WHITE HOUSE IN DR. FAUCI' LAB THEORY VAI-AH A EMAIL LEAK TAWH KIZOPNA NEI-IN NGAWHNA A TUAH SAAN LAI TAKIN GUM+CORONAVIRUS ORGINS
June 4; White House in tu nai diakin US president' top coronavirus adviser Dr. Anthony Fauci' emails kikhah leh kipholakkhia vai hangin Fauci in scrutiny a tuah lai takin gum hi. Press secretary Jen Psaki in, Dr. Fauci pen Covid-19 pandemic dona ah nial zawh ding ahi lo van manpha (undeniable asset) hi, ci hi. Hih bang kawmkal ah Dr. Fauci in CNN kiangah, virus laboratory leak theory vai ka email exchange pen ahihna tawh kituak lopi-in kigenin hong kingaihsutsak (being taken out of context) hi, ci hi.
US President Biden in Covid-19 virus hong kipat khiatna bulpi (origin) review bawlpha-in thukankhiatna a neihna dingun US intelligence tungah thu a piak hangin Covid-19 virus pen laboratory panin hong kipan hi cih thuman tawh a lahna ding teci (proof or evidence) bangmah om lo hi. anti-China propaganda thu a lim gen mahmah conspiracy theories mutmut teng leh a diakin political conservatives ten lab leak theory lim gen pha diak sese uh a, um pha diak henhan uh hi.
April 30, 2020 pekin Trump in Wuhan Lab panin a virus hong kipan hi cih a teci kinei a, a sawt loin mipi muhna ah a teci kipholakkhia ding hi ci-in na kamciam a, $10 trillions China liausak na sawm hi. Trump in tu-in zong Dr. Fauci in lab theory vai dawn'na a piakna dingin kalh hi. May 6,2020 in zong Trump leh US Secretary of State Mike Pompeo in a virus hong kipatna mun Wuhan lab hi ci-in na ngawh uh a, intelligence reports a thei mi nih tung panin Wuhan lab panin hong kipan hi cih evidence kinei hi, ci uh hi.
May 1, 2020 pekin US intelligence ten Covid-19 virus pen Wuhan lab panin hong kipankhia-in mihing bawltawm (man-made) hilo hi, ci-in a thukhupna uh-ah na gen khin zo uh hi. Novel Coronavirus SARS-CoV-2 hong kipatkhiat zia a kantel dingin Wuhan lab ah a va kuan Dr. Peter Ben Embarek' makaih WHO team ten ni 12 sung a kankhiat khit nungun February 9, 2021 in Wuhan Lab panin a virus hong kipankhia ahih loh banah mihing bawltawm virus hilo hi, ci-in a virus lab conspiracy theory thuman hi loin zuau ahih kei leh upmawh thu ahihna thukhupna bawl uh hi.
Tua bang kawmkal ah, Biden in global facilities ah Covid-19 zatui a kilawm leh a kituakin a kihawmkhia dinga a bawl Covax tungah US in Covid-19 vaccines a neih a valte (surplus) 25 million doses kipia ding hi, ci-in gen hi. Tua banah Biden in Myanmar junta coup vai-ah Tatmadaw tawh kizopna a nei Chinese companies 28te tungah US in BLACK LIST in a ciamteh behna thu pulak hi.
Thursday in White House Press Secretary Psaki in a daily press briefing neihna ah: "President Biden leh a administration pandemic uk eh kham zawhna nuai-ah (under control) ah a kikoih zawhna dingin a panlakna leh pandemic hun in mipi zakna Dr. Fauci gente poimawh hi ci-in ngaihsun hi,'' ci hi.
Tu kal in freedom of information request a kibawlna bangin Covid-19 pandemic a kipat cil hunin Dr. Fauci' na manpha a kaihkhop emails laidal 3,200 pages media tungah kikhahkhiate a, a tam zawte ahi bang lianlianin kilakhia loin tawmkha bek deihna mun diak teng bek eukhia in a kilakhia (redacted) tam zaw hi.
