NIPINI (SUNDAY) HONG PIANKHIAT ZIA

NIPINI (SUNDAY) HONG PIANKHIAT ZIA

Ni dang lai-in Nipini pen Ni (Sun) ni ci-in na kiciamteh a, kumpi in zong a tuam in ciamteh se loin ni mawkmawk ni bangin na kizang lel hi. Ahih hangin March 7, 321 AD in Roman Kumpi 57na leh Roman Kumpi gam 306 AD panin 337 AD kikal sung a uk Constantine I (Constantine the Great ahih kei leh Saint Constantine zong a kicipa; Latin in Flavius Valerius Aurelius Constantinus Augustus kici) in Nipini pen kumpi’ khawlni (official day) dingin na pulak ahih manin tua ni-in zumkong mangkong khempeuh na kikhak hi.

AD 4 kipat cil in Kumpi Constantine in Roman Kumpi in a ukna sung khempeuh ah Nipini in mipi’ pawi (public festival) a kizatna dingin thukham khauh mahmah (decree) khat na bawl leuleu a, hih Ni ni (Sunday, i.e. Nipini) thu-um lo (heathens/pagans) leh Khristian ten zahtakna pia in khawni dingin na zang khawm thei ta uh hi.

Constantine in Nipini pen thu-um lote leh Khristiante ngaihsutna kibang lote leh kitukalh khempeuh a kibat theihna ding leh pumkhat a suah theihna dingin khawlni dingin thukham a bawl ahi hi.

Ahih hangin Kumpi Constantine in ama’ ngaihsutna tawh hi bangin a vaihawm hi ziau lo hi Thu um lo khempeuh in Khristian a san’/pom kim theihna ding uh leh biakna vai-ah zaa lian zaw leh thuneihna lian zaw sem bishop ten a neih theihna ding uh ngiamna tawh bishopte’ thuzawhna hang leh bishopte ngian hang hi zaw hi. Thu-um lo khempeuh thu-um (Khristian) hong suak le uh thu-ummi hong kibehlap in, i thuneihna hong khangin thuneihna lian zaw sem kinei ding hi cih geelna tawh bishop ten kumpi Constantine kiangah Nipini pen khawlni dingin a pulakna dingin a na thuzawh uh hi zaw hi.

Source - GC 53.1