SYRIA GALKAP TEN ISRAELTE VANLENG KHAT KAPKHIAT SAKIN KHAT KAP KHAK SAK HI CI

SYRIA GALKAP TEN ISRAELTE VANLENG KHAT KAPKHIAT SAKIN KHAT KAP KHAK SAK HI CI

March 17, 2017: Zan zingsangin in Israel ten Syria galkap ten nung diakin ISte khut sung panin a laksak uh Roman kumpite khuapi lui Palmyra ah Syria galkapte pan mun khat va kapsak uh hi. Syria in a beisa in Israel a ngawh bangin ISte a gupna uh Israel in hong lak kik leuleu in Syrian airspace ah Israeli Air Force-te gal vanleng li hong lenglut a, khat kikapkhiat sakin khat kikap kha hi ci-in tu ni-in Syrian Army in pulak hi.

Israel galkap ten bel Syria galkap ten air defense system leh ground-to-air missiles tampi tawh hong kap uh a, missile khat beek in vanlengte kha loin missile khat Isrealte' Arrow missile defence in Jerusalem leilu lamah khat kapkhia hi ci uh hi ci-in nisim a kisuaksak Israel new Haaretz in suaksak hi.

Syrian army command in bel ka anti-aircraft systems un Syria leitang ah Israel Air Force-te vanleng khat kapkhiat sak in, khat kap kha a, tua khit nungin a vanlengte uh kihemkhia in, leng mang uh hi ci-in statement a piakna uh Sputnik news in suaksak hi. Zan zingsang in Israel galkap ten Sputnik newste kiangah ka gal vanlengte uh Syria galkap ten missiles tawh hong kapsak uh a, ahih hangin hong kap kha lo uh hi ci uh hi. Israeli Channel 10 in a genna ah Israelte vanleng pen Syria kumpi' galkap ten S-200 surface-to-air missile systems (SA-5) tawh na kapsak uh hi ci-in gen hi.

Nung kha-in zong Israel galkapte gal vanleng in Syria-Lebanon gamgi a om Syria khuapi Damascus kianga Syria galkapte pan mun va kapsak ngei uh hi. January kha in zong Israel ten Damascus khuapi-a Syria galkapte airport ah bomb va khia uh hi. Syria galkap ten Israel in terrorist-te thapiakna dingin bomb hong khiat hi ci uh hi. Nung kum December kha-in Syria in Israel Defence Force (IDF)-te galvanleng khat leh tuithe vanleng (unmanned aerial vehicle/UAV) Quneira province leitaw-nitumna lamah kikapkhiatsak hi ci hi. Ahih hangin IDF hih thu nial uh uh hi.

Nung kum November in zong IDF ten Syria panin hong kikap dinga upmawh missile khatin Israel in a ukna Northern Golan Heights hong kha a, a si leh a liam om lo hi ci uh hi. Tua khit in IDF ten a thuk kikna ding Syria kap hi. Syria leh Israel pen a kido lian loh hangun Syria in amau leitang Israel in a ukna Northern Golan Heights la kik nuam uh ahih manin set lam tawh kisai leh galvan tuamtuam tawh a langtang lua loin kido (technically at war) do uh hi. Israel news leh news tuamtuam ten zong Israel ten Syria gam ah Israel in 2006 in a kidopih uh, tu lianin Syria gam-a Syria kumpi/galkapte huh a om Lebanese group Hezbollah-te mawtaw hon (convoy) kap uh hi ci-in suaksak uh hi. Hih thu hangin zan nitak in Jordan kuam teng panin missile kilawn zaihziah a, mau vengvung hi ci-in Israel galkap ten ci uh hi.

Source: Sputnik, Al Jazeera and news Agencies
A tei: Thang Khan Lian @ Zomi United News