VANGSEL ZOLEI LEH ZOMI

 VANGSEL ZOLEI LEH ZOMI

I gam leh minam itnate, leh i minam min tawh kipawlnate:

1. I mipihte tungah vangik suan/guan behna ding lel leh lunggimna va guan behna ding lel uh
2. I mipihte hun lo kul lopi-in meigong va suahsakna ding lel
3. I mipihte nu leh pa nei kimlai hun lo kul lopi-in tagah lubawk va suahsakna ding lel
4. I mipihte hun lo kul lopi-in liam leh bai a tuahna ding uh, leh hun lo kum lopi-in sih hanmual ah hong liamsanin kulsin ah a zaalna ding lel uh
5. I mipihte lungnuam takin Lungdam Bawl muak dingin i kithawi henhan kimlai Lungkham Bawl suaksak zawsopin luankhitui sungnek in nei-in lungzuang leh mausakna ding lel uh
6. I mipihte lungnuam leh lungmuang takin a om hithiat ding kimlai va vaulauna hang leh om muang kimlai va mot suamna hanin tualgal gim namsakin pautau leh liing kawmin a omna ding lel uh
7. I mipihte thuakna ding lelin molhtum leh galvan i kisuahna ding leh molhtum leh galhiam i neihte i mipihte tung bekah zat khumna ding lel leh i khut thak siakna in zatna ding lel
8. I kimipihte a ki-it leh kituak kimlai philtang bangin a khenzak ding lel; loma kikhat selung leh sinthu kituakin a luangkhawm kimlai a lehluansak ding lel
9. I mipihte anbang ki-it kimlai dongal tangsak ding leh laizom melma a suaksak lel ding
10. "Ka minam leh gam ka it hi, hu-in ka sihpih ngam a, 'ka it hi, ka ngai hi,' a kipumkhat ding geel ung," kicici pong napi-in Zogam leh Zomite bang ningzu a zo leh suuktum mang nuam bek leh unau beelkang kituh a bang sak ding lel

ihih khak leh gam leh minam kuama'n it nawn sese loin, gam leh minam min tawh kipawlna teng phiatmang meng zong kuamah hun lo kul lopi-in sih beh kisam nawn lo ding a, kul lo hun lopi-in kuamah meigong leh tagah suah beh nawn lo ding a, patau leh lau in a liingte lungnuam takin nungta thei zaw ding uh hi. I minam itna leh i minam min tawh kipawlna om khinsate i mipihte noptuamna, hamphatpihna ngahna ding leh lametna a guan dingin i zat kei ding leh minam it leh minam min tawh kisam sese lo hi.

Angma ding khualna leh panmun deihna bek tawh lehluan sinthu lelin i minam it nawn kei ni. Tua ding bekin i minam min tawh kipawlnate zang nawn kei hi. I minam itna leh i minam min tawh kipawlnate i mipihte gim thuakna ding, dogal kisuahsakna ding, liam leh baina ding, hun lo kul lopi-in sih hanmual a zuatna dingun zang nawn kei ni.

"I minam pen i sihpih ding hi loin i nuntakpih ding hi zaw hi," ci-in Rev. Khup Za Go a gen a kammal a khiatna lim takin ngaihsun pha kik ni. Maban ah i minam itna, minam min tawh kipawlnate leh kipumkhatna ding paulapnain kuama'n liam leh bai a tuahna, mat leh hen a tuahna, hun lo kul lopi-in sih hanmual hong liamsakna, kisam lopi-in dipkuat pautauhna a tuahna ding uh hi nawn kei ta hen!

