RUSSIA IN AIRCRAFT CARRIER A BAWL THAK 2019 CIANGIN ZO DING

RUSSIA IN AIRCRAFT CARRIER A BAWL THAK 2019 CIANGIN ZO DING

Jan. 16, 2016: 1991 in USSR gam tuamtuam in a kikhen khit nungin Russia in Ukraine gam a Nikolayek shipyards kici ah galdona vanleng pua teembaw a bawl na khawlsan a, tua khit vanleng pua teembaw bawl na khawlsan vingveng hi. Ahih hangin tu in Russia ten gal vanleng leh helicopter puakna dinga kizang teembaw nasia takin bawl pha kik a, 2019 bei ma-in zo siang ta ding hi ci'n Dave Majumdar in The National Interest kici news ah a laipaih (article) gelhna ah na tuangsak hi.

Russiate' United Shipbuilding Corporation (USC) president Alexey Rakhmanov in zong 2019 ma-in vanleng leh helicopter pua ding teembaw kibawl khin ding hi ci'n Rossiya 24 new channelte kiangah na gen hi. Alexey Rakhmanov in hih teembaw bawlna tawh kisai a kicianin a gen loh hangin Russia ten hih teembaw pen Sevarodvinsk khuapi sung a om teembaw bawlna Sevmash Shipyards kici ah bawl uh hi kici hi. Russia ten a neihsa uh Admiral Gorshkov vanleng pua teembaw zong bawl pha uh a, Vikramaditya kici Indian Navyte zat dingin bawl uh hi.

2015 in Krylov State Research Center and Nevskoye Planning and Design Bureau in Russiate bawl hih teembaw lim Project 23000E Storm kici na suaksak a, vanleng tuamtuam 100,000-ton a gik pua zo dinga, vanleng 90 val pua zo ding hi ci hi. Russia ten electromagnetic catapult launch system kici zong bawl uh a, Frenchte bawl vanleng puakna teembaw Mistral-class ships kici nih a lei ding thukimna a neihsa uh France ten na zuak ut nawn lo uh ahih man Mistral-class ship kici laih dingin a bawl uh ahi hi. Russia ten electromagnetic catapult launch system kici a bawl un van ton 16,000 a gik pua zo ding a, tui galkap 450 zong puak beh ding hi.

-Sputnik