US National Institutes of Health (NIH) infectious disease specialist tawh kipawlte (allies) ten Dr. Fauci' messages sungah kum zalom khat ta khit nungin a piang pandemic a kipat cil hunin amah leh amah a kipiakhiatna tawh mipite nasem (public servant) ahihna lo buang thudang kilangkhia lo hi, ci uh hi. Ahih hangin conservative critics ten Dr. Fauci in thusim seelsim in imcip (cover-up) a, a kiciamna palsatin zuauthu a gen manin Congress ah teci pan'na nei dingin sapna (perjury) a ngah theihna dingin mawh khin hi, ci-in gensia in mawhpaih henhan uh hi.
DR. FAUCI IN CNN KIANGAH BANG GEN HIAM?
Thursday in Dr. Fauci in, Covid-19 case report masa pen a omna Wuhan ah medical non-profit organisation ah research bawlna ah funding pia in a huh executive tawh email ka kikhaktuahna uh-ah a kilawm loin gamtat khiahna om lo hi, ci hi. NIH pen US pubic health agency hi a, 2019-19 kikal in bat coronavirus (baak pani a kipan Covid) tawh kisai research bawlna dingin New York-based non-profit group EcoHealth Alliance tungtawnin Wuhan Institute of Virology tungah huhna sum $600,000 (£425,000) na pia hi.
EcoHealth Alliance ah executive a len Peter Daszak in April 2020 in Dr. Fauci tungah a email khakna ah Fauci in lab leak theory tawh kisai thuman lo zuauthu (debunked) hi ci-in a gen ngam manin hangsan a sakna thu na phat hi. Dr. Fauci in email a thukkikna ah, "Na citna lahna laikhak 9kind note) hangin lungdam mahmah ing," ci-in thukkik hi. Thursday in Dr. Fauci in CNN kiangah, email leaked vai hangin kei leh Wuhan lab research in kizopna hoih (cosy relationship) nei hi ci-in genna leh ngaihsutna pen kimanna nei lo (nonsense) hi, ci hi.
"Na ut bangbangin thu ahi lopi-in lehhei in na peikawi (miscontrued) thei hi. Tua email hong khakpa in 'Na gen khiatte kei muhna tawh kibang ahih manin lungdam ing' ci-in a lungdamna thu hong ko hi. Tu dong mah Wuhan Lab panin a virus hong kipan (leaked) hi kha thei hi cih ngaihsutna kihong (open mind) ka neih kawmmah mahin Wuhan Lab panin a virus leaked hilo hi cih ka ngaihsutna mah ka len veve lai hi," ci-in Dr. Fauci in gen hi.
"Chinese ten midangte eh amau mite nangawn a sihna dingin banghiam bawltawm uh cih ngaihsutna pen a khengval ngaihsutna leh sau pai luatna hi ci-in ka ngaihsun hi. Tua bang liangin ngaihsutna (Chinese ten Covid-19 virus a bawltawm uh hi) cih khengval ka sa hi," ci-in Dr. Fauci in gen beh hi.
WUHAN LAB AH COVID-19 VIRUS KIBAWL KHIA HI CIH LAB LEAK THEORY KOI DANIN HONG KIKAIKHAWM HIAM?
Thursday in Vanity Fair magazine in investigation kibawl a khahkhiatna ah, Dec. 9, 2020 in Department of State uliante in meeting a neihna uh-ah Covid-19 hong kipatna (origins) kikumkhawm uh hi. US government in coronavirus research bawlna ah funding piak a khak theihna dingin Wuhan lab ah gain-of-function experiments tawh kisai a kigenna a kankhiat lohna dingun thu kizasak hi, ci-in Vanity Fair reports in gen hi.
Gain-of-function studies kici ah natna a piangsak lungnote (pathogens) a baiham leh nasia zaw semin a kizelh theihna dingin a lim leh meel kikheelin a natna lungno in a lim leh meel a tuam zaw deuhin a pian' beh kik (mutate) theih zia sinna leh sittelna nei uh hi.
Nung kha-in Wall Street Journal reports in a genna ah Wuhan Institute of Virology lab ah a semte mi thum cina uh uh a, Nov. 2019 in Covid-19 case masa pen reports a om ma-in zato inn ah kipuak hi, ci hi. Tua khit ni tam kihal loin President Biden in US spy agencies kiangah Chinese lab panin a virus hong kipan hi kha takpi mah hiam cih etphatna (review) a neihna dingun ni 90 sung review a bawlna dingun hun na pia hi. A beisa hun in Biden administration in Covid-19 pandemic hong kipatna thu World Health Organization (WHO) in dawn'na pia ding hi, ci-in WHO khiatin na ap hi.
