TRUMP HEHNA HAI DAWN KHINSATE LEH A HEHNA A THUAKNA UH BANG HANG HIAM?

TRUMP HEHNA HAI DAWN KHINSATE LEH A HEHNA A THUAKNA UH BANG HANG HIAM? 

Aug. 2, 2017: Ni dang lai-in kumpite pen Pasian bangin thuneihna khempeuh (Divine Rights) nei uh ahih manin kuamah in kumpite thuneihna nial ngam lo a, kumpite a ut bangbangin a gamtat hangun khial ngei loin khial thei ngei lo hi. Tu hun ciangin democracy tawh ki-ukna gam a tamzaw hita a, president-te kumpi hilo in, a ciangtan hun nei dingin mipi ten amau sik leh tang dingin nasem ding leh makai dingin a teel uh ahih manin mipi ten president paih (impeached) theihna ding thuneihna nei ta uh hi. Zanhal in Trump in, "Trump administration communication liansak kik in, hoihsak kik ding hi," ci-in White House Press Secretary Sean Spicer sanga junior zaw Anthony Scaramucci in White House Communication Director dingin a guan ni 10 sung bek lensak in paikhia a, "Tu ni pen White House adingin ni thupi ni hi," ci hi. Trump' hehna hai dawn kha khinsate kua teng hi a, bang hanga Trump' hehna hai dawn kha uh hiam cih a tomkim in en pak ni.

1. January 30, Sally Yates: Trump in President a let phet in Muslim gam sagih a kipanin khualzinmite US ah lutsak lohna dingin "Travel Ban" executive order suaikai hi. Acting Attorney-General in travel ban pen US upadi (Constitution) tawh kituak lo hi ci-in travel ban gum nuam lo a, Justice Department uliante kiangah memo khak in, travel ban na gum kei un a cih manin Trump' hehna hai dawn masa pen hi. Sally Yates in a sepna ni 11 bek len man hi.

2. February 14, Michael Flynn: US Presidential election ah Russia tawh kigullukna ngawhna thu ah Flynn awk kha a, Russian ambassador Sergey Kislyak tawh a kimuhna leh kihona hang leh Russia tungah khalna (sanctions) lakkhiat ding a deih manin gensiatna tampi tuak ahih manin Trump in a tawp dingin sawl a, Feb. 14 in National Security Adviser panin kitawp hi. Flynn in 23 bek NSA len hi.

3. February 19, Craig Deare: Trump' Latin America policy leh kulhbaang ciang vai a deih loh manin Trump in National Security Council director panin tawpsak a, Deare in a sepna za kha khat zong len man loin Feb. 19 in Trump' hehna hai dawn hi.

4. March 11, Preet Bharara: Trump administration in Obama' administration hun lai-a ulian khempeuh tawpsak ding geelna nei a, Preet Bharara tawp dingin thu a piak hangin tawp nuam lo hi. Trump administration ah New York Federal prosecutor kha nih zong len man loin Trump in tawpsak hi.

5. March 30, Katie Walsh: Trump in President a let kha nih khit in heath care bill a siat gawp manin lungkim loin White House Chief of Staff a letna za Katie Walsh in March 30 in tawpsan hi.

6. May 9, James Comey: Presidential kiteelna ah Russia tawh Trump kigullukna ngawhna thu a kan manin Trump in Hillary Clinton in private email server a zatna thu a kanna ah Comey nasepna lungkimhuai loin, citak lo hi cih paulap pongin kha li zong FBI Director len manin loin Comey tawpsak hi.

May 18, Mike Dubke: Trump huh nasemte (staffs) nasepna hoih lo hi cih gensiatna a om manin kha thum sung White House Communication Director a let khit ciangin Mike Dubke a sepna panin kitawp hi.

July 21, Sean Spicer: Trump in amah sangin sinna panin theihna (experience) hau lo zaw Anthony Scramucci White House Communication Director dingin deihsaktuam in, ama tunga ulian dingin a guan manin lungkim loin White House Press Secretary kha guk a let khit nungin Sean Spicer kitawp a, a kitawp ni-in Spicer in, "Ka kizep dan (suits) mudah in, ka sam hiat dan hong gensiat sak manin hih bang thuak zo nawn lo hi'ng. Mihing khatpeuh in thuakzawhna a hun ciang kinei hi. Na nasepna uh-ah hong lawhcing ta un," ci-in a kitawpna thu pulak a, American mipite lungphawng (shocked) mahmah hi.

July 25, Michael Short: White House Communication Director thak Scaramucci in hong let khit phet in White House a media lam vik pawl kiban tawpsak ding hi ci-in vauna a bawl manin Trump in a tawpsak ding lau-in a tawpsak ma-in White House Assistant Press Secretary kha thum a let khit teh July 25 in Michael Short in a sepna tawpsan hi.

July 28, Reince Priebus: White House sunga uliante khat leh khat amau sungah kilem lohna, ki-elna leh kilaina (infighting) hang leh White House sunga thupiang information mediate kiangah pholakkhia hi cih ngawhna hangin Chief of Staff kha guk a let khit nungin Trump' hehna hai dawn a, kitawpsak hi.

July 31 31, Anthony Scaramicci: Chief of Staff thak dingin a muan mahmah John Kelly in Chief of Staff a let theihna ding a thukimpihna (recommendation) a piak manin ni 10 bek White House Communication hong hoihsak ding kik ding hi ci-in Trump' phatna ngahpa leh White House a media lam vik pawlte lakah information pholakkhia teng kiban tawpsak ding hi ci-a vaupa Trump in White House Director panin tawpsak hi.

Trump in Chief of Staff thak John Kelly in White House sunga nasepna khempeuh leh nasem (staff) khempuh tungah thuneihna nei ding a, ka makpa Jared Kushner leh ka tanu Ivanka Trump (a nupa un Trump' senior adviser) leh Chief Strategist Steve Bannon in White House Chief of Staff lui Reince Priebus hihna bang loin na khempeuh John Kelly' tungah report den ding uh hi ci hi.

Trump administration sunga uliante pen thuneihna kituh (power struggle) in kido den uh hi. Chief Strategist Steve Bannon in Afghanistan galdona ah gualzawhna ding leh leitung mun tuamtuam ah US galdona ah strategy hoih nei lo cih ngawhna tuak a, Trump leh a kal uh kigamla semsem ahih manin kitawpsak ding hi cih ging hiauhiau hi. Secretary of State Rex Tillerson zong a thu pai lo leh a ngaihsutna kilaksak mel lo ahih manin a kitawp dingin thu ging hiauhiau hi. UN a US Ambassador Nikky Haley zong UN ah nasemna lungkimhuai mah hiam, hoih mah hiam ci-in Trump thudotna neinei ta ahih manin lungkim loin kitawp dingin ki-ummawh hi.
National Security Adviser H.R. McMaster zong a za a let cil in Trump in phat mahmah napi tu-in Pentagon ah Afghanistan strategy a neihte Trump lungkim lo ahih manin a sepna sawt len nawn lo kha dingin kigen hi.

Source: The Washington Post; Romper; The Hindu
@Thang Khan Lian #ZUNs