MI LIAN, MI THUPI NA SUAH NOP LEH

Pasian' ukna gamah mi lian, mi thupi na suah nop leh Mi khempeuh nasem (sila) suak masa phot in.

Hong kilap sang ding na ut a, mi thupi na suah nop leh kiniamkhiat masa phot in.

Hong kithupi et ding na ut leh hong kiphat ciangin lungdam lua pah pekpak kei in la, hong kigensiat hangin maigum ngeungau pah tuan kei in. Mi' hong gensiat manin zatui/zatang ne nai lo hi teh hih mangngilh kha kei in.

Mi lian, mi thupi na suah nop leh hihtakna leh thumanna khahsuah ngei kei in la, na ngawng ah ok in, na lungtang tungah gelh in.

Mi thupi, mi lian na suah nop leh na ngimna leh geelna a tangtun' mateng Khawl loin sem den in.

Mi thupi, mi lian na suah nop leh na lawhsap hangin khawlsan tuan kei in la, na gualzawh mateng tawpsan kei in.

Mi thupi, mi lian na suah nop leh hihkhialh na neih ciangin diksak kik ding sawm in la, hihkhialh nei ngei lote pen na thak sin ngei lote hi cih phawk in.

Mi' thupisim ding na ut leh na heh lai takin pau ki-ip kisin in la, Na heh lai-in na ut teng gen buatbuat kha pah kei in.

Mi' thupisim ding na ut leh maisakna, thuak zawhna, thumanna cihte sin in. Heh pakpak kei in la, mi' thugen ngaihkhiatsak kisin in.

Mi' thupi ngaihsut ding na ut leh ni dangte thukhen kidawn in la, it zaw in. Mi na huh ciangin hong thuk kik ding lamen loin pia khia in. Na thugente tangtungsak khial ken la, na kamciam peel kei in. Na sep loh dingpi ciam kha kei in. Mi pil leh mihai tawh kikhawl thei in. Na hihna, sepna, bawlnate ah pil vang in la, Na pau khiat ma-in nih vei ngaihsun masa in.

Lai-at: Thang Khan Lian