TAI KIDEMNA-A A ETTEH HUAI THUPIANG

TAI KIDEMNA-A A ETTEH HUAI THUPIANG

Ni khat pasal 8 tai kidem dingin kithawi uh a, tai kidem kipatna bul ah gi kiciamtehna munah hong ding tek uh hi.

“Man sa-in om tek un, tai dingin kithawi sa in om un,” ci-in phitmutpa hong kiko khit ciangin thau hong kikap a, “Pheng” a cih lian tak ciangin tai ding hong kipan ngeingai uh hi. Kal 10-15 bang a tai khit nungun khat hong tuk hi.

Tua a tukpa zong na sa-in naungek kah bangin kap zakzak hi. A lawm dang sagih ten a kahna aw a zak ciangun a tai uh din’ khawlin nung et uh hi.

Tua mi sagihte a lawmpa uh (a tukpa) kiangah hong pai in, va hehnem uh hi. A khem dam khit uh ciangun a vekun khut kilen sa-in kidemna zawhna kung ciamtehna lim a kizikna mun a tun dong uh hong tonkhawm diamdiam uh hi.

Tua tai kidemna en a tamzaw ten hih thupiang a muh ciangun nehno in, a mit tui uh luang kim phial hi. Kidemna saite leh ulian ten zong lamdang sa tek uh hi.

Hih tai kidemna pen India gam Maharastra state a om Pune khuapi ah National Institute of Mental Health kici lungsim cinglo kemte saina hi a, tai kidemna a kihel khempeuhte pen LUNGSIM VENG LO vive ahi uh hi.

Lungsim veng lo/lungsim cing lo, mihai leh mipoi ahih zenzen hangun bang zong sinsak uh hiam?

1. Kituak tak-a lungsim kikhat a pankhawm theih (Teamwork) ding.
2. Kimawl khat in lungsim picing neih (Sportman spirit) ding.
3. Itna.
4. Kihuai diamdiam ding.
5. A puk mite nusia loin laptoh ding a kisam hi.
6. Liangko kikim banga mikhempeuh ngaihsut ding.

Hih lungsim cing lote hong sinsakte ei a pil leh tei a kisa ten midangte etteh theih dingin i lahkhiat ding pen haksa kisa tek hi. Bang hang hiam cih leh:
1. Lungsim leh khuak a kicingin i neih tek man ahi hi.
2. Kiliatsakna, ei leh ei thupi kisakna i neih tek man ahi hi.
3. Huaihamna leh angsungkhualna bek i neih man ahi hi.
4. A puk mite phong loin a ding mite sawmpaih i siam man ahi hi.
5. Huh ding kisam hi cih mi muh i siam hangin huh ding kidon lo hi.
6. I pilna leh i hatna pen ei phattuamna ding bekin kizang hi.