US SENATE IN TRUMP TEEL FBI DIRECTOR THAK DINGIN THUKIM TA

US SENATE IN TRUMP TEEL FBI DIRECTOR THAK DINGIN THUKIM TA

Aug. 3, 2017: US Senate in zan in Trump in US Presidential election ah Russia kigolh hi cih ngawhna thukanna a neih manin a tawpsak FBI Director lui James Comey' za laih dingin vote 95-5 tawh FBI Director dingin Christopher Wray thukim uh hi. Wray pen President George W Bush hun in Justice Department na len a, corporate ten sum nekgukna thukanna nei in na pang a, Assistant Attorney General in charge of the Criminal Division na len hi. Comey zong Bush administration hun in U.S. Department of Justice (DOJ) ah Attorney-Genral leh Obama administration ah FBI Director hi a, Trump in Obama administration ulian teng ama hun in a paih hangin phat mahmah in FBI Director a letsak suak hi a, FBI bureau a sungah a paktak (admired) mahmah uh ahi hi.

"FBI Director let ding pen tu laitak hun haksa hi. FBI Director lui Comey zong Russia kigolhna thukanna a neih manin kipaikhia a, kumpi in a beisa in mi a hun khop paikhia ta hi," ci-in FBI Director thak ding nomination debate hun ah Senator Amy Klobuchar in ci hi. Republican Senator (Nebraska) Ben Sasse in, "Chris Wray in mipite muanlahna panin gamtat kilawm leh citna hong guan dingin lamen ka hih manin amah ka vote hi," ci hi.

Wray in nung kha-in FBI Director thak ding Senate Judiciary Committee ah Republicans leh Democrats-te gupna leh phatna na ngah a, FBI bureau sungah politics kigolhsak lo dingin kamciamna na nei hi. FBI Director 8na dingin Senate in a teelcing khit in Wray in, "Ka thumanna pen upadi (constitution) leh deidan nuam nei lo thukhun (rule of law) hi a, ka nasem sungin sitna/ze-etna (tests) bangbang ka tuak zongin constitution leh rule of law mah ka bullet ding hi," ci hi.

Al Jazeera reporter Heidi Zhou-Castro in nung kha-in Senators confirmation hearing ah Trump tungah thumanna (loyalty) Comey bangin na nei ding hiam ci-in dotna kibawl a, tua hun in Wray in nawhna tawh thukanna khawlsan ding sangin ka kitawp zaw ding hi ci-in dawng hi ci-in Washington, DC panin gen hi. Wray pen drama panin a kidaang koih mi leh mi kineih themthum lo ahih manin Republicans leh Democrats ten Trump in a teelna gum uh hi ci-in gen beh hi.

Comey in president kiteelna ah Russia kigolhna a kan manin Trump in May 9 in Comey FBI term 10 len ding hinapi a za kim khat zong len man nai loin Hillary in private email server a zat thukanna ah citak lo hi cih paulap in tawpsak hi. Tua khit nung kha thum sung phial Andrew McCabe in acting FBI director (interim period) dingin a let pak ahi hi. Wray pen mihausate thukham palsatna (white-collar crime) leh regulatory cases cihte thukanna nei King & Spalding law firm tawh kipawl a nasem ahi hi.

May 2001 panin May 2005 kikal Justice Department ah rank tuamtuam len in Wray in na nasem a, September 2003 in head of the criminal division na len hi. Principal Associate Deputy Attorney General zong na len ngei hi. May 1997 panin May 2001 kikal ah US attorney's office for the Northern District of Georgia ah federal prosecutor in na pang a, New Jersey Governor Chris Christie in Bridgegate scandal kici nekgukna ngawhna thanghuai a tuah lai-in na gum aa, thukhen in na pang hi. 1992 in Yale University panin law degree graduate buaih na ngah hi. Wray pen New York City ah December 17, 1966 in piang a, Yale University ah a classmate Helen Garrison Howell 1989 in kiteenpih a, kum 50 mi hi. Ta nih nei uh a, Republicans ahi hi. Trump in June 7, 2017 in FBI Director dingin a min a guang (nominate) ahi hi.

Bottom line: US presidential election ah Russia' kigolhna thukanna lah a kamciamna a letkip leh khawlsan tuak kei ven Trump' hehna hai dawn in hong kihel kha kik tam cih hong tung ding hun bekin hong hilh thei ding hi.

Source: New York Times; Washington Post; Al Jazeera and news agencies; Wikipedia
@Thang Khan Lian #ZUNs