A hong suak ding Kilemna Kumpi, Nopsakna Kumpipa i i ngak lai takin kilemna leh nopsakna mikim tungah hong puak ta hen! Kilemna ding deih lopi-in Kilemna Kumpipa i muak khak leh naungek kum nih nuaisiah a that cimit kahna leh hagawina a piangsak Herod i bang kha zawsop ding hi. Khristian hun sung beek kuamah peuhin lungkhamna ding hong behlap nawn loh ding Zomi khempeuh min tawh ka hong thum leh ngen ngetngut hi. 🙏🙏🙏

Hong lang bawl leh gal bawl minam dangte leh Covid-19 pandemic virus zong kithuaklah mahmah khin zo hi. Minam it luatna leh minam min tawh kipawlna hangin hun lo kul lopi-in a si khinsa teng zong hun khin lua zo hi. Tua ahih manin i miman itna leh i minam min tawh kipawlnate Zonamkhandal leh zomi virus suaksak nawn kei ni, cih Zomi leh Zolei a it khempeuh sik leh tangin hong ngen ngetngut ing. 🙏🙏🙏

✍️ Thang Khan Lian #ZUNs reports

MENE, MENE, TEKEL, PARSIN

 

MENE, MENE, TEKEL, PARSIN

Ukna a nei gam uk leh kumpite a phengtat uh a, a thuneihna uh a khengvaling zangin (abused power), thuman lopi-in in a vaihawm uh ciangin a gam mite gimna ngahin cimtak leh mudah uh hi. Min Aung Hlaing in zong thuman lopi-in ukna buluhin, a thuneihna a kipsak theihna dingin hamphatna leh noptuamna a ngaihna dingun a vaihawm lo a, ama aituam hamphatna leh thuneihna kipsakna dingin mite tungah gimna guan ahih manin a gam mite in muhdah uh a, a thu leh hiam tawh a gam mite in a ukna lehdo uh hi. A ukna cik hun ciangin bei ding a, a gamtatna tawh kituakin tawikhaina cik hun teh tuak ding hiam cih gen theih loh hi.

Tua mah bangin ei sungah thau tawi ZRA leh PDF ten zong thau a tawi uh ciangin thunei lua kisa-in saupi ngaihsutna nei loin a phengtat zom khak uh leh a huk leh kep ding uh mipite in gim ngah niloh zawsop ding uh hi. Mipite in gimna a ngah ciangin cimtakin muhdah ding uh hi. A cimtak leh muhdah luat uh leh lehdo ding uh hi. Mipite gupna om loin thuneihna nei ten sawt len zo lo hi. Na humbit ding mipite tungah na tatsiat leh thuneihna a hong pia Pasian leh mipite nang lamah hong pang den ding na kisak khak leh thal lam cil sia na bang ding a, a tawpna ah nang leh nang tuisa na kibuah khum ding hi. Nang leh nang na kikhen sese kei in!

Thuneihna neite in thuman lo, phuahtawm thu leh zuauthu saangin na sem leh a nuai-a thuneite leh a mite zong zuau bulomtang, upmawh leh phuahtawm genin buai henhanin nitum lel uh hi. "Kumpipa in zuauthu saangin na sem leh a nuai-a ulian khempeuh zong zuaugenin nitum ding uh hi," ci-in Paunak 29:12 sungah na gen hi. Zuauthu genna leh thuman loin gamtatna tawh ukna kipsak loin gam sungah zuauthu genna leh thuman loin gamtatna piangsak zaw hi. Zuauthu leh thuman lopi-in kivaihawmna ah mipite in noptuamna ngah ngei loin khantohna piang ngei lo hi. Mipite in noptuahna a ngah lohna, khantoh gim a nam lohna ah "kipumkhatna" thu otot pen a bilap huai daltuah leh zam kitumging bang lel hi.

Thu ngaihsut theihna leh pilna lo tawh thuneihna tawl khat sung a len zo pak a om tei hangin thuneihna leh vaihawm sawt a len zo kuamah om lo hi. Paunak 8:15-16 in pilna thu a genna ah, "Kumpite in a gam mite a ukna ding, mi ukte in ngeina man a zat theihna dingin keimah in ka huh hi. Leitung a om mi ukte khempeuhin keima huhna bek tawh uk zo uh a, milian mi thupite in keima huhna bek tawh vaihawm zo uh hi," na ci hi.