FAUCI IN A BEISA HUN IN LAB LEAK THEORY NA BANGCI GEN HIAM?
May 12 in congressional testimony hun in Dr. Fauci in, "US in Wuhan lab ah research bawlna dingin funding piakna tawh kitot kinialna a piangsak ding meetna (controversial gain) dingin fund pia ngei lo hi," ci-in khauh takin na nial hi. Tua zawh May 26 in Senate hearing hun in Louisiana Republican Senator John Kennedy in Dr. Fauci kiangah, "Wuhan scientists ten gain-of-funtion reaseach bawlna dingin sum zang lo mah uh hiam?" ci-in na dong hi.
Dr. Fauci in, "Gain-of-function research bawlna in a sum a zat leh zat loh uh kithei lo hi," ci-in Senator John Kennedy dawng hi. "Chinese reserachers (scientists)-te citak leh thuman uh hi ci-in muanhuai (trustworthy) uh hi," ci-in genin dawn' beh hi.
POLITICAL REACTION DANGTE BANG HIAM?
Nung kum sungin Wuhab lab panin a virus hong kipan hi ci-in a teci lahna dingin intelligence evidence nangawn kinei hi, ci-in a gen den leh a virus a gen ciangin Chinese virus or Kungflu ci-in racist kammal a zang mun mahmah ex-President Donald Trump in Thursday in Dr Fauci in dotna a dawn ding tampi om hi, ci hi. "Dr. Fauci in 'gain of function' research bang teng thei a, cik hun-a kipanin a theih hiam?" ci-in a statement bawlna ah gelh hi. "China in (Covid-19 hangin) sihna leh siatna a pian'sakna hangin America leh leitungb bup Ten Trillions Dollars a piak ding hi," ci-in gen beh hi.
China's foreign ministry in nung kalin Wuhan lab leak theory pen a piang thei ding thu hi vet lo thu hi (extremely impossile) hi, ci-in Wuhan lab leak theory a thusim lohna leh nialna thu na gen hi.
House of Representatives deputy Republican leader Steve Scalise in a laikhakna ah, Congress mai-ah Dr. Fauci in teci pan'na a neih ding hi ci-in lakh a, "Novel coronavirus pianna (Covid-19 development) dingin US government in in research funding pia-in a kigolhna vai Dr. Fauci in Congress mai-ah teci pan'na a neih ding hi," ci-in kalh hi.
Behlapna: Pandemic kici gam khat ahih kei leh leitung bup-ah natna hipi kiawhsawn leh kizeel pen a beisa tangthu en kik le hang kum zalom khat sim in na piang den hamtang hi. Covid-19 natna ngah leitung bup-ah mi 172 million val lak panin mi 3.5 million val si khin zo hi. India gam sung, South East Asia gamte ah a second wave nasia mahmah a, tu-in Zo suante' lom teen'na North East India leh Myanmar ah nasiat kipan dingin a virus in nasia takin hong nawk hi.
Coronavirus case masa penpen 1931 kum pekin United States of America gam-a North Dakota state sunga ak (chickens) kikhoite tung panin virologists Arthur Schalk leh M.C. Hawn in na mukhia masa pen uh hi. Tua hun in a virus min infectious bronchitis virus (IBV) ci-in tua hunin na kithei hi. Coronavirus kici pen nawi a ne ganhingte leh mihingte (mammals) leh vasa leh akte (chickens) tungah natna a piangsak lungnote (viruses) a group in a vekpi in a genna dingin kammal kizang hi a, hih RNA viruses in respiratory tract infections a kici huih dikna munte ah natna a pian'sakte a lompi in genna min dingin a kizang kammal hi.
Coronavirus a kimuhkhiat masakna pen leh a hong kipatna bulpi (origin) pen China hi loin America gam na hi zawsop a, coronavirus nam tampite lakah sihna a piangsak theite pen cause SARS, MERS, leh COVID-19 hi. Covid-19 pandemic kipat khit nungin a virus a lim leh mel kibang pian napi-in a tuam zaw deuh (mutations or variants) US, UK, South Africa, Brazil leh India cihte ah a variants tuamtuam hong piang beh ahih manin hih pandemic second wave ah a diakin India gammite in thuaklah pha diak hi.
