9/11 SUAMNA AH NONG NGAWHNA UH LAKHIA UN CI-IN SAUDIA ARABIA IN COURT AH HEK

9/11 SUAMNA AH NONG NGAWHNA UH LAKHIA UN CI-IN SAUDIA ARABIA IN COURT AH HEK

Aug. 3, 2017: Saudi Arabia kumpi in US thukhente (judge) kiangah September 11, 2001 in US gam-a World Trade Center kisuamna ah Saudi Arabia kigolh in, a suamte huhna pia hi ci-in ngawhna 25 (lawsuits filed) kibawlte lakkhiatna dingin zanhal nitak lam in thukhenna lai poimawh "court documents" US District Court, Manhattan ah khia uh hi. Saudi thukhen ten 9/11 suamna ah Saudi in huhna pia hi ci-a ngawhna bawl (plaintiff) ten Saudi in New York khuapi-a Twin Tower, Washington pua-a Pentagon leh Pennsylvania suam vanleng hawl al-Qaeda-te Gulf Kingdom Saudi Arabia in huhna pia hi cih ngawhna man hi cih bulphuh ding nei lo uh hi ci hi. Tua loin Saudi kumpi gum thukhen (lawyers) ten Saudi Arabia pen gam suakta thuneihna khempeuh nei ahih main peng theihna (sovereign immunity) ding a ngah kilawm hi ci-in a court documents uh-ah tuangsak uh hi.

9/11 ahih kei leh September 11 attacks ah sihna tuak leh liamna tuakte gum thukhen (plaintiffs lawyer) James Kreindler in, "9/11 attacks dingin Saudi gammi tampi in huhna sum pia uh ahih manin thuman panin Saudi Arabia buzo lo ding hi," ci hi. Saudi Arabia' lawyers ten Saudi kumpi kigolh lo hi cih thu tampi lak uh a, 2005 in zong CIA ten Saudi Arabia in a suamte huhna pia hi cih thuman tawh lahna ding (evidence) bangmah om lo hi na ci uh hi cihte lak uh hi.

Hih hangin 9/11 suamna vai a ngohna leh a nialna a om hangin 9/11 in US suam vanleng pikawi (hijackers) 19te lakah mi 15te pen Saudi gammi hi uh a, tua ten Saudi kumpi leh Saudi diplomats-te tawh kizopna nei Saudi gammi tuamtuam om a, tuate lakah Omar al-Bayoumi kici zong kihel kha hi. Tua loin thusim mipi muh dingin a kilakkhia lai poimawhte (declassified documents) ah 9/11 in US suamte leh leh Saudi kumpi kilukluk in, kizopna nei (collusion) mah uh hi cih thukan ten mukhia uh hi.

Congress in 9/11 attack thukanna November 27, 2002 in pan a, a thukanna pan un a muhkhiatte uh 2004 in laidal 1,000 kisuaksak hi. Laidal 28 report President lui George W Bush thupiakna tawh kisuaksak lo ahih manin tu dong kinialna leh thubuai suak lai hi. Mipi muh dingin July 2016 in a kisuaksak a, tua ah US a Saudi embassy leh al-Qaeda-te kizopna leh Pakistan a al-Qaeda-te kizopna phone nambat kizopna kimukhia zo lo hi. Congress's 9/11 Joint Inquiry co-chair Senator lui Bob Graham in US kumpi gamtatna pen selsim (cover-up) ka ci nawn kei a, tu-in khemna tawh kisuamna (aggressive deception) hi ka ci ta hi ci hi.

US gammi ten terrorist gum kumpi tungah ngawhna ding kician nei loin Saudi kumpi leh terrorists gum teng mah pawl bawl ahih manin Saudi kumpi leh a suamna kigulluk hi cih ngawhna 25 cases kicite a kipaihkhiat ding lauthawnghuai hi. 2015 in Justice Against Sponsors of Terrorism Act (JASTA) a thukhun bawl (legislators) ten US gam suam terrorists-te huhna kumpite tungah thu bawl theihna dingin "legal action" kici a bill a bawl hangun US in terrorists gum leh sum leh pai tawh huhna pia (funding) gamte tawh a kipawlna khawlsan loin Trump hun in zong Iran langpang dingin Saudi leh a kiim a gam teng ah tha va cial zaw lai hi. President lui Barack Obama hun in zong thukham bawl ten legal action lak theihna ding bill Saudi kumpi leh kumpi thuzawh a kipei (lobbying) ten vauna a bawl khit kha tam loin Obama in tua bill dal sawm in a veto power a zat sawm hangin US Congress in Obama' veto 2016 in na dalsak uh hi. US gam suamna hanga thuak kha (victims) ten US Congress in tua bangin Obama' veto a dal uh phat mahmah uh a, ahih hangin Saudi kumpi kigolh hi ci-a hekte (plaintiffs) gum thukhen ten tua bang dal theihna ding hun October 2 ciang bek hun nei ta uh hi.

#Behlapna: 9/11 attacks hangin mi 2,996 in sihna na tuak uh a, mi 6,000 val in liamna tuak hi. Van leh khantohna dinga kizang nate (infrastructure) $10 billion kiim man kisia hi. Vanleng nih - American Airlines Flight 11 leh United Airlines Flight 175 ten Twin Towers - North and South towers (World Trade Center complex, New York City) nawksak uh a, tua khit naikal khat leh minute 42 in tua inn dawl 110 tuak a sangte cimsuk zuai hi. A vanleng thumna - American Airlines Flight 77 in US galphualpi Pentagon (United States Department of Defense headquarter, Arlington County, Virginia) deng a, a building nitumna lam pawl khat dengsia hi. A vanleng lina -United Airlines Flight 93 hawl ten Washington, D.C. lam manawh in hawl uh a, a vanleng hawl khial in Shanksville, Pennsylvania kianga om Stonycreek Township lo lak deng hi. Vanleng pikawi ten a suam hun sung uh pen 8:46 a.m. – 10:28 a.m kikal hi a, naikal 2:42 sung nangawn in minthang USte galphualpi Pentagon a radar khanglo man loin a suam nuam ten a suam nopna mun teng uh (Stonycreek Township lo lak deng cih loh) suam uh hi. Passenger vanleng tawh US suam zo ten ICBM tawh US suam hi peuhmah le uh bang a ci zen tam cih Super Power gam khat thahatna ngaihsut tham cing mahmah hi.

Source: Al Jazeera News
@Thang Khan Lian