TRUMP IN RUSSIA LEH US NUCLEAR DEAL PANIN US DOKKHIAT DINGIN GEELNA NEI

TRUMP IN RUSSIA LEH US NUCLEAR DEAL PANIN US DOKKHIAT DINGIN GEELNA NEI

Oct. 21: US President Donald Trump in Russia tawh nuclear galvan thukimna (nuclear weapons deal) panin US dokkhiat dingin geelna ka nei hi ci-in pulak themthum ta leuleu zel hi. US-Russian nuclear weapons deal INF Treaty kici pen kum 30 val a upa hita hi. Nuclear galvan i cih pen a galvan lak panin a thahat penpen pawl hi a, kidona ah kizang ngei lo hi. Gam tawmkha bek - UK, US, France, China, Russia, India, Pakistan leh North Korea cihte bekin nei hi.

Russian-American nuclear agreement - INF Treaty kici pen
US President Ronald Reagan leh Union of Soviet Socialist Republics (USSR) President Mikhail Gorbachev in 1987 in thukimna suai a kaih uh ahi hi. INF i cih pen thukimna pen Intermediate-Range Nuclear Forces treaty cihna hi a, gam nih ten tuipi pansan a kilawn galvante (sea-launch weapons) kihel loin nuclear leh non-nuclear missiles namte short range leh medium range ciang kap ban teng a bawl leh neih khamna dingin Cold War hangin gam nihte kikal ah kikhenna lianpi a om hun bei dek kuan a thukimna ahi hi.

US President Donald Trump in Russia in INF Treaty palsat hi ci-in ngawh pong ahih manin gam nih ten a thukimna uh Russia in palsat hi ci-in ngaihsutna nei a, "Ko galvan ka neih theih lohna dingun thukimna a om lai-in Russia in tua bang galvan nei thei lo ding hi," ci hi.

Russia in INF agreement thukimna palsat in kalsuan ci-in US gam makai in a ngawh masakna hilo a, 2014 in zong tua hun a US President Barack Obama in Russia in INF Treaty palsatin lei panin a kilawmkhia (ground-launched) cruise missile test hi ci-in na ngawh hi. Tua hun in zong INF Treaty panin Barack Obama in US na dokkhiat sawm a, ahih hangin Europe gam makaite nawhna hangin na dokkhia lo a, Europe gam makai ten INF Treaty panin US kidokkhia leh nuclear galvan khinsate sungah nuclear hoihpen bawl dinga kitaitehna (arms race) piang ding hi cih lunghimawhna na nei uh ahih manin a nawhna hangun Obama in US na dokkhia lo hi cih reports om hi.

US in Russia ten INF Treaty palsat in medium-range missile thak "Novator 9M729" bawl hi ci-in ngawh in pang tentan a, "Novator 9M729" zangin Russia in North Atlantic Treaty Organisation (NATO) gamte leh NATO sunga members United States, United Kingdom, Germany leh Spain cihte kihelin a galkap kigawmte thakhat thu-in hun sawt lo sungin kap ziau thei hi ci-in ummawh in kihta uh hi.

BBC defence leh diplomatic correspondent Jonathan Marcus in zong Donald Trump in INF Treaty panin US dokkhiat ding a geelna a pulakkhiat ma-in Russia in INF Treaty palsat in missile bawl in zat dinga mansa in koih hi ci-in lunghimawhna na nei hi. Trump in INF Treaty panin US dokkhiat dingin a geelna a pulakkhiat pen galvan neih uk leh dalna (arms control) adingin supna lianpi piangsak ding hi ci hi.

"Misiam (experts) tampi ten INF Treaty vai tawh kisai kihona neih zom ding hi cih lunggulhna leh upna lianpi nei uh a, INF Treaty ah Russia kihelsak kik ding lunggulh uh hi. Tua loin Cold War hun lai bangin strategics lamsang ah kidemna hangin arms control treaties khempeuh a siat leh lawhsap ding lau uh hi," ci-in Jonathan Marcus in ci hi.

Experts pawl khat ten bel INF Treaty panin Trump in US a dokkhiat nopna hang thudang om hi ci uh hi. INF Treaty pen America a Washington leh Russia a Moscow bekin 1987 in a thukimna uh a, China in hih thukimna suaikai lo ahih manin Donald Trump in China in medium-range missiles bawl in zat dingin koih ding hi cih lungimawh in lauhna nei hi.

Russia in US in INF Treaty panin kidokkhiat ding a geelna a pulak "a kihtakhuai mahmah kalsuanna hi" ci hi. Russian Deputy Foreign Minister Sergei Ryabkov in, "INF Treaty pen leitung bup bitna ding leh nuclear galvante huam kha teng bitna (international security and security in the sphere of nuclear arms) dinga poimawh leh kidona ah geelna lawhcinna ding geelna kician a kip leh kho (strategic stability) in a om theihna dinga kisam hi," ci hi.

"US kilawm lo leh gilo masa in gamtang in international thukimnate (agreements) panin a kidokkhia leh teel ding thudang om lo ding a, military technology kihelin a thukimna dingin kigamtang ding hi. Tua dinmun ciang tun ding Russia ki-ut lo hi. US thukhensatna pen a lauhuai mahmah kalsuanna hi," ci-in Russian Deputy Foreign Minister Sergei Ryabkov in ci hi.

Russia in a missile thak "Novator 9M729" tawh kisai thu kician a gen loh banah INF agreement kipalsat lo hi cih loh tam gen lo hi. 2007 pekin Russian president Vladimir Putin in INF Treaty pen Russia' phattuamna leh meetna (interests) dinga thukimna hi nawn lo hi ci-in na gen ngei khin zo hi.

Bang thu hong piang ding hiam?

INF Treaty vai tawh kisai tu kal bei kuan ciangin Russia khuapi Moscow ah neih dingin geelna kinei hi. Hih kihona ah
US National Security Adviser John Bolton in Russia' kiangin INF thukimna panin US kidokkhiatna pulak dingin kilamen hi. INF thukimna panin US a kidokkhiat leh Cold War hun lai sangin galvan ah kitaitehna nasia zaw piangsak ding leh international agreements panin US dokkhiatna zongsat tawh min deih a buai thapai niloh pa pen Donald Trump suak ding hi.

Source: BBC; CCBC Newsround; NPR
@Thang Khan Lian Lian #ZUNs

Photo: Nuclear-capable missile galvan leh 1987 in Russian-American nuclear agreement (INF) Treaty US President Ronald Reagan leh Union of Soviet Socialist Republics (USSR) President Mikhail Gorbachev in thukimna letmat a thu laitak uh