MI HAT PU LELUN

MI THAHAT PU LELUN

Pu Lelun pen ei Zomi pasal pha leh hatpente lak a khat ahi hi. Amah 1600 in Burma a Khuangnung khua-ah piang hi. Unau pasal 3 lak pan a nautum pen hi a, a pa’ min Tavai ahi hi.

Lelun pen mihat leh galdo siam ahih manin galdo makai in pang hi. Ama’ minthanna khat bel tua hunin Pawi gal hat lua a, kuamah a do ngam om lo uh a, amah bek in do ngam hi. Ni khat Khuangnung khua a nupi Hang Vung’ nu sing pua-a kuan Pawi galsim kik lam ten tuakkha in na man uh a, a kulh uah lutpih uh hi. Hang Vung’ nu Pawi galten man ci in a khuasung uh-ah thang a, a khua hausapa’ makaih in hutkhiak ding vaihawm uh hi. Tangval khat beek a pau ngam om lo uh hi, bang hang hiam cih leh Pawite zo dingin kilam-en lo uh hi. A tawp in Lelun in tangval 50 in ong zui un la i va kuan ding hi ci. A zing ciangin Lelun leh tangval 50 Hang Vung’ nu hunkhia dingin Pawite’ khua va zuan uh hi.

Lelun in a tonpihte lakah mi 30 khua nawl-ah pangsak a, 20 tawh luh ding kipan uh hi. Pawite zong na kiging khol mahmah uh a, a kongpi-ah pasal galhang 10 galvil in na koih uh a, a lai-ah meiphualpi cih in tua mun laizangah Hang Vung’ nu tusak in limtakin galvil uh hi. A sunglam kongkhak bul-ah galhang mi 5 pang thuapsak lai uh hi. Tua ciangin Lelun in a khut langnih in temsau tawi in, tua kulhpi kong cingte mi 10 a tang man om vet loin vat tuk khin pah a, a sung nung-a kongpi nihna cing pasal ngate zong a tang man om loin vat lum ziau hi.

A sungkilhna kongpi kip mah pen akhe in tuan hong phei in dianglut vat hi. Meiphual ah Hang Vung’ nu galte khatin sat lup ding kisa-in a om laitakin thakhatin Lelun in mitphiat kal sungin tua pa vat lum ziau hi. Tua ciangin Lelun in Hang Vung’ nu a ban-ah man phei in, a liangko ah batin, a phungkho (leipal tawhna) kantan in lenpih in a taipih hi. Pawi galte khat beek in zong a nung delh ngam nawn kei uh hi. Lelun hangsanna hangin Hang Vung’ nu nuntakna hutkhiat in om hi.