THU TELCIAN LOPI LEH SIM SUAK MASA LOIN A DEIHNA TELCIAN LOPI-IN THIKHENSAT PAHPAH DING KIDOPHUAI MAHMAH HI

 

THU TELCIAN LOPI LEH SIM SUAK MASA LOIN A DEIHNA TELCIAN LOPI-IN THIKHENSAT PAHPAH DING KIDOPHUAI MAHMAH HI

Lai Siangtho i sim ciangin mun khat bek i deihna mun bek eukhia in tua mun bek deihkaih gawpin mittaw sialkhau let teta khak ding lauhuai mahmah hi. A ban simsuk beh lo ahih kei leh mundang sim beh lo ahih kei leh a gen nopna bang hiam cih ngaihsun sese nawn loin mun khat bek bullet teta khak ding kidophuai mahmah hi.

Gentehna dingin tua bangin i hih khak leh hih kamsang Hosea laibu sunga mun li en pak lehang Pasian in kamsang khat in numei paktat a teen'pih ding phalna pia-in sawl a, Israel mite galhiam sumai in, ka mi na hi nawn kei uh a, kei zong note’ Pasian ka hi kei hi, ci-in nusiatsan (abandoned) den leh Israel mite aa dingin lametna ding om nawn vet lo ding bang hi. Lai Siangtho bek hi loin news ahi a, thu khatpeuh i sim ciangin a kim sipsip in simsuak lopi-in a deihna lim takin ngaihsun lopi leh khinkhai masa lopi leh telcian lopi-in khensat ziauziau ding kidophuai mahmah hi.

Topa in Hosea tungtawnin Israel-te tungah thu a na gen cil lai-in, amah in Hosea kiangah, “Hih gammite kei tungah citak loin pasian dangte bia uh ahih manin, nang zong hong tulpih lo ding numei paktat khat teen'pih in la, tua nu tawh ta nei in,” a ci hi. Tua ahih ciangin Hosea in zong Diblaim’ tanu Gomer teen'pih a, tua nu hong gai-in tapa khat hong nei hi. (Hosea 1:2-3)

Topa in kei kiangah thu hong genkik a, “Lawm a ngai khinsa, pasal tawh a lumkhawmsa numei khat tawh va kingai in. Israel mite, pasian dangte kiangah pai uh a, leenggahphehkeu tawh a va biak uh hangin, amaute ka it lai veve mah bangin tua numei va it in,” hong ci hi. (Hosea 3:1) Tua ciangin Topa in Hosea kiangah, “Na tapa’ min dingin Jezreel phuak in; bang hang hiam cih leh ama pute Jehu in Jezreel khua-ah a mi thahna hangin Israel kumpipa tungah gim ka pia baih ding a, Israel mite tungah Jehu’ suan-le-khakte’ ukna ka beisak ding hi. Tua ciangin Jezreel kuam-ah Israel mite’ galhiam khempeuh ka sumai ding hi,” a ci hi. (Hosea 1:4-5)

Loruhamah a tei khit ciangin Gomer gai-in tapa khat nei leuleu hi. Tua ciangin Topa in, “Na tapa’ min dingin ka mi hilo a cihnopna Loammi phuak in; bang hang hiam cih leh no Israel mite, ka mi na hi nawn kei uh a, kei zong note’ Pasian ka hi kei hi,” a ci hi. (Hosea 1:8-9)

Lai khatpeuh na sim ciangin simsuak lopi ahih kei lei a kawm (cover) bek etna tawh a gelhte deihna telcian lopi-in thukhensat nawn kei in. Lai sim na thadah leh na theih tawm ding cihna hi. Na theih a tawm leh na telcian tam lo ding ahih manin thu na gen ciangin na upmawh, phuahtawm leh zuau a tam zaw na behlap loh kiphamawh ding cihna hi. Hih pen ei Zo suante ngeina hi a, politics (naingyanzi) uk kineih leh thei kisa pha diak nautang pawl khatte leh biakna Sia nengneng pawl khatte suuksia pha diak zaw lai uh hi. Kilawhsawn dingin a deih huai het lo pawl hi.

Moral: Do not judge a book by its cover.

 Thang Khan Lian #ZUNs reports