TU HUN TEH (A KIDOPHUAI HUN HITA EI)

 

TU HUN TEH (A KIDOPHUAI HUN HITA EI)

Makai taktak tawm mahmah a, makai nengneng tam mahmah se hi. Makai nuam leh thu nei nuam kitam napi-in mawhpuakna thudon loin thuneihna bekin deihin a mawhpuakna zo lo leh thuneihna pualah kitam mahmah se hi.

Pasian' nasem kha mangthang a vei Sia taktak tawm mahmah a, kha mangthang sangin love gifts a vei Sia nengneng kihau mahmah hi. Pasian adingin suplawh ngamin nasem tam loin mimal meetna ding hanciamna bek tawh a sem tam mahmah ta hi.

Kiniamkhiatna a gen nuam napi-in a nuntakpih ding haksa hi. Itna om lohna mun ah kiniamkhiatna omna ding mun awng zo ngei lo hi. Ka kampau, gamtat leh luhekzia hong ettehin gamta un, cih sangin ka gen bangin gamta un, a ci nuam vive kitam zaw hi.

Panmun khatpeuh na ngah ciangin na lawm na gualte in hong eng leh haza dingin ngaihsun pah kei in! Na tungah mawhpuakna vangik lianpi kinga hi cihna ahih manin nasep leh makaih na siam kei leh na hai lam a kilatna ding hi zawsop thei hi. Na thumanna, na thuman lohna leh na citlahna kilahna ding na hi zawsop den thei hi.

Sepkhiat ding leh ngimna hoih gen hat man leh mutsiam man, sum leh thatang (money and muscle power) hat man bek tawh meetang (vote) kaihkhop zawh thu tawh makai za ngahte na zahtakhuai masa het lo hi. A sepkhiatna uh a hoih man leh a thumanna uh hangin meetang ngah zo makaite zahtakhuai leh muantak cing zaw pek hi.

Pawlpi kim khatte ah khawk uk makaite nangawn kiphasak thei uh hi. Mawhpuakna sangin thuneihna bek a deih mi kitam mahmah ahih manin kidophuai mahmah hi. Mawhna (responsibility and accountability) la ngam lo, sepkhiat muh ding a om lo makaihna pawlpi leh kipawlna ah kipumkhatna ding sangin kikhenna ding, kitelsiamna sangin kitelkhialhna ding piang baih zaw hi.

By law (thu bullet) a nei lo leh a zang lo ahih kei leh a bawl phapha, zunzun phapha in a laihsuk a laihto den themthum pawlpi in Jesuh' lim leh meel sun ngei lo uh hi. Pawlpi khat panin pawlpi dangah a tai kawikawi thei mi leh gamvai tawh kisai-ah party khat panin a dangah a tawi themthum kawikawi thei mi pen huihin a mutmutna lam-a kiniil tuipaan tawh kibang hi. Ngaihsutna bulphuh kician (firm basic principle or ideology) a nei lo leh din'na kician khat a nei lo mi pen huihin a mut sim a kiling den singteh tawh kibang hi. Tua bang mite muan ngam huai lo hi.

“Pasian' thumang un," cih sangin "Makaite' thu mang un,” cih kammal a tam zawkna leh kizak mun zawkna pawlpite ah mipite nungtolh ahih kei leh lehpai uh hi. Pawlpi lutang pen Khris hi napi-in pawlpi lutang makaite tungah koihin, political society ah gam leh minam vai (politics) ah thuneihna lianpen nei leh a to (master) mipite hi napi-in makaite in thuneihna khempeuh bup lakin kumpi a suah ciangin pawlpi leh political society sungah tangpi tangta khangtohna leh kituahna piang lo ahih manin puakkham baih mahmah hi.

A khangmoi lua pawlpi leh kipawlna makai a tamna mun-ah mipite khamuang zo lo uh hi. Pawlpi leh kipawlna khatpeuh a hat lua ding i deih luat manin i hat pai luat ciangin a tuk ding baihlam mahmah hi. Mawtaw a hai tai luat ciangin a tuk ding baihlam hi. Biakna pawlpi leh minam vai kipawlna a upat tawh kituakin sepkhiatna ciapteh leh gen tham ding a nei lo mipite in belh tham sa zo loin kipawlna thak piang khiat behbeh hi.

Pawlpi kim khatte ah upate in a muhdah mi pawl khatte a gawina dingin mun dang panin sia khat peuh cialin mipi kawkna ding leh khetphim dingin zang thei uh hi. Gam makai pawl khatte Pasian' deihna bangin lamlak leh thu gen loin amau zaknop ding bek a gen ding leh a pumphat ding bek biakna makaite guai uh hi.

Sawltak Paul in, "Mite in thuman a ngaih nop loh hun, amaute’ deihna bek a zuih nop hun, amaute’ zaknop thute bek a gen ding sia a cial thuahthuah hun hong tung ding hi. Amaute in thuman thutak ngai nuam nawn loin tangthu phuahtawm peuh ngaihsutpi-in nei ding uh hi," ci-in 2 Timoti 4:3-4 sungah a genna tangtung khin zo ta hi.

Mi pawl khatte in a lawmte panmun deihsakin seh uh a, amah kiseh nuam lo hi. Ahih hangin ama'n a ngah ciangin a deihsak mite pia ngam tuan lo zel hi. Angvantuamna leh hazatna tawh a kidim thuneihna deih lua diakte kiang panin kidophuai mahmah hi.

Pawlpi kem pawl khat pen mipite tungah kingeksak thei uh a, a kikhoppih ding inn khat leh inn nih a om peuh leh lungmuang pahin a tuute don nawn sese nawn loin om hiithiat thei lel uh hi. Jesuh lungsim a deih pawlpi in Jesuh lungsim bang nei kim tuan lo hi.

Pasian' leh kumpi tungah i deih leh i nget khempeuh ngah ding hi loin sepkhiatna leh hanciamna tawh ngah loh phamawh hi. Gen hat man leh deih luat man leh lunggulh luat man tawh ngah zawh ding hi tuan lo hi. Deih i hauh mahmah hangin thukham tawh kituakin ngah zawh ding leh thuman tawh ngah dinga kilawm na om sese a, thukham leh thuman tawh kikalhin ngah zawh ding a om tei sam hangin sawt kimang loin kip zo lo hi.

Pasian in pawlpi kem Siate leh gam makaite khuak hong sawpsiang sak kik peelmawh ta hen!

 Thang Khan Lian