Pasian in hun leh khuahunte kheel a, kumpite koihin, ama deih bangin gam uk a pahtak mite in thuneihna, uk zawh leh vangliatna za sawtpi len zo uh hi. Ahih hangin a phengtat leh a kiphasak mite lawnthal a, kuamah khahkhong lo hi. Daniel 2:21b ah, "Amah in hun leh khuahunte kheel a, kumpite koihin lah a lakhia hi," na ci hi.

Kumpi Nebukhadnezzar in Pasian tawh kikim zahin amah leh amah a hong kingaihsut ciangin Pasian in thuhihin haisak a, a kumpi gam kilakkhiatsak hi. Tua bek hi loin a mite lak pan hong kihawlkhia a, gamsate tawh na tengkhawmin, bawngtal bangin kum sagih sung lopa na ne a, a pumpi tungah daitui kia-in, a pumpi tunga a multe keelmul bangin sau a, a khutcinte muvanlai khecin bangin a hong sau hi. Tua khit nungin Pasian in mihingte’ kumpi gam uk a, a teel mi peuhpeuh kumpi a suaksak thei hi, cih phawk kikin a kam tawh teci pang ngiat hi cih Daniel 4 sung sim le'ng kimu thei hi.

Thuneihna na neih ciang, thau na tawi manin na kipum luat luat ciangin hih thu phawk masa in, "Tua ahih ciangin kumpipa aw, kong thuhilhna hong mang in. Mawhna bawl nawn kei in la, dik takin gamta in. Mizawngte hehpih leteh, tua in a sia-a na gamtatnasate hong puahsak ding a, na nuamsa toto ding hi, a ci hi." (Daniel 4:27) Turkish paunak in, "Hiam a tawi mipa adingin a hiam tawi a gal lianpen suak thei hi," a cih ngaihsun thei le'ng kidophuai mahmah hi.

Nebukhadnezzar' tapa leh ama a zalaih Belshazzar kiniamkhiat tuan loin kiphasak a, a hong kiphatsak leh kimuan luat thakhat thu-in kumpi innsung meivak a taan penna lam kawm tungah mihing khut khat hong kilangin lai a hong gelh hi. Tua khut in lai a gelh laitak kumpipa in a mu lau lua mahmah a, a mai daang gawpin a khut a ling kauhkauh hi. Amah in mitphial siamte, aisan siamte, aksi et siamte va sam pak un, ci-in a kiko hi.

Belshazzar' tua lai kigelh a sim thei, a khiatna a hong gen thei peuhmah kumpi puanpi silhsakin, minphatna khamkhi a ngawngah ka oksak ding a, kumpi gam sungah a za lian a thumna-in ka koih ding hi,” a cih hangin tua lai a sim thei leh kumpipa tungah a khiatna a gen thei kuamah a om kei uh hi. Tua tak ciangin kumpi Belshazzar lungkham mahmahin a mel daang semsem a, a miliante in a cihna ding mel a thei kei uh hi. (ref Daniel 5:5-9) Pasian' tawikhaina thuakin leek zo lo ahih manin a kumpi gam Media leh Persia mite tungah kipia hi. (ref. Daniel 5:25-28)

"Ka ut bangin ka phengtat zialzial zongin kuama'n bangmah hong lawh ngam kei, mipite a phun a ciak ngam leh hong lehdo ngam om sese kei e," ci-in nuamtak sa-in na phengtat khak leh Pasian' tawikhaina na tuah hun ciangin Nebukhadnezzar leh a tapa Belshazzar' tungah thukhenna bang na tuah lohna dingin thu saupi ngaihsun kawmpi gamta kampau in.

Na nuai-a om mite thuakgimna, thumna, kahna aw leh hagawina Pasian a za lo dingin Pasian a bilngong lo, a mu lo dingin mittaw lo hi, cih phawk in. Mipite leh Pasian' tawikhaina na tuah ciangin na leek zawh loh khak ding kidawm in! Pasian a um Khristian hi'ng na kici a, lawki mi na hi zongin Zakna ding hun leh khuahunte kheel a, thuneihna nei leh kumpite koihin, a lakhia Pasian hi. zakna ding bil a nei khempeuhin hih thu za ta hen!

 Thang Khan Lian #ZUNs reports