisan luanga, khua-ul kai in, khitui hong luan' lawh hi.
Amah phun sese lo!
> Nong suahkhiat khit ciangin tha nei lopi, dam nai lopi, liamma tawh kidimpi mah in a nawi hong teepsak a, a angah hong ihmu sak hi.
Amah phun sese lo!
> Na gilkial, na dangtak, nuam na sak loh ciangin zankim, zan khang, milak, milak lo cih khual se loin na kap a, ama'n hong khem in a nawi hong teep sak-a, a angah hong tawi in, a nungzangah hong pua a, hong awi ihmu hi.
Amah phun sese lo!
> Mite tawh kiliangko kimin pilna siamna na neih theihna dingin pilna sangah hong kha in sum leh pai, nek leh dawn ding hong vaihawm sak hi.
Amah phun sese lo!
> Tuni ciang dong hong itna tawh thu hong nget sak den a, nang na phawk kei zongin ama'n hong phawk gige ahih manin nang hong itna kiam ngei lo hi. Na phawkkhak loh hangin,
Amah phun sese lo a, Nang ading thu hong ngetsak den hi!
Tehpih ding om lo tunnu itna!

~ Tehpih Ding Om lo Tunnu Hong Khualna ~
Leitungah hong khualpen ci-a i ngaihsut mite hong khualna leh i Nute hong khualna tehkak zawh ding hilo hi. Nute hong khual zia:

> A gilsungah i om lai-in ama duh bang ne ngam loin ei duh bangbang ne a, i tha om theihna ding leh i cidamna dingin a lim thei thei, a al thei thei tawh hong vak hi.
> I suah khit ciangin zong i tha omna ding, i gilvahna ding, i ihmut nopna ding hanciam in, ei hangin gilkial lawh, ihmut cim loh lawh in tha bei lawh mahmah hi.
> Mite bangin pil in siamin i om theihna dingin mai tom, mai sau hong sinsak a, mite neumuhna, simmawhna, zahkonate hong thuaklawh hi.

~ Tehpih Ding Omlo Tunnu Hong Deihsakna ~
Nute in a tate ading hong deihsakna uh lian mahmah a, tehpih ding om lo hi.
Ka ta ading ci-in a lim a al a ngah khak sunsunte hong puak vanvan uh hi.
Ka ta ading ci-in Pasian kiangah thu hong ngetsak den hi.
Gupngah in vantung i tun theihna dingin Inn ah Pasian thu hong genpih in, Sunday School ah hong kha hi.
Pilna, siamna kicing nei in gual tawh tanbang kim a, mi lawhcing na suahna dingin lampi hong zonsak in, a hihtheihna zah sanga sangzaw tawh hong panpih hi.

Tehpih ding om lo Tunnu hong deihsakna!
Tehpih ding om lo Tunnu-

+ITNA
+KHUALNA
+DEIHSAKNA

-Dong Mung.