TU LAI POLITICAL DEMANDS VAI

TU LAI POLITICAL DEMANDS VAI

Sanginn khat ah kitualvatna (riots) a piang lai takin a pa in a tapa awlmawh lua ahih manin phone in hopih pah samsam hi.

👴: Hello boih, koi ah om na hia?
👦: Hostel ah.

👴: Hoih ei boih. Na sanginn uh-ah kitualvatna piang hi cih za ka hih manin kong pua kankhia peuhmah kei in. Kitualvatna a kihelte nung va zui se kei in. I innkuan nuntak khuasak zia (family background) thei na hih manin na room sung kong kisungkalh in la, om hithiat lel in. Ka thugen na za hiam?

👦Aw le pa... Za mahmah ing.

👴Bang hanga kitualvatna piang hiam boih?
👦Sanginn neite in sangkah man fee 1,000 in khangsak uh ahih manin sangnaupang lungkim lote in tua thukhensatna dokkik dingin a kiphinna nei-in a nget uh kithudon lo ahih manin kitualvatna piang hi.

👴Aw hi maw? Tua ahih leh nang tu-in koi ah om?
👦Nong cih bangin ka kong kisungkalh in ka room ah om ing pa.
👴Mize! Manlang in pusuak in la, kitualvatna a kihel na lawmte nung va zui in la, na sanginn nei pa uh va golum in.
👦Bang e pa? Na room sungah om khinkhian in la, pusuakkhia kei in ci khin phet hilo na maw?

👴Sohai. Uihai kisa maw veivai. Manlang in pusuakkhia in la, na sanginn fee uh hong khiamsuk kik khak uh leh na tuah khak peuh mi va ban thah in. Mi na thah ngam kei leh zong bandh bek bawl ding dan ahih kei leh lungphona lahna ding beek makaih in la awng lala beek ve mize.

👦Bang gen na mawk a pa?
👴Dai o, sohai! Tem tawi in pusuakkhia in la, na tuah khak peuh va that in. 😡😡

Politics muh zia i cih hih dan hi mawk hi. I hamphatna, thuneihna leh meetna (privilege, rights and interests) hong kisukkhaksak lam theite kam bei bang leh khut bei bangin dai takin khutzep in om hithiat thei nawn lo uh hi. Makaite gensia leh langpang hi ci-in i pum ngawh pahpahte zong zong amau meetna ding, hamphatna ding leh political rights bang hi a, kampi bek tawh mutpu makaite thuaklah lua khin na hi nuam mahmah uh hi.

Tang leh tahum lom om khawm lakah tahum bekbek hong atpih makaite' nasepna tawh sawt i lungkim luat leh Zogam ah kialpi hong tung kei leh zong namdangte khantohna kidem zo ngei lo ding a, a sawt teh Jacob' tate antaw dingin Egypt gam ah a kuankhiat bangun kuankhiat loh kiphamawh ding hi. I antawk teng i kham gaih khit ciangin Jacob' innkuan khempeuh Egypt ah a tai bangun gamdang zuan in i taikhiat mang loh uh kiphamawh ding hi.

Khantohna leh hamphatna ding delh in i ngaihna ding hanciam in, makaite nawh in, a om masasa a laihkhiat ding uh i nawh mengmeng kei leh khantohna leh hamphatna in ei hong zuan ngei lo ding hi. Moses in Israel mite Egypt mite in sila in a zatna uh panin a hotkhiatna dingin kumpi inn sungah om hithiat loin Egypt gam ah Israel mite ompih den hithiat lel in, a tang lo suangtum bangin om belbal cip den in, a omna mun panin Israel mite up theih ding kam uang leh a piang ngei lo ding rhetoric kampau leh utopian ngaihsutna bullet lo hi.

Politics ah visions kisam mahmah napi muh theih dinga piangkhia zo lo vision hoih nono sangin sepkhiatna tawh lahna zangin pragmatic policy zat kisam zaw hi. Mipite in a hamphatna ngah uh-a kilawmte ngah loin, a hamphatna ngah dingte uh ki-eukhiatsak in, a hamphatna ngah ding uh-a kilawmte makaite gilpi sung bek leh namdangte khut sungah a lut thapai in mipite a gilpi uh hong hawm ciangin dai dide zan siangtho bangin dai khikhe in omcip dide het lo ding uh a, a ha uh hong kigawi pah ding hi cih phawk hun mahmah ta hi.

✍️Thang Khan Lian