Coronavirus cih kammal pen Latin kammal "Corona" a cih kumpi lukhu ahih kei leh paakkual (crown or wreath) a cihna hi a, a Latin kammal corona cih Greek kammal κορώνη korṓnē ("garland, wreath" a cihna) panin kilasawnin human coronaviruses nam tuamtuamte a na sin leh sittel June Almeida leh David Tyrrell in coronavirus ci-in a min ding na phuah uh hi. Coronavirus cih kammal lai tawh a kikhetkhiat (print) masak kum pen 1968 kum in informal group of virologists ten "new family of viruses" a cih uh virus thak innkuan minte a phuahna dingin NATURE a kici journal ah na zang masa uh hi.
1971 kum in International Committee for the Nomenclature of Viruses (a khuanungin International Committee on Taxonomy of Viruses ci-in a min a kikhel) in coronavirus genus (group) scientific min dingin coronavirus cih na thukimpih uh hi. 2019 kum bei kuanin China gam-a Wuhan Seafood market panin coronavirus kimukhia thak pen coronavirus case masa hi loin a variant or mutant nam thak hi bek a, Covid-19 pandemic kipat khit nungin gam tuamtuamte ah a variants thak tuamtuamte a kimukhiat leh piang behlap zom dan tawh kibang hi.
Hih bangin coronavirus hong kilaih in a piankhiat (evolved) zia a thei vet lote khemna dingin conspiracy theories gen siamte leh gelh siamte in CHINESE VIRUS hi or Chinese-made virus hi ci-in min tampi khemna dingin articles leh YouTube ah video uploaded in sum zon'na dingin zangin mi tampi tak khem gawpin bum tuak bangsak zo uh hi.
Thuman a bul a bal a kantel sese lo leh ngaihsutna khuak zang sese lo teng khem zo uh ahih manun tu dong mi tampi takin Chinate pum muhdah semsemna in nei pong uh hi. Alexander Pope in, "A little knowledge is a dangerous thing," a cih bangin thu neuno bek thei-in thei kisak pah khak luatna pen lauhuai mahmah hi. Chinese-made virus cite khem tuakte in Asian origins mite gam tuamtuam ah suam uh a, a diakin America ah bang Asian mite hate crimes or hate attacks a tuah uh nakpi takin kibehlap sak hi.
Covid-19 virus variant thak nunung pen British leh Indian variants or strains hybrid Vietnam gamah zong kimuhkhiat beh leuleu hi. Tua ma-in Southeast Asian country virus variants nam sagih - B.1.222, B.1.619, D614G, B.1.17 (known as the UK variant) leh Indian variants nam thum B.1.351, A.23.1 leh B.1.617.2 kimuhkhiat beh khin hi.
Conspiracy theorists ten a genna uh up ding hileh BC hun lai-in epidemics or plagues or pestilences piang khinsa teng, 1931 kum in US gam-a coronavirus first detected case infectious bronchitis virus (IBV) kicite zong, mihingte tangthu sungah epidemic nasia pen bubonic plague kici in 1346-1353 kikal in Afro-Eurasia ah mi 70-200 miilion na vat lum hi. Tua bangin epidemic nasia a piangsak virus zong Chinese-made hi cih kul ve maw???
Lai Siangtho (LST) sunga Thuciam Lui sungah 2 Samuel 25 sung en le'ng David in Israel milip a sim lai-in Pasian hehna hangin vantung mi in Israel mi 70,000 a vatlupna thu leh Paikhiatna or Exodus 9:1–7 leh Exodus 11:1–12:36 sungah Faro lungtang khauhna hangin Pasian' vantung mi in Egypt gam-a ganhing leh mihingte' tacil teng a vatlupsak zong conspiracy theories mutpu ten Chinese-made virus hi ci vet lai le-uh a khem zawh uh LST um kineih pha diak conservatives tam tuak sa henhan ing.
Sources: The Guardian; Daily Mail; Independent; BBC
@Thang Khan Lian #ZUNs reports
